Read Chang Naga ISAIA 43 Bible Online

ISAIA 43 - Chang Naga bible

ISAIA 43

¹Lausikei tou, O Jakob, no kümbou BUNYUBOU, hoba O Israel, no khümenbouei hai lauda: “Tehüt, aieilausi ngei no angkei; ngei no nyenshenko ngakei, no ngeibü ki.

²Dei danko no ladang haulaje, ngo ka yoa kilabü, hoba shumang danjinei haoenei no anyemlabü; ladang no wan danko pailaje, no ajuoklabü, ayingsi wanlong ka thüka alaplabü.

³Aieilausi ngo BUNYUBOU, kaibü Mühghaü, Israel Saopobou, no khümenbou ki; no angthetbü mu ngei Ijep, hoba ka jeila Ethiopia si Seba kukei.

⁴Kü thedanga no namsek hoba nyenhang yingbü ka, hoba ngei ka to sanouda buba ngei ka jeila mütshuong, hoba kaibü langkei jeila mütli kulabü.

⁵Tehüt, aishanga ngo ka yoa kia; ngei kaibü thensilen chaangbou aeka sungbalabü, hoba ka jungto chanep aeka yoshailabü.

⁶Yungthang aeto ngei laulabü, ‘Haoen litiashi,’ hoba yungkükbou to, ‘Haoen tesenet,’ dogo laulabü. Saabü ka ngeibü jayangshou shuong, hoba kaodak thonbü ka ngeibü nouyangnyu shuong leiba.

⁷Kü nyena ngabü mütpem weko, ao ngeibü soneikangbü shanga ngei küman ki, ngei hao khümenlabü, haü, ngei hao kümbei.”

⁸BUNYUBOUei lauda, nyekje yeman nyekthubü shuong, nouje yeman obangbü shuong kü jungto leiba!

⁹Phang pendou liko kamshaiashi, haoen yoa aoei ho lauan photeila, hoba shangiedbü chalou aoei sen to lenla thükkei? Haoen matmaila shanga haoen liko aukabü sungbatiashi, khei yingsije lubü shuongei ditlabü hoba laulabü, “Ho tükde.”

¹⁰Khei kanei ngelabü hoba mailemlabü, hoba ngo hao dogo ngela shanga kan ngeibü aukabü shuong hoba ngei pienbü khangenbü ki; kü thedang to ai mühghaükei ayeiko kikei; ayingsi kü phaineikei akitei dogo BUNYUBOUei lauda.

¹¹“Ngoje ngo ong BUNYUBOU ki; hoba kü to limbo khümenlabü aokei aki.

¹²Ngei lenan apyokei hoba ngei khümenkei, ngei ngetikei, hoba kan yoa küksithang mühghaü akitei, hibü kan ngeibü aukabü shuong, hoba ngo Mühghaü ki dogo BUNYUBOUei lauda.

¹³Haü, kho chalou ka ngo hau ki; hoba ngeibü ik ka sola aokei aki; ngei kümlabü hoba kho aoei sepeisaikula?”

¹⁴No angthetbou, Israelbüeibü Saopobou BUNYUBOUei hai lauda, “Kan shanga ngo Babilon to hautia, hoba linan kibü pendou khei Khaldiaa kibü shuongkei haoen olinbü yoto leiyenlabü.

¹⁵Aishanga ngo BUNYUBOU kaneibü Saopobou Israel kümbou ngo kaneibü Choba ki.”

¹⁶BUNYUBOUei lauda, haoei yungnyua haushang hoba dei yaangbü shuong danko lamnyu kümda.

¹⁷Aoei kailong si koli sepai tan hoba lakjaibü liko leian louda, haoen liko phetetda, haoen alakseplabü, haoen mauakei, haoen wanthunglüh tegü nyetakei!

¹⁸Kanei danbü kümsilei shuong tedamen, ayingsi shangiedbü kümsilei shanga daman thenan techüh.

¹⁹Chühashi, ngei kümsilei haanbü che kümlabü, toukei kho tangto longlabü; kho nyi achühenda lo? Yama lam che hoba phetsen kaoa shumang che ngei kümlabü.

²⁰Khongthua meisiau shuong selong hoba ostrik shuongei ngo hangenlabü. Aieilausi kü mütli hoba ngei pienbü shuong la yunglabü kula shanga ngei yamlamanga dei hoba phetsena shumang shuong kuda.

²¹Mütshuongei ngeibü nyensang phinthonla shanga kü shanga ngei haoen kümbei.

²²Khei yingasikei, O Jakob nyi ngo khambo loukei, lausikei no kü to oanapan kikei, O Israel.

²³Nyi juokbü lembü shanga kü jungto san asungba, ayingsi kaibü haitibü lembüei nyi ngo ühangen, ngei ka la shausiyung lembü akuti ayingsi jenei oan üpti.

²⁴Nyi kü la namei ai ajekku, ayingsi nyi kaibü lembü haabüei ngo senyühashemti; lausikei nyi ngo kaibü shabü shuongei onat yeitikei.

²⁵Ngo, aoei no ngeibü yingbü shanga kaibü ngühkhüm leilubü haman apbukei, kho ngo ki, hoba kaibü shabü shuong ngei adamenlabü.

²⁶Kü la damentiashi, senei liko suyojayokho, no matmaila shanga nyi weanchühko lenshi!

²⁷Kaibü shaangbü bouei shabü shonkei hoba kaibü thuseibü shuongei kü khu limbo ngühkhüm lulimkei.

²⁸Hibü ngei Chobaeibü shousi shuongeibü saopobü lemshang leilukulabü hoba ngei Jakob shedbükhaubü che, hoba Israel shabütabü che yeitilabü.