Read Chang Naga ISAIA 37 Bible Online

ISAIA 37 - Chang Naga bible

ISAIA 37

¹Hezekia Chobaei kho ditjinei haoei neisimei jitnyinkei hoba hao lolo senounei neikei, hoba BUNYUBOU chem to haukei.

²Hobaje ikjaibou hoba dobou Shebna hoba ungshedbou jaishou shuong senounei neian Amozeibü shou thuseibou jungto haoei hautikei.

³Hobaje haoenei hao to laukei, “Hezekiaei hai lauda: Khonkulabü, haklabü hoba himou baulabü chalou ho ki; aieilausi nashousi buklabü jih süha lausikei bukletla hau akibü him ki.

⁴Aingenyu BUNYUBOU ka Mühghaüei lajamleibou, ao Assiria Chobaei langkibü Mühghaü nyikula hautikei, haoeibü ngüh ditlabü hoba BUNYUBOU kaibü Mühghaüei kho ngüh lauko ditbü shuong to haklakei thükkei. Hibü jouletbü mütli shanga kaibü welau hautiashi.”

⁵Ladang Hezekia Chobaeibü khangenbü shuong Isaia jungto loukei,

⁶Isaiaei haoen to laukei, “Kanei ho hai kaneibü BUNYUBOU to lenshi: ‘BUNYUBOUei hai lauda: Nyi ditbü ngüh laobouei ong Assiria Chobaeibü khangenbü shuongei kü la nyikukei, khüto hatko teki.

⁷Chühashi, ngei hao la soushou che jinkulabü, hoba haoei ngühpakpak che ditlabü hoba haoeibü kaonyek to sepeinyu ngailabü hoba haoeibü kaonyeka ngei hao inei haitilabü.’”

⁸Hibü lajamleibou ngaikei hoba Assiria Chobaei Libna khulimbo wapyoko hapbei; aieilausi Lakhish ka hao banga dogo haoei ditkei.

⁹Hobaje Ethiopiabü Choba Tirhakaei leian Ijepbü sepai shuong hao khulimbo wapyola longakei dogo lauko Assiria Choba Sennakheribei ditkei. Hobaje ladang haoei kho ditkei, haoei Hezekia jungto ngühlang künbü hai lauko hautikei:

¹⁰“Kanei Jihudabü Choba Hezekia to hai laushi: Kaibü Mühghaü ao to maanglem phoda, ‘Jerusalem Assiria Choba ikto akulabü,’ dogo lauko no tehuonetti.

¹¹Chühashi, Assiria Choba shuongei kaonyek pendou lemailela mautiko ai kümbei nyi dida; hoba no püetlep sai?

¹²Phangshuong Mühghaü shuongei ngeibü pisibousi shuongei shemtibü, khei Gozan, Haran, Rezef hoba Telassara kibü Eden shousi shuong püetkei sai?

¹³Hametbü Choba, Arpadbü Choba, Sefarvaim sangnyubü Choba Hena si Ivaabü Choba lanei ki?”

¹⁴Kheijinei ngühlang künbou ik ka Hezekiaei le kho sungletkei hoba kho wekei, hoba Hezekia BUNYUBOU chemto angkei, hoba kho BUNYUBOU thedanga imtian phokei.

¹⁵Hobaje Hezekiaei BUNYUBOU to welauko laukei,

¹⁶“O Thükenbou BUNYUBOU, Israel Mühghaü, ao kaakyembü kherabim thüka setan kida, no ong kaodak sangle pendou thüka Mühghaü ki; müh si kao nyi kümbei.

¹⁷Kaibü nou haangkushi, O BUNYUBOU, kaibü nyek longashi hoba chühashi; hoba langkei Mühghaü nyikula Sennakheribei hautibü ngühshuong ditashi.

¹⁸Maimaitham, BUNYUBOU, Assi- ria Choba shuongei phang pendou, hoba haoeneibü kaodak leilukua.

¹⁹Hobaje haoeneibü mühghaü shuong wana jinkua; aieilausi haoen mühghaü shuong aying, lausikei haoen müteibü ikei kümsembü bu si laang ki.

²⁰Hibü tou, O BUNYUBOU küneibü Mühghaü, kaodak sangle pendouei no BUNYUBOU ong, khei no ong, dogo ngela shanga haoeibü ik ka kün khümenashi.”

