Read Chang Naga ISAIA 48 Bible Online

ISAIA 48 - Chang Naga bible

ISAIA 48

¹O Jakob mütli, ao to Israel nyenei ngada, hoba Jihuda lin ka pakkei, aoei BUNYUBOU nyena theyolanyoda, hoba Israel Mühghaü nyen phongda, lausikei ngühmaia ji, ayingsi saopobüa aying, kanei ho ditashi,

²aishanga kanei kan lolo saopobü sangnyu mütli dogo ngada hoba Israel Mühghaü to nongda, Thükenbou BUNYUBOU kho hao nyen ki:

³“Shangiedbü kümsilei shuong shanga ngei mietshangied ka ngetia, haü, khübü kho ngeibü sembung ka longkei, hoba ngei haoen to lenkei, hakde ong ngei khübü kho kümbei, hoba khübü kho haüthükkei.

⁴Aieilausi kaibü maangpon tubüsekbü hoba kaibü ngümlüh nameibü hoba kaibü khüngja chinam dogo ngei ngekei.

⁵Hibü ngei mietshangied ka ka la ngetikei, khei, ‘Ngeibü heangshoei khübü kho kümbei, ngeibü buei jakenbü heangshoei haoen la sakkukei,’ dogo nyi laubüla dogo kho ühaüthükjinei ngei ka la lena.

⁶“Kho nyi dida; ho pendou haüthükbü chühashi. Kanei ho shanga aukabü alelep lo? Kho chalou ka khei huan kibü nyi angeko kibü ka la kümsilei haanbü lena.

⁷Haoen tou kümbü ki, mietshangied ka aying; ‘Chühashi, ngei habü ho ngeakei,’ dogo nyi laubüla dogo ho chalou thedangtoje nyi aditko kikei.

⁸Nyi ditkei adit, ngekei angeko kikei; mietshangied ka thama kaibü nou aipbo kikei. Aieilausi nyi aeibou lepbolangko jungeikei; bukjinei ka thama ngühkhüm lulimbou dogo ngei ngekei.

⁹“Kü nyen laüa ngo khauangbü thetian kilabü; hoba ngeibü nyensang nyenhang shanga ngei no wapan üplabü laüa ngei ka ka senetan kia.

¹⁰Chühashi, ngei no koshiktikua, chandinam tegütham ayingsikei; yaüshem wanlong ka ngei no pienkei.

¹¹Kü laüa, haü, kü nyen laüa, ngei ho kümda. Aieilausi lai küman ngei kü nyen shatila? Ngei ngeibü soneikangbü mü la akulabü.”

¹²BUNYUBOUei lauda, “Kü ngüha leashi, O Jakob, hoba Israel, ngei ngabou: ngo hao ki; ngo büngbou hoba shembou ki.

¹³Haü, ngeibü ikei kaonyu chemshang yaükei, hoba ngeibü mae ikei mühshuong pintikei; ngei haoen to ladang ngalaje haoen liko loda.

¹⁴“Kan lolo kamshaiashi, kan pendou, hoba ditashi: Laobou heangshoei habü ho ngetikei? BUNYUBOUei ao to sanoukei hao danko haoei Babilon khulimbo kümlabü; haoeibü ikok Babilonbü khulimbo kilabü.

¹⁵Ngei, khei ngei joyoa, haü, ngei hao ngakei. Ngei hao leibalabü, hoba haoei haoeibü lamnyua thüksimin haplabü.

¹⁶“Kan kü jungto nyangko kaiya hoba ho ditashi: Bünglakhangla ngetijineithama ngei huphanga alau, ho haüthükjinei thama ngo khünei kia.” (Hobaje tou Thükenbou BUNYUBOU Mühghaüei ngo haoeibü Soushou seia hautikei.)

¹⁷Hai BUNYUBOU, no angthetbou, Israel Saopobouei lauda: “Ngo BUNYUBOU kaneibü Mühghaü ki, aoei kan to pailetbü shanga lenda, hoba kan haujan lamnyu kan la shean lenda.

¹⁸“Kanei ngeibü ngühkhüm shuong ditkei laubü tegüje, kaneibü sangmai shumang che tegü kikhoulabü! Hobaje kaneibü haülabü deinyu yungsen tegü kikhoulabü.

¹⁹Tokei kaibü lilabü phetsen tegü hoba kaibü shousi thamngu tegü kikhoulabü; kü thedang ka haoeneibü nyen wapan üpbo ayingsi amautiko kikhoulabü.”

²⁰Babilon apyoashi, Babilonbü ka satashi! Chia laubü ngühlangei ngekashi hoba ho ngetiashi. Ho kaonyu thonbü pendou to hautiashi, hoba lauashi: “BUNYUBOUei hao khangenbou Jakob angtheda!”

²¹Hobaje haoei haoen phetsen kaodak danko leian haujinei haoen dei ala; laangnyu ka haoei haoen shanga dei koutikei; haoei laang paknyintikei, hoba ongjung longkei.

²²“Amaibou shanga hakso aki,” dogo BUNYUBOUei lauda.