Read Chang Naga ISAIA 47 Bible Online

ISAIA 47 - Chang Naga bible

ISAIA 47

¹BUNYUBOUei lauda, “Kaiyena, hoba thamngua setashi, O saosüngbü, O Babilon Nouyangshou shuong; aieilausi touje ka to nyemnyemtham hoba inyaitham dogo alaulabü.

²Nitbü laang sungashi, hoba shausiyung nitashi; nyi yukbü nei sungenashi. Kaibü nei loubü hangletashi, teküplet, yungnyu shuong danko hauashi.

³No mütkong kibü aküpletlabü, haü, himou haplabü. Ngei phoklamlabü; ngei aokei ajoutilabü.”

⁴Sen Angthetbou, Thükenbou BUNYUBOU kho hao nyen ki, hao Israel Saopobou ki!

⁵BUNYUBOUei Babilon to lauda, “No ngüh üangko setshi, hoba nakthühshang to atashi, O Babilonbü Nouyangshou; aieilausi touje ka to sangle shuongeibü Chobasao dogo angalabü.

⁶Ngo kü mütli yoa khauangko kikei hoba ngeibü phet shatia; hoba khübü kho kaibü ik to kua hoba nyi haoen to üeisanou alen. baushilamtobü la mangkei nyi kaibü buleng atsheibü jinkukei.

⁷Hobaje nyi laukei, ‘Ngo ponpen yaangenbü sao che kilabü.’ Khei yingbü khoei nyi habü kümsilei kaibü maangpona thanan apho ayingsi haoeibü thonbü ai yinglaje damanachüh.

⁸“Hibü tou ho ditashi, no lemsilang sanoubou, asangadoko kibou hoba kaibü maangpona, ‘Ngo kia, kü to limbo lubü ao aki. Ngo ladangkei latnyu la leko akilabü, ayingsi shousi shuong maubü ngei angelabü,’ dogo lauko akilabü.

⁹Lausikei nyetchenei ong shousishuong maubü hoba latnyu la yeian kibü ham ka jungto loulabü, kaibü seibüyaübü juong hoba kaibü shedsikhau ngüh yaangbü juong kiasikei khübü kho souko ka jungto loulabü.

¹⁰“Aishanga nyi kaibü amaibü huona maanglembei, hoba nyi laukei, ‘Aoeikei ngo ühüpda,’ kaibü songeidoei hoba kaibü hapbü ngebüei no ayinglam to leikei, hoba nyi kaibü maangpona laukei, ‘Ngo kia, hoba kü to liman tokei ao aki.’

¹¹Hibü ka to amaibüei sühlabü hoba nyi kho apbula sei ai angelabü; hoba maulabüei ka to sühlabü, nyi kho apbula athüklabü hoba hakde nyi angebü leilubü ka to sühlabü.

¹²Tou kaibü seibüyaübü khüksiuok kümsilei hoba khopjikseibü dan yoa no heshoudang ka kümjung loubü yoa laushi. Ai ngenyu nyi thük hapla thükkei, aingenyu nyi hatlamoklabü kümla thükkei.

¹³Kaibü ngühsongwanbü juongei no oan apakei! Tou mühhaang tetbü shuong si khanshoulitshou to chühbü shuong hoba ka la lit weko thu lenbü shuong haoen lotian no khümentishi.

¹⁴“Chühashi, haoen youkung tegü kilabü; wanei haoen lonlabü, wanlong sei ka haoen lolo akhümenlabü Ho lemako kanglabü wankak che ayinglabü ayingsi nyangko setlabü wan che ayinglabü.

¹⁵Ainei nyi haujembo kümbei kho tegü ka shanga kilabü, aoyouei ka yoa no heshoudang ka seiyotakyoko loukei, haoen mütpem weko lulu lama shoongailabü; no khümenla ao akilabü.”