Read Chang Naga ISAIA 36 Bible Online

ISAIA 36 - Chang Naga bible

ISAIA 36

¹Tou Hezekia Choba songdak po anthüklei boubüa Assiria Choba Sennakheribei thangtetan kibü Jihudabü sangnyu pendou komlepbo angkei hoba khübü kho lekei.

²Hobaje Assiria Chobaei Lakhish ka haoeibü lajamleibou yoa sepai tan yaangbü che Jerusalem to Hezekia Choba jungto hautikei. Hobaje lajamleibou kho neisakbü kao lamkhong lason thüka deileishang thükkabou thimdei dangshang nyangko lokei.

³Kheijinei Choba chema ikjaibou Hilkiaeibü shou Eliakim dobou Shebna hoba lüngbüdobü dobou Asafeibü shou Joa hao jungto loukei.

⁴Kheijinei sepai leiyeibouei haoen to laukei, “Kanei Hezekia to laushi, ‘Hai, Assiria Choba yaangbouei lauda: Ainei maanglem phoan no hainyu maang yaangda?’

⁵Ngei lauda, wapyo shanga kaibü huon hoba hau amlangbü ngüh shuong ki; tou nyi kü khu limbo meimeian aoto nyi mailem kida?

⁶Chühashi, ho Ijep, thakdu julo nitnyinbü che, laobou thükto mütei nongalonga kho haoeibü ikto atlabü hoba sepyetlabü, kho thüka nyi maanglem phoda. Kho tegü Farao, Ijepbü Choba, hao to mailem phobü pendou to ki.”

⁷Lausikei nyi kü to, “Küneibü Mühghaü BUNYUBOU to künei maanglem phoda? dogo laualonga, Hezekiaei haoeibü saoposhanga hoba lemshang shon junga hauan kijinei Jihuda si Jerusalem to, ‘Kanei ho lemshang thedanga lemjan,’ dogo laobou kho hao aying lo?

⁸Hibü ngei tou ka to sudajada, ngeibü bunyubou Assiria Choba la thebülanbü kuashi, hoba ngei ka la koli hajar nyi kulabü, nyi ong khübünei settila lakjaibü shuong hapenalonga!

⁹Khülonga, nyi kailong hoba koli sepai shanga Ijep to maanglem kisije, lai küman nyi ngeibü bunyubou khangenbü hanbüshou yoa lajamleibou che the sepeinyu ngaitienla?

¹⁰Hobaje tou BUNYUBOU ayoko ho kaodak mautila ngo longkei sai? BUNYUBOUei kü to laukei, ‘Ho kaodak khulimbo angashi, hoba kho mautiashi.’ ”

¹¹Kheijinei Eliakim, Shebna hoba Joaei lajamleibou to laukei, “Ngei ka to sudajada, no khangenbü shuong to Aramaik ngühyema joyoashi, aieilausi künei kho ditenda. Kümthanga kibü mütshuongei ditko kün to Jihudabü ngühyema tejoyoma.”

¹²Lausikei, lajamleibouei laukei, “Ngeibü bunyubouei habü ngüh kaibü bunyu to, hoba kan to ong joyola ngo hautikei sai? Kümthang thüka setan kibü shuong, hoba kan yoan, aoyou jembüeibü phet shaula hoba jembüeibü jet yungla ki, khübü mütshuong to joyolakei ohauti sai?”

¹³Kheijinei lajamleibou lokei, hoba Jihuda ngühyema ngekko laukei, “Kanei Assiria Choba, Choba yaangboueibü ngüh ditashi!

¹⁴Chobaei hai lauda: Hezekia la kan tehuonetti, haoei kan akhümenlabü;

¹⁵ayingsi, BUNYUBOUei sen maimaitham khümenlabü, ho sangnyu Assiria Choba ikto akulabü, dogo lauko Hezekiaei kan BUNYUBOU to maitelemti;

¹⁶Hezekiaeibü ngüh tedit; aishanga Assiria Chobaei hai lauda: Kaneibü sangmai kü to kümshi, hoba kü jungto longashi; hoba kan mütpem wekoei jembü semlüh hoba mütpem wekoei jembü bhukhek shauashi, hoba kan mütpem wekoei lulueibü deikhün ka dei yungashi;

¹⁷ngo louan kaneibü kaonyek tegübü kaodak che to, youshou hoba semlüh ih kibü kaonyek, shausi- yung hoba semlüh sek kibü kaodak to kan leian ohaushongko shauayungashi.

¹⁸‘BUNYUBOUei sen khümenlabü,’ dogo lauko kan Hezekiaei suletbüla maangsangashi; Assiria Choba ik ka phangshuong Mühghaü atei kaonyek khümenakei si?

¹⁹Hamat si Arpad mühghaü shuong lanei ki? Sefarvaim mühghaü shuong lanei ki? Ngeibü ik ka haoenei Samaria khümenkei sai?

²⁰Khübü kaodak mühghaü shuong yoa laobouei ong kü ik ka haoeibü kaodak khümenan ki. Kholonga lai küman BUNYUBOUei kü ik ka Jerusalem püetla thükla?”

²¹Lausikei haoenei ngüh üangko kikei hoba hao to ngüh che ongkei ajongai; aieilausi Chobaei, “Haoen to tejoyo,” dogo sakkuan kikei.

²²Kheijinei Hezekiaeibü shou ikjaibou Eliakim, dobou Shebna hoba lüngbüdobü dobou Asafeibü shou Joa, haoeneibü neisimei jitnyinan Hezekia jungto loukei, hoba hao to lajamleiboueibü ngüh pendou lenkei.