Read Chang Naga ISAIA 34 Bible Online

ISAIA 34 - Chang Naga bible

ISAIA 34

¹Kan phangshuong, mütli pendou nyangko kaiya, hoba nou haangko ditashi! Kaonyua kibü mütyang, mütshang khümboei ditashi.

²Aishanga phang pendou khulimbo, hoba haoeneibü lakjaibü dan khulimbo, BUNYUBOU khauang longan, hoba maangpok longan kida; haoei haoen kaangko mautia, haoei haoen haitila khümbo kua.

³Haoen haitibü tekan aplabü, hoba haoeneibü haibü mang ka nyaülüm longlabü hoba haoeneibü sii shongha aan koulabü.

⁴Hobaje müha khanshoulitshou pendou netla yeilabü, hoba mühshuong phekhon tegü tujung ngailabü, hoba semlüh long ka ik heletbü tegü ayingsi bhuklong ka ik thakletbü tegü khübü khanshoulitshou shuong pendou shemlabü.

⁵Aishanga khuthüka ngeibü in khauang longbüei shenan apa. Chühashi, Edom thükto hoba ngei khükbüuokbü thükto matjemlabü kho louyanlabü.

⁶BUNYUBOUeibü in siiei nyaka, kho haabüei san shoushou hoba loneibü sii, sanloneibü kelang haabüei yuklepakei, aieilausi Bozraa BUNYUBOUeibü haitibü lembü hoba Edom kaodaka juong haitibü lembü kia.

⁷Yamkabü masu pongsu shuong yoa hoba masu paangshou shuong yoa tuonglabü; hoba haoen kaodak siia hamlabü; hoba haoen haabüei yukleplabü.

⁸Aishanga kho chalou kho BUNYUBOUei phoklambü chalou Zion yoa wapyobüa sepeinyu ngaibü po ki.

⁹Hobaje khünei kibü shumang shuong moli la yeilabü hoba kho kaodak wansatbü moli, hoba kho kaonyek longan kibü bunai moli la yeilabü!

¹⁰Changea yingsikei nangnak yingsikei kho anyetlabü; kho wankhük ponpen khuijung anglabü. Meten meten kho apshang danglabü; aokei kho peithetko adanlabü.

¹¹Lausikei yungau si san kishang yeilabü; hoba khonei ukhoungba si aukhomakmak kilabü. BUNYUBOUei Edom thükto phenyembü takbü lüh hoba kongkong yeitibü laangsaütakbü lüh jenlabü.

¹²Kheijinei sao to Choba sangle dogo laulabü lele ai akiteilabü, hoba saoeibü songdakbü shuong aikei akilabü.

¹³Hobaje kho Chobaeibü chema jakham yemlabü hoba khoeibü lapheishona senou si jak angbü sang yemlabü; hoba kho selong si ostrik shuong thüngshang yeilabü.

¹⁴Hobaje phetsen kaodak yammei shuongei, sho si yao to haüyolabü hoba jembü thangbou to ngekyolabü, haü, nangnakbü meisiau amaibü khünei kilabü, hoba haoei haksoshang haplabü.

¹⁵Hobaje khünei ukhoungbaei saoeibü hap takko, tei teiko hoba shoushou püpbo saoeibü kaakphanga leishailabü; haü, khünei hogon kamsheilabü hoba jembü himshuong yoa kilabü.

¹⁶Kanei BUNYUBOUeibü lekak phanashi, hoba weashi; khübü kho che ongkei inletan akilabü. Aishanga BUNYUBOU sembungei sakkua, hoba haoeibü Soushouei haoen kamsheitikei.

¹⁷Hobaje haoei haoen shanga phaang pakkei, hoba haoeibü ikei haoen la jolühei takletkua, haoenei kho ponpen lelabü, meten meten haoen khünei kilabü.