Read Chang Naga ISAIA 28 Bible Online

ISAIA 28 - Chang Naga bible

ISAIA 28

¹Ihei jaakan kibü haoeneibü yomang kaodak maibü khünei kibü haoeneibü soneikangbü hemaibü jikletko kibü chipen hoba Efraim ihei jaakbü shuong yonglambü Choba khun shanga ügütü!

²Chühashi, BUNYUBOU kho hau yaangbü hoba sekokbü che ki; sensiwan kaangbü, leilutibü yeinak tegü; hau yaangbü sopbo koubü dei tegü; haoei maangshat lamlam kaonyu to attilabü.

³Efraimbü ihei jaakbü shuong yonglam lilibü khun kho youei nakeilabü;

⁴hoba haoeibü soneikangbü hemaibü nyaületko kibü chipen laobou yomang kao maibü khünei ki, sulang anepjinei hekbü bhuk tegü kilabü, laobou mütei kho hapsilengko haoeibü ika kitoua shauan apda.

⁵Kho chaloua Thükenbou BUNYUBOU kho jouletbü hao mütli shanga hemaibü hoba soneikangbü Choba khun yeilabü.

⁶Hobaje ao matjemshanga setda, hao shanga ngühmai soushou hoba aoyouei bakhün ka lason thangan ngaitida haoen shanga hau kilabü.

⁷Lausikei habü hokei ih hoba nyakidei danko ngomeida hoba ayinglamto hauda; ungshedbou hoba mütli shuong nyakideiei ayinglam to hauda, ihei haoen suia hoba nyakideiei haoen ayinglam to haua, nyekei haplabü seia haoenei maang shikda, matjem kubüa haoen phaiyetda.

⁸Aieilausi khümsok pendou ngaitibü hoba makeilakei shenakei, khoei sakteibü kaoen che ongkei aki.

⁹“Ao la haoei ngelabü songsido lenla? Hobaje ao la haoei ngühlang kho ditentila? Nasakshou sen apsilengko, tou sen ka keksilengko to sai?

¹⁰Aishanga kho ngühkhüm che thena ngühkhüm che; ngühlin che thena ngühlin che; haneikei hansho khüneikei hansho!”

¹¹Maimai li khipan, hoba küksithang ngühyem danko haoei habü mütli to joyolabü.

¹²Haoei haoen to laukei, “Honei hakso kia, hüan mangan kibou la kanei hakso kuashi,” hoba, “Ho hau sinngaishang ki,” khei yingasikei haoenei ngüha alekuda.

¹³Hibü BUNYUBOU ngüh haoen shanga, ngühkhüm che thena ngühkhüm che, ngühlin che thena ngühlin che, haneikei hansho, khüneikei hansho, hibü khei haoen jembü lamnyu to hauan hekolambo tuongetlabü, leilulabü, minlabü hoba langlabü.

¹⁴Hibü Jerusalema mütli thüka songdakbü nyikubü müt, BUNYUBOU ngüh ditashi.

¹⁵Aieilausi kanei laukei, “Haibü to künei thebülanbü che küma, hoba Sheol to kün theyolanyobü che kia; ladang sopbojaiko koubü shieikoe danlaje, kho kün jungto aloulabü, hoba sen satenshang senei amlangbü la yeitia, hoba lepbülangbü phanga sen hua.”

¹⁶Hibü BUNYUBOU Mühghaüei hai lauda, “Chühashi, ngei Ziona chemshang che namsek chemnyek laang chemshang kaangbü che keda, aoei mailemda hao apanteilabü.

¹⁷Hobaje ngei matjembü kho takbü lüh hoba saopobü kho laangsaü takbü lüh yeitilabü, sen laang khoei yepeibü satenshang kuan aplabü, hoba deiei hushang jonlepbo koutilabü.”

¹⁸Hobaje haibü to kan theyolanyobü kho lemailela mautikulabü, hoba Sheol yoa kan thebülanbü ühaüthüklabü, ladang sopbo koubü shieikoe danlaje kheijinei haoei kan phangaenei nakeitilabü.

¹⁹Ladüngnei kho danjung haulaje, khoei kan künlabü, aieilausi kho ngeyang weko hoba chajiha hoba nangnak weko danjung haulabü, hoba kho ngühlang ditenla hatlamoklabü ong kilabü.

²⁰Aieilausi shen kho mütei kho thüka lenglabü toje tuibou, hoba jembü lolo seileplabü toje hanbou ki.

²¹Aishanga haoeibü kümsilei kümla haoeibü maang- panglabü kümsilei, hoba haoei haoeibü maangpanglabü kümsilei, haoeibü kümsilei haüthüktila shanga, Perazima Shongh tegü BUNYUBOU meimeilabü hoba Gibeon pholia tegü hao khau anglabü.

²²Hibü tou, kan khühbü kaangngaitisi amaibüla, kan nyikubü shuong teyei; aieilausi Mühghaü, Thükenbou BUNYUBOU ka mautilabü lele ong yeisapakei dogo ngei kaodak pendou khulimbo dida.

²³Kan nou hangashi, hoba ngeibü ngüh ditashi; maang kuashi, hoba ngeibü ngühlau ditashi.

²⁴Sek shapbüei youli wenla athakko sek ong shapdang leda si? Haoei athakko kao laünyinda hoba shapnyinda sai?

²⁵Ladang tang kho yentilaje haoei pendoua monshu hoba shikmei maitibü wenda aying lo? Whet youshou seka linlina hoba barli seka jaletan kibüa hoba khoeibü napheinei wentek kümbü youshou wennyinda aying lo?

²⁶Aishanga haoeibü Mühghaüei hao la tükde shean lenda.

²⁷Aishanga shikmei maitibü kho nitshanga peisilei akbüei anitnyinda, ayingsi monshu tokei kailong youei anitda, lausikei shikmei maitibü kho bungümei ngümda, hoba monshu kho juei ngümda.

²⁸Youshou netla yeiko anitnyinda, aishanga haoei kho ponpendouje alomda, hoba haoei kailong you hoba haoeibü koli shuongei kho sennyinan phosikei, haoei kho angümnyinda.

²⁹Hokei Thükenbou BUNYUBOU ka loukei, ao damanchühbüa maangpanglabü, hoba songadoa maiboutham ki!