Read Chang Naga ISAIA 44 Bible Online

ISAIA 44 - Chang Naga bible

ISAIA 44

¹BUNYUBOUei lauda, “Tou ditashi, O Jakob, ngo khangenbou, hoba ngei pienbü Israel.

²BUNYUBOU no kümbou, aoei no nyusema kümbei, hoba aoei ka to thuila haoei hai lauda: Tehüt, O Jakob, ngo khangenbou, hoba ngei pienbou, no Jeshurun.

³“Aieilausi dei lako kibü kaonyeka dei hoba kaolin thüka shumang shuong ngei khüpan jinkulabü; kaibü shousi la ngeibü soushou hoba ka ka bakbü shuong la ngeibü haülabü khüpan jinkulabü.

⁴Hobaje khongthu kabü sang phatko, hoba yungko nyangko kabü willo long phatko haoen yemlabü.

⁵“Cheei, ‘Ngo BUNYUBOUeibü,’ dogo laulabü; hoba lubü cheei hao lolo Jakob nyen phonglabü; tokei cheei hao ika, ‘BUNYUBOUeibü,’ dogo dolabü, hoba Israel nyen phonglabü.”

⁶BUNYUBOU, Israel Choba, Thükenbou BUNYUBOUei hai lauda: “Ngo shaangbou hoba thonbou, hoba kü to liman lubü Mühghaü aki.

⁷Kholonga ngo phatko lubü ao ki? Haoei kho phinthonashi hoba kü thedanga ngekletashi, shangied ka ngei kümbü aoei lenenkei, ayingsi loulabüa sühko shangabü aoei tetenla thükkei? haü, tokei ai loushedla ki haoen la tetentiashi.

⁸Kan telüh hoba tehüt. Ngei ho aphinthon lo hoba mietshangieda thama ateten lo? Kan ngeibü aukabü shuong ki. Kü to limbo lubü Mühghaü aoche kilao? Haü, lubü Laangnyu aki; ngei che ongkei angekei.”

⁹Heangsho noksa kümbü shu- ong pendou amlangbü ki, hoba haoenei thanbü peisilei shuongei ku akulabü. Haoen shanga laukubü shuong pendou nyekthubü; haoen ühüpangebüa himou ki.

¹⁰Aoei heangsho noksa kümda ayingsi ai apailetlabüa tühnyintibü heangsho noksa kümda?

¹¹Chühshi, hao hoba haoeibü peisilei shuong pendou himou bautilabü; aishanga heangsho kümbü shuong kho lubü aying lausikei müt ong ki. Haoen pendou liko kamshaian lotiashi; haoen mokde apyolabü hoba himou shaulabü.

¹²Namyaübouei namkung at sungenan kümda, hoba wankaka juokda; hoba namjangjinei noksa longtida, hoba kho haoeibü hau kibü phemei janga. Kho phaia hao mühei haida hoba haoeibü hau khümda; haoei dei ayunglonga hao semthetda.

¹³Bueibü mistriei takbü lüh kho jenda, pencilei seida, rendaei kho thuan yentida, kompasei takletbü kho longtida hoba kho müt phatko khunakshousi hemaisaomai phatbü kho chema tentian phola kümda.

¹⁴Mütei cedar bulong akda ayingsi busim bulong ayingsi yembu long sungbada, ayingsi müt shanga jiklabü bu jungeilabü BUNYUBOUei kebü hoba langei chingtibü yama kibü bulong at to hatyolangda.

¹⁵Kho phaia ho müt shanga jiklabü bu la yeida; hoba haoei kho at sungan hao lolo lematida, haü, haoei khonei wan sapda hoba wentek ngouda. Lausikei tokei haoei mühghaü kümda hoba kho lemda; haoei heangsho noksa kümda, hoba kho to khüpetda.

¹⁶Kho haoei jamde wana jikda hoba kho wan metbüa haoei phe ngoushauda hoba senyühshemda. Haoei wan kangan sungda hoba lauda, “Aha, ngo lemakei! Ngei wan hapa!”

¹⁷Hobaje haoei joubü khoei haoeibü heangsho mühghaü che kümda; haoei kho thedanga khüpetda hoba lemda. Haoei khüto welauda hoba lauda, “Ngo khümenashi, aieilausi no ngeibü mühghaü ki!”

¹⁸Haoenei angeda ayingsi haoenei aditenda; aieilausi haoenei ühüpla shanga haoeneibü nyek hoba haoenei aditenla shanga haoeneibü maangpon khinkuakei.

¹⁹“Ngei kho jamde wana jika, haü, tokei ngei kho wankak thüka wentek kanga; ngei phe ngoua hoba kho shaua; hoba joubüei ngei mangsenlabü peisilei che kümlep lo? Buthem che to ngei khüpetan lemlep lo?” dogo laula aoeikei daman achüh hoba aolakei hapbüngebü ayingsi ditenbü aki.

²⁰Hao tap shauko kida, khüpbülangbü maangponei hao ayinglam to leilangkei; hao jembukei khümenla athük, ayingsi, “Ngei amlangbü chenei hatlepakei,” dogo laulakei athükda.

²¹BUNYUBOUei lauda, “Habü ho damenashi, O Jakob, hoba ngo khangenbou O Israel! ngei no yeitikei, no ngo khangenbou ki; O Israel, ngei no amaalabü.

²²Ngei kaibü ngühkhüm lulimbü kho deihak tegü, hoba kaibü shedbüshabü shuong sangmei tegütham haman apbua. Kü jungto sepeiashi, aishanga ngei no angtheda.”

²³Chia lauashi, O kan müh shuong, aieilausi BUNYUBOUei ho küma; Kaang ngekashi, O kaonyu maang. Chia atla khangashi, kan shongh shuong, kan yamlamang hoba khünei kibü bulong shuong pendou, aishanga BUNYUBOUei Jakob angtheda, hoba Israela hao soneikanglabü.

²⁴“Nyusema no yeitibou, BUNYUBOU, pendou kümbouei hai lauda, Ngo BUNYUBOU pendou kümbou, ao mütpemei müh sengan phokuda hoba kaodak yamutham phokula kü yoa ao kikei?

²⁵Aoei seibüyaübüei tetenbü kongkong, hoba thusei ngüh laubü shuong langetangbü tegü yeitida, songbüdobü mütshuong ange ühüpbüla yeitida.

²⁶Lausikei hao khangenbüeibü ngüh kaangngaitida, hoba haoeibü ngühlang künbü shuongei tetenbü haüthüktida; Jerusalem shanga, sao to toukei müt kilabü, hoba Jihuda sangnyu shuong shanga haoen sang sangngaitilabü hoba haoen leilubü shuong kho ngei phonlabü.

²⁷Aoei yungnyu haübü to ulangtham apashi, hoba kaibü shumang pendou haptikulabü dogo lauda.

²⁸Aoei Sairas shanga, ‘Hao ngeibü sanlombou,’ hoba ngeibü maangangbü pendou haoei haüthüktilabü; haoei Jerusalem shangabü, ‘Sao kümetlabü,’ hoba lembüchem shangabü, ‘Ho chemshang huongenlabü’ dogo laulabü.”