Read Chang Naga ISAIA 45 Bible Online

ISAIA 45 - Chang Naga bible

ISAIA 45

¹Hai, BUNYUBOUei haoei naangenko pienbü maeaenei ngei hatlepan kibü Sairas to hao thedanga phang shuong leiyenla hoba Choba shuong shembe sengkula, hoba hao thedanga koukhüm ipbula hoba bakhün akhinko kilabü dogo lauda.

²“Ngo ka thedang to haulabü, hoba khüpkhüp khongkhongbü lenglengtham yeitilabü; ngei chinam koukap shuong netla yeiko leilutikulabü hoba nameibü thangtet wapthetkulabü.

³Hobaje ngei ka la nakthühphanga kibü nyaksinam shuong, hoba huphanga ühüpbo kibü nyaksinam shuong, khei Israel Mühghaü aoei no nyenshenko ngada, nyi BUNYUBOU dogo ngela shanga kulabü.

⁴Aishanga no khangenbou Jakob shanga hoba ngeibü pienbü Israel ngei no nyenshenko ngada; nyi ngo angesi dogokei ngei kaibü nyen nyenkua.

⁵“Ngo BUNYUBOU ki, hoba lubü aokei aki; kü to limbo lubü Mühghaü aki, Nyi ngo angeko kiasikei ngei ka la shembe kaikulabü,

⁶khei chaang chanep ka kü to limbo lubü aki dogo haoenei ngela thükkei. Ngo BUNYUBOU ki, hoba toukei lubü aokei aki.

⁷Ngei ngesakbü yeitida hoba nakthühbü kümda, ngei naangmaibü sungbada hoba amaibükei longtida, ngo BUNYUBOUei habü pendou kümda.

⁸O müh shuong, thükae ka khüpan yantikushi, hoba sangmei shuongei saopobü jonan yantikushi; khümenbüa mai hekla kaodakei ipashi, hoba haoei saopobü liko longtilabü lele yeitishi, ngo BUNYUBOUei ho kümbei.”

⁹Aoei Kümbou to hoba chakei chakyaübou to tokyoda hao ügütü. Chak yaübou to shungkungei, “Nyi ai kümda?” dogo ayingsi kaibü kümsileiei, “Hao la ik ayembei si,” dogo lauda sai?

¹⁰Aoei bou che to, “Nyi aila ngo yaükei?” dogo, ayingsi nyu to, “Nyi ai bukkei?” dogo laulaje hao ügütü!

¹¹Ho Kümbou BUNYUBOU, Israel Mühghaü Saopobouei lauda: “Loulabüa loushedlabü kümsilei shuong shangabü, ayingsi kü shousi shuong shangabü kü to pheda si, ayingsi ngeibü ikküm ikelei shangabü kü la ngühkhüm kuda si?

¹²Ngei kaodak kümbei hoba khonei kibü müt kümbei. Ngei kü ikei mühshuong pintikei, hoba khübü tan pendou ngei lin küman phokukei.

¹³Ngei ngeibü saopobüa Sairas phonenlabü: ngei haoeibü lamnyu pendou tangshaitham yeitilabü. Haoei ngeibü sangnyu kümlabü, hoba ngeibü langsenbü shuong dongebü thua phokulabü, mu shanga ayingsi jongsak pailetla shanga aying, dogo Thükenbou BUNYUBOUei lauda.”

¹⁴Ho hai BUNYUBOUei lauda: “Ijep nyaksinam shuong hoba Ethiopia namyaknamsei shuong, hoba süngsilop maibü Sabea shuong ka jungto loulabü, hoba haoen kaibü yinglabü; haoen ka phainei haulabü, khei namlühei khühan haoen loulabü. Haoenei ka to khüpetan hainyu lauko sulajalabü: ‘Maimaitham Mühghaü ka yoa kia, hoba lubü ao aki; lubü mühghaü aki.

¹⁵Maimaitham no no lolo hubou Mühghaü, O Mühghaü hoba Israel Khümenbou.

¹⁶Heangsho kümbü shuong himou baulabü; haü, haoen liko nyenshedkhün to atlabü.

¹⁷Lausikei Israelbüje BUNYUBOUei ponpen athonbü khümenbüei khümenlabü; no ladangkei ihimoutilabü ayingsi nyenshedkhün to üettilabü.’”

¹⁸Aieilausi mühshuong kümbou BUNYUBOUei hai lauda, hao Mühghaü ki; kaodak yeitibou hoba kho kümbouei kho khangenyaüenkei, haoei kho amlanga aküm lausikei haoei kho müt kila yeitikei; “Ngo BUNYUBOU ki, hoba lubü ao aki.

¹⁹Ngei huphang nakthüha kibü kaodak chenei kho alau; ngei Jakob shousi shuong to, ‘Amlanga ngo lamshi,’ dogo alau. Ngo BUNYUBOUei ai tükde kho lauda, hoba ai ngühmai kho lenda.”

²⁰BUNYUBOUei lauda, “Kan lolo kamshaiashi, hoba kaiya; liko nyangko kaiya, kan jouletbü phang shuong. Bu ka jakenbü heangsho jungbü shuong haoen hapbü ngebü songsido aki, hoba khümenla athükbü mühghaü to welauda.

²¹Haoenei liko damanchühtiashi, kho phaia sen la haoenei nalena; hoba kho aukabü sungbatishi; aoei shangied kho, hoba piaboua ho lenan apyokei? Kho ngo BUNYUBOU aying lo? Hobaje kü to liman lubü Mühghaü, saopobü Mühghaü che hoba Khümenbü che aki; kü to liman aokei aki.

²²“Kü jungto sepeiashi hoba kan khümenan kishi, kan kaodak thonbü pendou; aieilausi ngo Mühghaü ki, hoba lubü ao aki.

²³Ngei ngo lolo thedalanda, kü sembung ka ngühmai longa hoba kho nopjung alongeilabü, khei kü to youkük pendouei khüpetan lemlabü, lishang pendouei theletlanletlabü.

²⁴“BUNYUBOU la ong ngühmai hoba hau kia, hao jungto ong mütshuong louda; hoba hao khulimbo khauangbü shuong himou baulabü.

²⁵BUNYUBOUa Israel shousi pendou matmailabü, hoba soneikanglabü.