Read Chang Naga ISAIA 41 Bible Online

ISAIA 41 - Chang Naga bible

ISAIA 41

¹Mühghaüei lauda, “O su shuong, kü thedanga ngüh üangko kishi; hoba mütshuong haoenei hau haanbü haptishi; haoen nyangko loutishi, sen pendou liko matjemshang to nyangko loukho!

²“Aoei chaangbou aeka che longtian hao haushanga ngühmaanglanbüei thüktian hao thedanga phang shuong haoei kuda, hoba Choba shuong thüka hao la songdaktida; haoeibü inei haoen thamngu tegü, hoba tekteksousou apan kibü youkung tegü yeitida.

³Haoeibü youei nakan achühbü to haoen shieiko thushed akiko danjung hauda.

⁴Meten shuong khangbü ka ngetiko aoei ho sakkukei hoba kümbei?

⁵“Su shuongei hapbei, hoba hatkei; haoen nyangko lotkei hoba loukei.

⁶Haoen mütpem wekoei lepbou to thuikei, hoba mütpem wekoei lulueibü jaisina to laukei, ‘Olinangko kishi!’

⁷Hibü bueibü mistriei hon yaübü thungeijangeida, hoba aoei nampem yentiko jangda haoei, ‘Ho maia,’ dogo lauko namjangboua yaübou thungeijangeida; hoba atopeitila haoei kho kojalei thüngan kangtida.

⁸“Lausikei no, O Israel, ngo khangenbou Jakob, ao ngei pienkei, Abraham lilabü küthangbou.

⁹No ngei kaodak thonbü ka leibakei, hoba ho chemnyek ka no ngakei hoba ngei ka to laukei, ‘No ngo khangenbou,’ ngei no pienkei hoba no ananglet.

¹⁰No tehüt, ngo ka yoa kia, mokde apyoko teki, aishanga ngo kaibü Mühghaü ki; ngei no hau kitilabü hoba ka to thuilabü; ngei no ngeibü saopobü mai ikei tonenlabü.

¹¹“Chühashi, no khulimbo khauang kibü shuong haoen himoulabü, hoba maangpangan apan kilabü, ka to ao tokyolaje haoen ai ayinglabü hoba maulabü.

¹²Nyi kaibü dangboulabou shuong lamasikei nyi haoen ühüplabü. Aoyouei no limbo wapyolaje ai akibü tegü kongkong yinglabü.

¹³Aieilausi ngo kaibü Mühghaü BUNYUBOU ki, aoei kaibü mae ika hatda hoba lauda, ‘Tehüt, ngei ka to thuilabü.’”

¹⁴BUNYUBOUei lauda, “Tehüt, no yangbem Jakob, O hanbü Israel, aishanga ngei ka to thuilabü, dogo BUNYUBOU, no Angthetbou, Israel Saopobouei lauda.

¹⁵Chühashi, ngei no hauh juong yembü youshou nakbü peisilei akbü haanbü che yeitilabü. Nyi shongh nopthetkulabü hoba hanbüshou la yeiko ngümnyinkulabü hoba shonghshou shuong youshou sho tegü yeitilabü.

¹⁶Nyi haoen siplabü hoba yeiei haoen soulanglabü, hoba yeishikei haoen phinnyintilabü. Lausikei no BUNYUBOUa olinlabü, hoba nyi Israel Saopobou to soneikanglabü.

¹⁷“Shalebü hoba khambüei amlanga dei lamda, hoba deilabüei haoeneibü lishang ulangtham kia; ngo BUNYUBOUei haoen to jongailabü, ngo Israel Mühghaüei haoen üpyolabü.

¹⁸Ngei shongh khongthua shumang shuong hoba pholi jenyua deikük iplabü. Ngei yam kho süngküp hoba kaolin kho dei bakshang kümlabü.

¹⁹Ngei yama cedar si akasia, hoba mürtel si oliv bulong kelabü; ngei phetsen kaoa busim si fir hoba saipres bulong liko yemtilabü.

²⁰Khei BUNYUBOUeibü ikei ho kümbei hoba Israel Saopobouei ho kümbei dogo mütshuongei haplabü hoba ngelabü, damanchühlabü hoba ditenlabü.”

²¹BUNYUBOU, Israel Chobaei hai lauda, “Kaneibü ngühsidei sungbaan lenashi, Kaneibü aukabü hau kiboutham sungba.

²²Haoen la khübü kho sungbatishi, hoba ai haüthüklaje kün la ngetiashi. Shangiedbü kümsilei shuong kün la ngetiashi, khübü kho ai khei künei kho damanchühlabü lele, hoba khübü thonshang ngela shanga; ayingsi loulabü jihsiphaia loushadlabü shuong kün la lenbü.

²³Künei kan kho mühghaü shuong dogo ngela shanga, loulabü kümsilei shuong ngetikai. Haü, kün hatbümokbüei shenlabü hoba panglangyolabü lele, maibü ayingsi amaibü dencheje küman lenashi.

²⁴Chühashi, kan ai aki, hoba kaneibü kümsilei kongkong ki; aoei kan pienlaje hao kho mangsenlabü ki.

²⁵“Ngei yungkük ka che longtia hoba hao louakei, chanyu longsilengko ka haoei ngeibü nyen ngada. Chakyaübouei shungkung kao nakeibü tegü, haoei songdakbü shuong shemkhün to nakyantilabü.

²⁶Khangbü ka künei ngelabü, dogo hoba jih asühjinei ka thama, ‘Hao tükde,’ dogo künei laulabü lele aoei kho ngetikei? haü, ngetibü ao aki, haü, tetenbü ao aki, haü, kan ka ngüh ditbü ao aki.

²⁷Ngo BUNYUBOUei shaang Zion la ngühlang ngetikei; ngei Jerusalem to hai lenla ngühlang künbou hautikei, ‘Ka mütshuong louada! Haoen chem to louada!’

²⁸Lausikei mühghaü shuong yoa ao akitei, khübü shanga damanthenan chühbü akitei, khei ngei haoen to phejinei ngüh che ongkei ajongaien.

²⁹Ditashi, haoen pendou amlangbü! Haoeneibü kümsilei kongkongbü; haoeneibü tühnyintibü heangsho shuong kho yeikong, hoba jim akibü.”