Read Chang Naga ISAIA 35 Bible Online

ISAIA 35 - Chang Naga bible

ISAIA 35

¹Yamlamang si kaolin phetsen kaonyekei olinyolabü hoba jak chipen bungbüei sanglabü.

²Kho apsileko bunglabü hoba khei chia laubü ngühei olinyolabü; Lebanoneibü soneikangbü, Karmel si Sharoneibü soumo ho la kulabü; haoenei BUNYUBOU soneikangbü hoba Mühghaü soumo yaang haplabü.

³Kanei hau akibü ik hau kitiashi, hoba hau akibü youkük kaangkhühtham yeitiashi.

⁴Aoyoueibü maangpon hatbü lühbüa ki haoen to lauashi, “Hau kiashi, tehüt, chühashi, kaneibü Mühghaü phoklambü yoa Mühghaüei kungaila louada, hao louan kan khümenlabü.”

⁵Kheijinei nyekthubü nyek iplabü, hoba obangbü noukhün yetlabü.

⁶Kheijinei sokebü mütei meishi tegü saiyeilabü hoba likhipbüei chia laulabü, aieilausi, yamlamanga dei paklabü hoba phetsen kaoa dei shumang koulabü.

⁷Hobaje lamennyu kibü phetsenei thimdei dangshang yeilabü, hoba deila phaman kibü kaonyuei dei koushang shumang yeilabü. Selong kishang, lanei haoen thüngda kho thakdu si sang yemshang yeilabü.

⁸Hobaje khünei lamkhong hoba lamnyu che kilabü, hoba kho to, “Saopobü Lamnyu,” dogo laulabü. Asaopobüei kho lamnyua apailabü; ho Lamnyua paibü dan shanga ong kilabü; amaibü ngoubüloubü shuong khünei anongeilabü.

⁹Khünei molosaonyu aikei akilabü, ayingsi kho thükto haitila maangdakbü meisiau aikei üanglabü, haoen khünei athünglabü. Lausikei angthetbü shuong ong khünei pailabü.

¹⁰Hobaje BUNYUBOUei angthetbü shuong sepeinyu longeilabü hoba chia lauko Zion to loulabü, hoba ponpen thon akibü olinbü haoeneibü khua kilabü. haoen olinangbü hoba maangpon olinbüei shenlabü, hoba maangmau si maangshat satan apbulabü.