²¹Kheijinei Amozeibü shou Isaiaei Hezekia jungto ngühlang hautiko laukei, “BUNYUBOU Israel Mühghaüei hai lauda: Assiria Choba Sennakherib khulimbo nyi kü to susijasije,

²²BUNYUBOUei hao khulimbo laubü ngüh kho ho ki, ‘Zion nouyangnyu, medei, no awealau hoba no attiko nyikua; Jerusalem nouyangnyuei ka la khu ngombua.

²³Nyi ao aweasüngla hoba awealaula? Ao khulimbo nyi ngüh longkei; hoba kaibü nyek thükae to angtikei? Khei Israel Saopobou khulimbo kikei.

²⁴Kaibü khangenbou shuongei hoba nyi BUNYUBOU attikei, hoba laukei, “Ngeibü kailong tan yoa ngo Lebanon shonghkhua sühko onakei; khünei cedar bulong louboutham hoba busim pienbü bulong shuong chenga; hoba ngei kho nongbü suokboutham sühlanga hoba haoeneibü maihekbü yamchi to ada.

²⁵Ngei deikhün thukei hoba dei yungkei. Hobaje ngeibü youdemei Ijep shumang Nail pendou ulangtham aptikei.

²⁶“Lubüjinei ngei kho lai kümbei hoba shangied lai kümthen kümbei kho nyi adit lo? Tou kaibü thangtetan kibü sangnyu shuong lusakbü laangshong che la yeitila ngei kho haüthüktikei.

²⁷Hibü khünei kibü shuong la hau kian kikei, haoen maangpangkei hoba phenyemyokei; haoen khongthua yamsang tegü hoba bunyem alibü tegü hoba seka youkung alibü tegü kikei.

²⁸“No pibü hoba setbü, no haubü hoba loubü, hoba kükhu limbo khauangbü ngei khümbo ngea.

²⁹Nyi kükhulimbo khauangsije hoba no yonglam lilibü ngeibü nou to atsije ngei ngeibü ngau- yaüjin kaibü kunga hoba kaibü sembung khopa ngeibü janglüh jinkulabü, hoba no laobou lam ka loukei kho lam to ngei sepeinyu ngaitilabü.”

³⁰“Hobaje kho ka shanga tetsida che kilabü: Toupo haoen lolo ai yemlaje kho kanei shaulabü hoba nyibou poakei kho jeteibü ka longbü kho ong shaulabü. Hobaje sembou poa kanei lilabü wenashi, sek latashi, hoba semlüh laak leashi hoba kho hek shauashi.

³¹Jihuda chung jouletan kibü nyibou maangaeka li atlabü hoba thükaenei lang heklabü.

³²Aieilausi, Jerusalem ka jouletbü hoba Zion shongh ka satenbü tan che longlabü. Thükenbou BUNYUBOU maangdakbüei kho kümlabü.

³³“Hibü khoei BUNYUBOUei Assiria Choba shanga hai laukei: Hao sangnyu khüto aloulabü, ayingsi laujin che ongkei akiplabü, ayingsi kho thedangto aih thongan aloulabü, ayingsi kao ongenan kibü to limbo akümlabü.

³⁴Hao loubü lamnyu to ong hao sepeinyu ngailabü, hoba ho sangnyu to aloulabü dogo BUNYUBOUei lauda.

³⁵Aieilausi, kü shanga hoba ngo khangenbou Dawid shanga lolabü hoba khümenlabü!”

³⁶Hobaje BUNYUBOUeibü hang- angbü shuong haukei, hoba Assiriabü shaishanga hajar saongaoto saoleito ngao haitikei. Hobaje ladang mütshuong nge- yang pikei chühashi, kheijinei haoen pendou haibü mang ong kiteikei.

³⁷Hibü Assiriabü Choba Sennakherib meimeian sepeinyu ngaikei hoba Ninevia kikei.

³⁸Hobaje ho longkei, haoeibü mühghaü Nisrokh chema haoei lembo kijinei hao shousi shuong Adramelek hoba Sharezer haosiei inei hao wapettikei, hoba haosi Ararat kaonyek to satkei. Hobaje haoeibü shou Esarhadonei hao jeila songdakkei.