Read Chang Naga ISAIA 31 Bible Online

ISAIA 31 - Chang Naga bible

ISAIA 31

¹Aoyouei thuibü lambo Ijep to louyanda hoba koli to maanglem kida, haoen shanga ügütü! Juong yingbü ka haoenei kailong shuong to, koli sepai shuong juong kibü ka khübü to maanglemda, lausikei Israel Sao- pobou to achüh, ayingsi BUNYUBOU to apheyo!

²Khei yingasikei hao songsido kia, hoba jembü ngüh asungngaida, hoba amaibü sungbakuda. Aoyouei amaibü kümda, haoen khulimbo hoba aoyouei shedbü shabü kümsilei kümda, haoen to thuibü shuong khulimbo meimeilabü.

³Lausikei Ijepbü kho Mühghaü aying, müt ki; hoba haoeneibü koli soushou aying, phe ki. Hibü ladang BUNYUBOUei ik shinglaje, thuibou phaiyetlabü hoba thuibü lebou tuonglabü; ham liko maulabü.

⁴Aishanga BUNYUBOUei kü to hai lauda, “Molosaonyuei ayingsi molosaonyu paangei taketbü meisiau thüka ngühbü tegü ki, khei, sanlombü dan pendou hao khulimbo ngashaiasikei, haoenei ngekbüa amokda, ayingsi haoeneibü ngühlanga aikei maang akuda; kho tegü Thükenbou BUNYUBOUei Zion shongh khulimbo hoba shonghshou khulimbo wapyola yanlabü.

⁵Ngühlepan seengeibü aushuong tegü, Thükenbou BUNYUBOUei Jerusalem khümenlabü; haoei thangetlabü hoba kho haoei püetlabü, hoba haoei koletlabü hoba nangletnyu phokulabü.”

⁶BUNYUBOUei laukei, “Israel shousi shuong, kanei kaangkosekko khulimbo meimeibou jungto sepeiashi.

⁷Aishanga kho chaloua haoen mütpem wekoei chandinam heangsho hoba honeibü heangsho, laobou kaneibü shabütabü ikei kan shanga kümbei kho kanei aplabü.

⁸Kheijinei Assiria inei tuonglabü, kho müteibü inei aying; inei suilabü, lausikei mütmaieibü inei aying. Haoen in thedang ka satlabü, hoba haoeibü heshou shuong aao la yeitilabü.

⁹Hatbülühbüei songdakbou langjung satkulabü, lapang langh to leiyeibü shuong mokbüei nisan apyoan satlabü,” dogo haoeibü wan Ziona, hoba haoeibü wanhap Jerusalema kibou BUNYUBOUei lauda.