Read Chang Naga ISAIA 3 Bible Online

ISAIA 3 - Chang Naga bible

ISAIA 3

¹Aishanga, chühashi, BUNYUBOU, lakjaibou BUNYUBOUei Jerusalem ka hoba Jihuda ka, kibü khümbomeiko, khei shausiyung khümbo, hoba dei khümbo sunglanglabü;

²hau kibü müt hoba sepai, matjembou hoba thuseibü, manghdakbü hoba jaishou shuong.

³Anjinsem thüka lajamleibou yaangbü müt songdakbü daman- chühbou, maangli maangsang müt senbabü, hoba seibü yaübü libü nyenbü.

⁴Hobaje haoeneibü Choba lela ngei haoen la shousishuong kulabü, hoba nashou okjok shuongei haoen thüka songdaklabü.

⁵Hobaje mütshuong cheei che, cheei che hoba mütpem weko jembü chempenei khonkutilabü; hoba nashousiei baushi thüka, hoba hanbüei yaangbü thüka jembü lolo yonglambo jungeilabü.

⁶Müt cheei haoboueibü chema che senetan, “Nyi neisimei kia, no kün thüka songdakbou yeishi, hoba ho leilubü thüka ka maang leshi,” dogo laulabü jih che loulabü.

⁷Lausikei kho chaloua haoei ngüh longko laulabü, “Ngo maitibou che aying, aishanga ngei chema shausiyung ayingsi neisimei aki; kanei ngo mütshuong thüka songdakbou ayeitijan.”

⁸Aishanga Jerusalem leiluakei, hoba Jihuda tuongakei, aieilausi haoeneibü ngühang hoba haoeneibü kümsileiei BUNYUBOUeibü soneikangbü khulimbo kia.

⁹Matjemjinei haoenei haoen khu limbo kuda, Sodom phatko haoenei jembü shabü ngetida, kho huan aphoda, haoen jembü soushou shanga ügütü! Aishanga haoenei jembü to haoenei lolo amaibü küma.

¹⁰Saopobü shuong shangaje maisho kilabü, aishanga haoenei jembüei kümbüleibü mai shaulabü.

¹¹Amaibou shanga ügütü! Hao shanga amaibü kilabü; aishanga haoeneibü ikkümiklei pailetbü haoen la ngaitikulabü.

¹²Kü mütli shanga haoen shieikoebü shuong kho nashousi shuong kilabü hoba yaksa shuongei haoen thüka songdaklabü. Kü mütli shuong! Kan leiyeibü shuongei kan ayingbü to leida, hoba kan phai semlabü lamnyu mautida.

¹³BUNYUBOUei ngüh laula loan thedang ae hauda, haoei jembü mütli matjemla loda.

¹⁴BUNYUBOU jembü mütli jaishou shuong hoba leiyeibü shuong yoa matjemshang to atlabü hoba laulabü, “Semlüh sek kanei kongkong aptikei, shalebü ka soshau soyungbü kaneibü ika kia.

¹⁵Kü mütli ngümnyinbü hoba shalebüeibü thenyek nitnyinkulabü ho kan ai tetlabü? dogo lakjaibou BUNYUBOUei lauda.”

¹⁶Toukei BUNYUBOUei lauda, “Zion nouyangshou shuong lilikhuian kia, hoba haoeneibü ngüm shingan hoba nyek phühenan, haoen paijinei khangkei khangko hoba haoeneibü youa tüngtüng dogo witiko paida.

¹⁷Hibü BUNYUBOUei Zion nouyangshou shuong khunyuyoa nyik longtikulabü hoba BUNYUBOUei haoen khu tongan phokulabü.”

¹⁸Kho chaloua BUNYUBOUei haoeneibü chühjanbü shuong youngüm jikhap, khuthep, nou- chi,

¹⁹thok hoba chinyu hoba ngüma kaibü nei

²⁰khun hoba youkhap, senyak, ponlem thung hoba khüngkhap,

²¹ikjikhap hoba kungkhap.

²²Lemsilang neisimei, mangyuk hangan jinan neilabü neisimei, namjin nyingkou,

²³jajalalabü neisimei, phembanei inyaibü, khuphai, neikhuyukbü nei sunglanglabü.

²⁴Hobaje kho khei haüthüklabü, ponlem jeila nyaülüm, senyak jeila jaklüh, khulou maibü jeiko khüngkhebü, hoba hangenbü neisimei jeiko senou nei, hemaisaomai jeiko himou kilabü.

²⁵Ka mütshuong inei hoba kaibü lakbühongbü shuong lasona tuonglabü.

²⁶Hobaje saoeibü bakhünei waanglabü hoba mang haaplabü, hoba sao litham kilabü hoba kaoa setlabü.