Read Chang Naga ISAIA 42 Bible Online

ISAIA 42 - Chang Naga bible

ISAIA 42

¹Chühashi, ngei khangenbou, ao ngei tonenda; ngeibü pienbü, hao to ngo olinda. Ngei ngeibü soushou hao thüka phokukei, haoei phangshuong jungto ngühmai matjem sungbalabü.

²Haoei angeklabü ayingsi hau pendouei ngühlang akulabü, ayingsi haoeibü ngühlang khonga adittilabü.

³Konan kibü thakdu che ongkei haoei apakngoklabü, hoba wankhük angko juokko kibü wanlüh che ongkei haoei anyettikulabü; ngühmaia haoei matjem longtilabü.

⁴Kaodaka ngühmai matjem aküm shongko, hoba su kaonyek shuongei haoeibü lenbü haiyeiko akishongko haoei chongachingko ajuoklabü ayingsi maang angaitilabü.

⁵Mühghaü BUNYUBOU aoei mühshuong kümbei hoba khübü sengan phokukei, aoei kaodak hoba kho ka longbü phinnyinan phokukei; hoba aoei kho thüka müt la hak hoba khonei paibüla soushou kuda haoei hai lauda.

⁶Ngo BUNYUBOUei no saopobüa ngakei, hoba kaibü ik hatlepla hoba no loman kila, hoba phangshuong ngesakbü shanga mütshuong to theyolanyobü shanga ka la kulabü.

⁷Nyekthubü shuong nyek ipbula, thüngbü shuong thüngdang ka, hoba aoyou nakthühbüa thüngshang chema setan ki haoen leishaila.

⁸“Ngo BUNYUBOU ki, kho ngeibü nyen! ngeibü soneikangbü lubü la ayingsi ngeibü nyen heangsho la ngei akulabü.

⁹Chühashi, danbü kümsilei shuong loushedakei, hoba ngei kümsilei haanbü ngetida; khübü mo alongjineitham ngei kan to khübü shanga lenda.”

¹⁰BUNYUBOU la chia haanbü che atkuashi, hoba mühthon kaothon ka hao la nyensang kuashi, yungnyu hoba khünei kibouei ngühashi, yungkoa kibü kaodak shuong hoba khünei kibü shuongei ngekashi.

¹¹Yam hoba sangnyua kibü shuong Kedara kibü sangnyu shuongei ngektiashi, haoen la shongh khu ka ngektiashi, Selaa kibü shuongei chia lautiashi, haoen la shongh khu ka ngektiashi.

¹²BUNYUBOUa haoenei soneikangbü kutiashi hoba haoeibü nyenhang kaonyeka kaang ngetiashi.

¹³BUNYUBOU kho sekbülakbü müt tegü wapyola hauda, haoei ngeklabü haü, haoei ngühlang kaang kulabü; haoei haoeibü dangbou shuong khulimbo hau yaangbüei kümlabü.

¹⁴Ngo lounyu sangsembo kia, ngo ngüh üangko kikei, hoba ngo lolo khonkuko kikei; tou ngei yaksaei nahapjinei tegü ngeklabü; ngei liko mautilabü hoba suilabü.

¹⁵Ngei shongh si shonghshou kho apbulabü, hoba haoeneibü buhekdeihek pendou lintilabü.

¹⁶“Hobaje nyekthubü shuong haoenei angebü lamnyu to leibalabü, haoenei angebü lamnyu to leilabü; haoen thedanga nakthühbü ngei ngesaktilabü, hoba kombü tangsheitham yeitilabü. Habü ho ngei kümlabü, hoba habü ho ngei akümbo aphokulabü.

¹⁷Heangsho noksa to maanglembü hoba tühnyintian kümenbü heangsho to ong, ‘Kan küneibü mühghaü,’ dogo laubü shuong haoen sepeitilabü, hoba haoen himou yaang haplabü.”

¹⁸BUNYUBOUei lauda, “Ditashi, kan obangbü shuong; chühashi, kan nyekthubü, hoba hapashi!

¹⁹Ao nyekthubü kho ngo khangenbou ong, ayingsi ngei hautibou ngeibü ngühlang künbou tegübü ao obangbü ki? Ao kü yoa haksoa ki, hao tegü ao obangbü ki? Hobaje BUNYUBOU khangenbou tegü nyekthubü ao ki?

²⁰Nyi juong hapa lausikei nyi asungletda, haoeibü noukhün yetakei lausikei haoei aditda.”

²¹BUNYUBOU hao yaangenbü ngühkhüm hoba soneikangbü yeitila shanga saopobü shanga olinko kikei.

²²Lausikei ho solangtibü hoba leilutibü mütli ki, haoen pendouei khünyeta sung sanan phokuakei, hoba thüngshang chema haoen huakei; haoen haitilabü shanga kia, hoba aoeikei, “Haoen ngaitiashi,” dogo laulabü aki.

²³Kan yoa khoto nou haanglabü, ayingsi loulabü jih shanga ngüha lelabü hoba ditlabü ao ki?

²⁴Aoei Jakob shian aptikei hoba Israel soshau soyungtikei? Ho BUNYUBOUei aying lo? ao khulimbo senei shed shonkei; hoba haoeibü lamnyua haoenei tepaikho lauda, ayingsi haoenei haoei lenbü ngühkhüm ale!

²⁵Hibü haoei haoen thükto hao khauangbü maangshat khüpan jinkukei, hoba kho haoenei aditensikei khoei haoen kaijembo wan laptikei, hoba kho haoeneibü maangpona aphosikei haoen lonan apbei.