Read Chang Naga ISAIA 33 Bible Online

ISAIA 33 - Chang Naga bible

ISAIA 33

¹No leilutikubü müt, no aleiluko kiasikei; soshauso- yungbü müt, aoeikei ka ka asoshauko kiasikei, no ügütü! Nyi leilubü thonan phaiaje, no leilulabü hoba nyi soshausoyungbü thonan phaiaje ka to soshauso- yunglabü.

²O BUNYUBOU, kün to onoukai ma! Künei no chüheida. ngeyang weko no küneibü hau, hoba khonsak khonkua no küneibü khümenbou yingshima.

³Lemenbü ngüh ditan mütshuong koujung ngaida, no lolo meimeijinei phangshuong linda.

⁴Hobaje nyi soletbü peisilei shuong kotkotyangei haushaibü tegü haushailabü, koksing shuong tomjung satbü tegü haoenei kho thüka saiyeilabü.

⁵BUNYUBOU yaangenakei, aishanga hao thüka kida; haoei Zion ngühmai hoba saopobüei shentiakei;

⁶hoba khümenbü songsido hoba hapbüngebü songsihon kaibü jihaphaia kaangkhühtham kilabü. BUNYUBOU to souhatbü kho keisiyang thanshang ki.

⁷Chühashi, haoeneibü lakjaibü shuongei khongthua ngekda; sangmei hakso shanga lambubou shuong aeibou haapda.

⁸Lamkhong shuong apyoa, hoba wakoubü shuong akiko thonan apa. Haoeibü jishuoklamshuok ngühkhüm leilua, youkobü shuong nyikua hoba aolakei soumo akuda.

⁹Kaodakei manghaapda, hoba haapyoda, Lebanon himou bauakei hoba yuian apda; Sharon kaomai yo yamla yeia, Bashan si Karmel Shongh pikyik ea.

¹⁰“Tou ngo meimeilabü,” dogo BUNYUBOUei, lauda. “Tou ngo thükae anglabü; tou ngo tonenlabü!

¹¹Kanei youshou sho shia künda, kanei youho buklabü, kaneibü hak kho kan suilabü wan ki.

¹²Mütshuong shini juokbü tegü juoklabü; hoba jakham wapan wana jikbü tegü jiklabü.

¹³Ngei ai kümbei, kan saabüa kibü shuong ditashi, hoba kan nyangbüa kibü shuong, ngeibü hau ngeashi.”

¹⁴Ziona shabü shuong hatda; Mühghaü to ühütbü shuong hatbümokbüei süha: “Sen yokabü ao suibü wan yoa kienla? Sen yokabü ao ponpen lonko kibü wanlong yoa kienla?”

¹⁵Aoei ngühmaanglanko paida, hoba tangshaitham lauda, aoei mü khüpettiko ku hapbü mangsenda, aoei besa asungletla ik ngailangda, aoei sii angtibü aditla noua sakda, hoba amaibü to achühla nyek muda,

¹⁶hao thükaenei kilabü, hao maangsangko kishanga lapheishona kilabü. Haoeibü shausiyung hao la kulabü, hao deiei ladangkei akonglabü.

¹⁷Kaibü nyekei Choba kho hemaibüa haplabü; haoenei kaodak saabü ka chühlabü.

¹⁸Hatlamoklabü thüka kaibü maangponei damanchühlabü: “Webou yaangbou kho lanei ki? Khüm hebou kho lanei ki? Laangchem wean- chühbou kho lanei ki?”

¹⁹Li khipan, khei nyi aditenlabü lele, joyobü nyi dit ashuoklabü lele haüko joyobü mütli, hatlamoklabü mütli nyi ühüplabü.

²⁰Seneibü lemsilang kamshaishang Zion sangnyu to chühashi; kaibü nyekei Jerusalem haplabü, sangsembo kibü chem atopeibü neichem; ho jaangbü ladangkei alühenlabü ayingsi habü lüh at ongkei athetlabü.

²¹Aieilausi khünei shumang yaangbü hoba shumang hanbü kishang, BUNYUBOU soumo yaangbüa sen shanga kilabü. Kho thüka longchem aikei longlei juei ohaulabü, ayingsi longchem yaangbü danjung ohoulabü.

²²Aishanga BUNYUBOU seneibü matjembou, BUNYUBOU seneibü songdakbou, BUNYUBOU seneibü Choba ki; haoei sen khümenlabü.

²³Kaibü phenyobü janglüh sengakei; khoei longshing aenei thaonyu hau akitien, khoei longlei nei kho asengenen. Kheijinei soletbü peisilei phejan juong janlabü, hoba sokebüei mangkei sangshibü peisilei ka maibü soan sunglabü.

²⁴Khünei Ziona kibü aoeikei, “Ngo shatda;” dogo alaulabü, hoba khonei kibü mütshuong pendoueibü shabü amai apbulabü.