Read Chang Naga ISAIA 32 Bible Online

ISAIA 32 - Chang Naga bible

ISAIA 32

¹Chühashi, Choba cheei sao- pobüa songdaklabü, hoba khuleibü shuongei ngühmaanglanbüa kaplabü.

²Hobaje haoen mütpem weko yei ka satenshang, hoba yeinak ka hushang tegü, kaolina shumang phatko hoba chalin kaodaka laang yaangbü yemekoubü phatko kilabü.

³Kheijinei aoyouei hapda haoenei nyek amulabü hoba ao- youei ditda haoenei nou hangan kilabü

⁴Hobaje thounouboueibü maanga ditenbü songsido kilabü hoba li khipan kibü shuongei shangashatko laula panteilabü.

⁵Touje ngoubü to yaangenbou dogo alaulabü, ayingsi ngühmaang alanbü to yaangbü dogo alaulabü.

⁶Aishanga duduyaya mütei soungouabü ngühei joyolabü, hoba haoen maangpona amaibü huon daklabü. Haoei Mühghaü to ühütbü kümsilei kümlabü, hoba BUNYUBOU shangabü amlangbü laulabü; mühei haibou senyüh- ashembo apyolabü, hoba deila phametnyu kibou la ayungtilabü.

⁷Ngühmaang alanbü peisilei kho amaibü ki, yepeijawebü ngühei eaaoabü mautilabü, khambouei tükde lauasikei haoei huon amaibü takda.

⁸Lausikei mangsembü mütei maangmai kümsilei kümda; hoba maimang kümaleia younak kümda.

⁹Kan helelea kibü yaksa shuong meimeiashi, hoba ngeibü ngüh ditashi; kan asangadobü yaksa shuong, ngei laubü ngüh to nou haangashi!

¹⁰Po che phaia, chalou shishoko kan khonsaklabü, kan asangadobü yaksa shuong; aieilausi semlüh seka mai aheklabü hoba aikei asunglabü.

¹¹Sensentham lühashi, kan helelea kibü yaksa shuong, lühjilühko kishi, kan asangadobü mütshuong; nei hangletashi hoba kan lolo mütkong yeishi; kaneibü shenjanga senounei shembe kaiashi!

¹²Sek maibü shanga hoba mai hekbü semlüh shanga;

¹³kü mütlieibü kaonyeka jaklong hoba jakham yemlabü, hoba olinangko kibü sangnyua olinbü chem shanga kaneibü khukhu to jangashi!

¹⁴Aishanga Chobaeibü chem apyolabü hoba müt juong kibü sangnyu nangletlabü, shongh yamkabü gadu shuong olinyoshang, shatsinam tan tana lamshaushang shanga thüngshang la yeilabü.

¹⁵Thükae ka sen thükto soushou khüpan ajinkushongko; hoba yam kho mai hekkubou sek ayei shongko; hoba buhek hekbü sek kho yamlamang ayeiti shongko kho khei kilabü.

¹⁶Kheijinei yama ngühmai matjem kilabü hoba saopobü hek hekshang seka kilabü.

¹⁷Hobaje saopobü kümka leika longbü kho hakso kilabü; hoba ngühmai ka longbü kho ponpen shanga eaaoa kibü hoba maanglem kibü kilabü.

¹⁸Hobaje kü mütli shuong sangmaia kila hanghangyeplabü, hoba haksobü kaoena sangsembo maisho kienlabü.

¹⁹Lausikei yam chengshemlabü hoba sangnyu leiluan phokulabü;

²⁰kan aoyouei shumang pendou nyangko lilabü wenda, hoba masu pongsu si gadu shuong yangan litian lamshautida, haüa.