Read Chang Naga ISAIA 29 Bible Online

ISAIA 29 - Chang Naga bible

ISAIA 29

¹O, Ariel, Ariel, Dawidei kümbü haksoshang sangnyu, ka shanga ügütü! Po to po jinyokushi, lemsilang sepeisaiko loutishi!

²Kheijinei ngei Ariel, maangto shattilabü, hoba khünei haapyobü hoba manghaapbü kilabü. Khei yingsikei sao kü thedanga Ariel ong kilabü.

³Hobaje ngei ka khulimbo panget lelabü hoba ka khulimbo lapheishonei thangetlabü, hoba ka khulimbo ngei lapheishon shelabü.

⁴Kheijinei phang to kouan nyi kaomaang ka ngüh anglabü; hoba kao ka kaibü ngüh kouan longlabü. Kao ka amaibü soushou cheeibü ngüh tegü kao ka longlabü, hoba kao ka nyi ngüh laubü ngühlang hanbü loushedlabü.

⁵Lausikei kaibü dangboulabou shuong thamngu netshou tegü kilabü hoba hatlamoklabü mütshuong kho soujung satbü youshou sho tegü kilabü; haü, kho chemala mangde ong haüthüklabü.

⁶Thükenbou BUNYUBOUei langmakei hoba selonyibü yaangbüei hoba Mühghaüeibü yei hoba yeithu yeinakei hoba lonshembü wanei sao pean chühlabü.

⁷Hobaje Ariel khulimbo wapyobü phang tan pendou khei sao khulimbo hoba saoeibü haukibü lapheishon hoba sao maangto shattibü khulimbo wapyobü manghlibü che tegü nangnak mangh che tegü kilabü;

⁸mühei haiko kibü mütei haoeibü mangha nyak shauda, lausikei hao senyühashembo pienbü tegü kilabü; ayingsi deilako kibü müt cheei dei yungko manghlida, lausikei deilamang amaiko semthetnyu pibü tegü kilabü; Zion shongh khulimbo wapyobü phang pendou kabü tan khei kilabü.

⁹Mangyoashi hoba maang- pangyoashi, kan lolo nyek thuashi hoba nyek thuan kishi, haoen haoenei yungthüng yunga, lausikei ihei aying; haoen ngomeida lausikei nyakideiei aying!

¹⁰Aishanga BUNYUBOUei kan thükto mangan apan nyaaklabü soushou khüpan jinkulabü, hoba thuseibü shuongei kaneibü nyek khinlepbuakei, thuseibü shuongei kaneibü khu haoei küplepbuakei.

¹¹Hobaje tou kan thedanga mangsang pendou dobü shangjin- an kibü ngüh tegü kia, laobou müt cheei hapbü ngebü chela kujinei, “Sanoudambo ho weashi,” dogo suajaa longa haoei laulabü, “Ngei athük, aishanga ho shangjinan kia.”

¹²Ayingsi cheei ao hapbüngebü aying hao la kuko, “Sanoudambo ho weashi,” dogo laua longa, haoei laulabü, “Ngo hapbüngebü aying, ngei wela athük.”

¹³Kheijinei BUNYUBOUei laukei, “Aieilausi habü mütshuongei sembungei ngo nyangko louda hoba haoeneibü dambü shuong kü ka lounyu heakei, haoeneibü sembungei kü la soumo kuda hoba haoenei kü la nyenhang kubü kho khei helelea ditletbü ong ki.

¹⁴Hibü chühashi, ngei ho mütli yoa khei maangpanglabü kümsilei hoba seikümseilei nyibou kümlabü, hoba haoen songbüdobü mütshuong songsido maulabü, hoba haoeneibü ditenbü mütshuong yoa leshang akiko aplabü.”

¹⁵Aoyouei honsiyou BUNYUBOU ka huan phola haülangtham thuda, haoen shanga ügütü; haoenei kümsilei shuong nakthüh phanga kümda, hoba haoenei lauda, “Aoei kün hapda? Kün aoei ngekei?”

¹⁶Kanei kümsilei khü- peilangeikuda! Chakyaübü kho shungkung kao to takteiyola tegütham! Küman kibü peisileiei kümbou to, “Haoei ngo aküm” dogo laulep lo? Ayingsi chakyaübou to chakei, “Haoei ai angekei” dogo lauenlep lo?

¹⁷Lebanonbü buhek hekbü kaonyek yeitilabü, hoba buhek hekbü kaonyek lamang la yeila toukei jih tuisho ong aki lo?

¹⁸Kho chaloua obangbü shuongei lea kibü ngüh shuong webü ditlabü hoba thüngmangmanga kibü ka nyek thubüei nyekei haplabü.

¹⁹Toukei sembüambü shuong olinbü BUNYUBOUa haako yaangko yeilabü hoba müt yoa shalebüei Israel Saopobou to olinyolabü.

²⁰Aishanga asük alangbü songdakbü mauan aplabü, hoba müla nyikubü thonan aplabü, hoba amaibü lamthen kümbü pendou konglabü.

²¹Ao- youei müt at shedtila ngüh püpbuda hoba aoyouei bakhüna sung sankuda, hoba aoyouei ngühmaanglanbü amlangbü la yeitiko apbuda haoen pendou wapan apbulabü.

²²Hibü Abraham khümenbou BUNYUBOUei Jakob mütli shanga hai lauda, “Touje Jakob himouko akilabü, ayingsi haoeibü thenyek phaklaktham ayeilabü.

²³Aieilausi ladang haoeibü shousi shuongei haoen yoa kü ikei kümbü haplaje, haoenei kü nyen saüenlabü, haü, haoenei Jakob Saopobou saüenlabü, hoba haoenei Israel Mühghaü to soumo hatlabü.

²⁴Aoyouei matjembüa mashikkei haoenei ditenko laulabü, hoba aoyouei nyamnyamkei haoenei lenbü ditenlabü.