Read Chang Naga ISAIA 40 Bible Online

ISAIA 40 - Chang Naga bible

ISAIA 40

¹“Solotishi, kanei kü mütli solotishi,” dogo kaneibü Mühghaüei lauda.

²Jerusalem to maangnyembo joyoashi, hoba sao khangenbü chalou thona, saoei shedshonbü shedbü apbua, hoba saoeibü shabü pendou shanga penyi thüng BUNYUBOUeibü ik ka haoei sungakei dogo sao to lenashi.

³Cheei ngekbü ngühlang: “Kanei yamlamanga BUNYUBOUeibü lam lamleashi; phetsen kaoa seneibü Mühghaü shanga lamnyu tangsheitham kümashi.

⁴Kaokhong pendou tonenlabü, hoba shongh pendou yomang la yeitilabü, hoba kombünongbü pendou tangsheitham yeilabü, hoba tokbükhongbü lenglengtham yeitilabü.

⁵Hobaje BUNYUBOU soneikangbü tang khitlabü hoba kho khunakshousi pendouei haplabü; aieilausi BUNYUBOUeibü sembungei kho laua.”

⁶Ngüh cheei lauda, “Ngekashi!” Hobaje ngei laukei, “Ngei ai ngekla?” “Khunakshousi pendou sang tegü ki, hoba khoeibü soneikangbü pendou khongthu kabü chipen phatkei.

⁷Sang yuida hoba chipen setda, aieilausi BUNYUBOU hak kho thüka metan jinkuda. Maimaitham mütshuong sang ki.

⁸Sang yuida hoba chipen setda; lausikei seneibü Mühghaüeibü ngühje ponpen kida.”

⁹Jerusalem, shongh suokbü khüto angashi, hoba ngühlang maibü phinthonashi! O Zion, ngüh yaangbüei ngekashi, hoba ngühlang maibü ngetiashi! Ngüh angashi hoba hatko teki. Jihuda sangnyu shuong to lenashi, “Ka Mühghaü louada!”

¹⁰Chühashi, Thükenbou BUNYUBOU Mühghaü hau kibü tegü loulabü, hoba hao shanga haoeibü ikei songdaklabü; chühashi, haoeibü jongsak hao yoa kia, haoei kungailabü mu hao yoa kia.

¹¹Haoei haoeibü sanshuong sanlombouei tegü samlabü: haoei haoeibü phemei san shoushou shuong leishailabü, hoba haoei khübü kho khukua tonda. Hobaje sen yoptibü shuong kho hangsho leian haulabü.

¹²Aoei haoeibü ikkhonga yungnyu takan chühla thükkei, hoba müh phakei takan chühla thükkei? Hobaje kaodaka thamngu takbü che maisho ngela thükkei, hoba shongh shuong seret hauan chühla thükkei, hoba shonghshou takteila thükkei?

¹³Aoei BUNYUBOUeibü dambü ngekei, hoba hao la songsido maibü kubou la yeiko hao thungeikei?

¹⁴Mühghaüei ao ka songsido lekei, hoba hao la aoei songlenkei?

¹⁵Chühashi, phangshuong kho meisokka deimenshou saangbü jam; hoba sereta thamngu hanbü che hima haoen weeida. Chühashi, su shuong haoei peisilei aeibou hanbü che hima tonenda.

¹⁶Lebanon kabü meisiau shuong juokbü lembü shanga, ayingsi bunyu shuong jikla southüng aying.

¹⁷Hobaje hao thedanga phangshuong pendou ai aying, hao thedanga haoen ai akibü kongkong hoba jim aki dogo weeida.

¹⁸Khülonga kanei Mühghaü aoto takteila?

¹⁹Heangsho yaübü kho kümbüleibü mütei tühnyintibü ki, hoba hon yaübouei kho thüka shanjinkuda, hoba chandinam namlühei phenda.

²⁰Kho tegü lembü kula ao aeibou shale phaman ki, haoei ashalabü bu pienda. Kheijinei haoei jembü shanga heangsho noksa atopeiko toktian phola kümaleia ikseibü müt lamda.

²¹Kanei angekei lo? Kanei adit lo? Khangjineithama kan la alen lo? Kaopakjineithama kanei aditen lo?

²²Kho kaodak kailepbü thüka setbou hao ong ki, hoba khünei kibü mütshuong koksüng hima ki. Haoei müh shuong thangtetnei tegü shingtida, hoba neichem tegü maangaenei kila danglepan phokuda.

²³Khei yaangenbü shuong aila ayeitida; kaodak matjembü shuong haoei amlang la yeitida.

²⁴Haoen maisho akekei, haü, haoen maisho awen; haü, haoen kaoa li maisho üat. Haoei haoen thükto souda; hoba haoen ngokan apda, hoba haoen yeishikei youho tegü soulangda.

²⁵“Khülonga kü to jetei yeila kanei ngo ao to takteiyola?” dogo Saopobouei lauda.

²⁶Kaneibü nyek thükaeto chühangtiashi, hoba chühashi, habü ho aoei kümbei? Aoei haoeneibü lakjaibü shuong leishaikei, hoba haoen pendou to haoei nyenshenko ngada; Haoeibü hau yaangbü danko, hoba haoeibü seisihauei che ongkei amauko ki.

²⁷Ngeibü lamnyu BUNYUBOU ka huan phoakei, “Ngeibü ngühmai ngeibü Mühghaü ka khei dantida,” dogo nyi aila lauda, O Jakob? hoba aila nyamnyamda, O Israel?

²⁸Nyi angekei lo? Nyi adit lo? BUNYUBOU kho thon akibü Mühghaü ki, kaothon shuong Yaübou ki, hao amangetda ayingsi asemthetda, hoba haoeibü songsihon aoeikei aphanjemlabü.

²⁹Semthetbü hoba hau akibü la haoei seisihau kungaida.

³⁰Mütao shuongkei semthetlabü hoba mangan shemlabü, hoba heshou shuong phaiyetlabü hoba tuonglabü;

³¹lausikei aoyouei BUNYUBOU to haisühda haoeneibü hau sinngailabü. Haoen aulu shuong tegü kaakei seengjung anglabü; haoen laangsikei amanglabü, haoen pailabü lausikei asemthetlabü.