Read Chang Naga ISAIA 30 Bible Online

ISAIA 30 - Chang Naga bible

ISAIA 30

¹BUNYUBOUei laukei, “Lulimbü shousi shuong shanga ügütü! Aoyouei songsido leda, lausikei kü ka aying; aoyouei shabü che thükto che jinyoko küpjinei küplepan phoda, lausikei kü soushou ka aying.

²Aoyouei kü ka songsido apheko Ijep to meimeian Faraoeibü haua haoen lolo hau kingaila hoba Ijepbü yemephanga maanglem kila shanga yankei!

³Hibü Faraoeibü hau kho kan himou hoba Ijepbü yeme phanga maanglem kibü kho panglangtilabü.

⁴Aishanga haoeneibü Choba shuong Zoana kiasikei hoba haoeneibü lambubou shuong Hanes to louan kiasikei.

⁵Haoen la ku kula athükbü khei thuibü ayingsi ku akuenbü mütli danko haoen himoulabü hoba nyen shedla ong yinglabü.”

⁶Negeb meisiau shanga thusei ngühlang che. Khonsak hoba khonkubü kaodak, ai ka molosaonyu nyunyu hoba paang, lüh kibü pinyu hoba wan tegü sengjung haubü pinyu, haoenei nyaksinam shuong gadu shoushou taaka hoba haoeneibü thanbü nyaksinam uteibü angudonga künan haoen la ku akuenbü mütli jungto hauda.

⁷Aishanga Ijepbüeibü thuibü kho amlang hoba aikei leshang aki, khei yingbüei ngei sao to setan kibü Rahab dogo lauda.

⁸Tou hauashi hoba loulabü chaloua aukabü lela haoen thedanga kho laangdak chenei doashi;

⁹Aishanga habü ho lenbü aditbü mütli shuong, maang asangbü shousi shuong, BUNYUBOUei songlenbü aditenlabü shousi shuong ki;

¹⁰Haoenei mangsang hapbü to “Tehüp” dogo lauda, hoba thuseibü to “Ai tükde kho teteten, kün to ngüh maibü ong laushi, khüpbolangko tetenshi.

¹¹Lamnyu ka longan apshi, lamkhong ka sepeinyu kukashi! Israel Sao- pobou kün la teditti,” dogo lauda.

¹²Israel Saopobouei hai lauda, “Aieilausi kanei ho ngüh wela ale, hoba khüpbülangbü si kombünongbüa maanglem phoda hoba khübü to nongan kida;

¹³hibü ho shedshonbü kan thükto kümthang suokbü kaangan tuongla ong kibü mangde leiluan tuongbü kan thükto lotbü tegü kilabü.

¹⁴Hobaje haoei kho chakyaübüeibü chak aikei ajouko ngümnyinbü phatko leilukulabü, hibü ho netla yeiko ngümnyinbü yoa hokjung ka wankak yasebü sungenla, ayingsi deidang ka dei khujin phoushou che ongkei üpyolabü.”

¹⁵Aishanga Thükenbou BUNYUBOU, Israel Mühghaü Sao- pobouei hai lauda: “Sepeibü hoba haksobüei kan khümenlabü, eaaoa kibüa hoba maanglembüa kaneibü hau kilabü; hoba kanei aying lauda.

¹⁶Lausikei kanei laukei, ‘Aying, kün kolia setan satlabü.’ Hibü kan satlabü! Kanei laukei. ‘Kün sobüsepbü kolia setlabü.’ Hibü kan shibü shuong sobüsepbü kilabü!

¹⁷Müt cheei hatlensi hajar che satlabü; müt ngaoei hatlensi kan shongha kibü amaaphilabü che tegü hoba shonghshoua nisankung che tegü kan üpyo shongko satlabü.

¹⁸Khei yingasikei kan to onoula BUNYUBOUei haiyeilabü: hoba haoei kan to onoula shanga hao meimeida; aishanga BUNYUBOU kho ngühmai Mühghaü ki. Ao- youei hao shanga haiyeida, haoen pendou haübou!”

¹⁹O, Jerusalema kibü Zion mütli, touje kan ühaaplabü; kanei ngekbü ngühlang ditjinei haoei kan to onoulabü; haoei ditjinei haoei kan to jongailabü.

²⁰BUNYUBOUei kan la dangboueibü nyak hoba khonkubü dei kuasidogokei, kaneibü lenbou touje hao lolo huan akilabü lausikei kaneibü nyekei hao haplabü.

²¹Hobaje kanei ladang mai aeto ayingsi nanae aeto sepeilaje, kaneibü nouei kan phainei ngüh che hai lauko ditlabü, “Lamnyu ho yingkei, honei paiashi.”

²²Hobaje chandinamei naanglepbü jakenbü heangsho hoba hon tühan jinbü heangsho noksa kanei shaan aplabü; khübü kho kan shanga asaopobü peisilei che tegü yeian aplabü, hoba kanei khübü to, “Koulangashiü,” dogo laulabü!

²³Kheijinei haoei kanei kaonyua wenan phobü kesiong yemtila lang yantikulabü hoba kaonyu ka shusiphon müisiman maibü apsileko longlabü. Khünyet kaneibü shatsinam lamshaushang khongthuyaanga lamshaulabü.

²⁴Hobaje sek shapbü masu pongsu si gadu shoushou shuongei maisho sipbü hoba jem khonbü youho nyailabü.

²⁵Haitibü chalou yaangbü khünyet, ladang lapheishon shuong tuonglaje, shongh suokbü wekoa hoba shonghshou suokbü wekoa shushou shuong koulabü.

²⁶Ladang BUNYUBOUei mütli la mou khühkulaje hoba haoen to ngümbü mou maitilaje, khünyet chaloua litnyu ngesakbü kho chanyu ngesakbü tegü kilabü hoba chanyu ngesakbü kho chalou nyetnyetbü ngesakbü tegü ngesakbou kilabü.

²⁷Chühashi, BUNYUBOUei saabü ka khauanga juokko wankhük shangtüngbü khuibüa louyenada, haoeibü sembungkhop khauangei shenan hoba haoeibü lishang suibü wanlong tegü ki.

²⁸Haoei hakhinbü yungsen tegü ngüma thükko longakei. Mautilabü shangkuei phangshuong sinan aplabü; hoba maubü lam to leila shanga mütshuongeibü sembunga senbü janglüh kilabü.

²⁹Lausikei kan shangaje saopobü lemlibü you tegü hoba BUNYUBOU Israel Laangnyu jungto haula pithung jungan olinangko meimeijung haubü tegü, chia che kilabü.

³⁰Aieilausi BUNYUBOUei haoeibü soneikangbü ngühlang dittilabü, hoba hatlamoklabü sei haüthükbüa hoba wanlong sangmei mangde shoongjung haubü langtok yeinak hoba sensiwan loubü yoa haoeibü phak haplabü.

³¹Ladang BUNYUBOUei haoeibü julouei ngümlaje BUNYUBOUeibü ngüh ditan Assiria hatbümokbüei sühlabü.

³²Hobaje ngümbü juei BUNYUBOUei haoen to ngümbü weko, busen hoba tuokbü kongkin ngühlang phai semlabü; hoba lason nyaakeitibüei haoei haoen to wapyolabü.

³³Aishanga shangied ka thama juokshang che lamlean haüthükakei, haü, ho Choba shanga lamleakei. Haoei wan si bu apsileko phoan haübü hoba hopabü kümbuakei; BUNYUBOUeibü hakhinbü wanlüh shumang phatko kouko wan longan kia.