Read Chang Naga ISAIA 46 Bible Online

ISAIA 46 - Chang Naga bible

ISAIA 46

¹“Bel khüpjung kouda, Nebo phaangjung kouda! Haoeneibü heangsho meisiau shuong la on kho phokua. Kanei künan paibü on shuong, onat künbü hübümangbü meisiau shuong la thongtia.

²Haoen phangjung kouda, haoen liko khüpjung kouda; haoenei on kho sungenla athük, lausikei haoen lolo thüngshang to hauda.

³“Kü to nou haangashi, O Jakob chemdang, hoba jouan kibü Israel chung pendou, aoyou ngei nyusem ka shia künan bukbü sühko thounoukei.

⁴Hobaje khei baushi sinko ngo toukei khei ong kia, kan khu athu shongko ngei kan künlabü, ngei kan küma hoba ngei thounoulabü, ngei buklabü, hoba ngei püetlabü.

⁵“Kanei ngo ao to jetei yeitila hoba ao to phatyotila? Ao to kanei ngo takteiyola?

⁶Aoyouei nyingkou ka hon hakletda, hoba chandinam seret hauda haoenei hon jungda hoba haoenei mühghaü yaükuda, hoba kho thedanga khüpetda, hoba khüto lemda.

⁷Haoenei kho phak to tonan jinan jungan hauda, hoba hao kishanga phokuda, hoba hao kishang ka atopeiko kida. Müt cheei hao to ngekko ngasikei haoei ajongailabü, ayingsi haoeibü khonku ka hao apüetlabü.

⁸“Ho damenashi, ho shanga damanchühashi, nyibou kho maangpon to lottiashi, kan ngühkhüm leilubü shuong.

⁹Shangiedbü kümsilei shuong damenashi; aieilausi ngo Mühghaü, hoba lubü ao aki; ngo Mühghaü, hoba ngo tegübü lubü ao aki.

¹⁰Aoei khangbü ka thonbü sühko hoba pihangbouhang ka akümbo kibü shanga lauda, aoei ngeibü kümthen haüthüktila hoba kü thea maibü pendou ngei kümlabü dogo lauda.

¹¹Chaang aeka ngei ausangyuksang che hoba ngeibü kümthen shanga kaonyek saabü ka müt kho ngada; haü, ngei laua, ngei tokei kho haüthüktikulabü, ngei maang anga ngei tokei kho kümlabü.

¹²“Ngeibü ngüha leashi, ngühmai ka lounyu bangan kibü kan maangpon kaangbü shuong.

¹³Ngei ngeibü saopobü nyangko sungbada, kho asaakei; hoba ngeibü khümenbü aphailabü. Hobaje ngei Ziona Israel ngeibü soneikangbü shanga khümenbü phoyokulabü.”