Read Chang Naga ISAIA 49 Bible Online

ISAIA 49 - Chang Naga bible

ISAIA 49

¹Ngeibü ngüha leashi, O kan su shuong; ditashi kan kaonyek saabüa kibü mütshuong: BUNYUBOUei ngo nyusema kian thama ngakei; künyueibü shimung ka haoei ngeibü nyen ngakei.

²Hobaje haoei ngeibü sembung in akbü tegütham kümbukei, haoeibü yemekoubü ikmaanga haoei ngo hutikei; haoei ngo simbü laujin tegü lamlean lauphota hukei.

³Haoei kü to laukei, “No ngo khangenbou Israel, ao to ngo soneikanglabü ki.”

⁴Lausikei ngei laukei, “Ngei amlanga kümbo hükei; ngei ngeibü hau kongkong hoba jim akibüa apa.” Khei yingsikei ngeibü matjem BUNYUBOU yoa kia, hoba ngeibü pailetbü kü Mühghaü yoa kia.

⁵Tou BUNYUBOU, aoei nyusem ka hao khangenbou yeila ngo kümbei, haoei Jakob jungto sepeinyu sungbalabü, hoba Israel jungto leishailabü dogo lauda, aieilausi ngei BUNYUBOU thedanga soumo hapakei, hoba kü Mühghaü ngeibü hau yeiakei.

⁶Haü, haoei lauda, “Jakob phangshuong longtila, hoba jouan kibü Israel nyibou kümetlabü ho ka shanga yongko songokbü ki. Hibü ngeibü khümenbü kaodak thonbü sühko sungbala shanga ngei no Küksithang shuongeibü ngesak yeitilabü.”

⁷Angthetbou BUNYUBOU, Israel Saopobouei lauda, mütei awealaubou to hoba phangei mangsenbou to songdakbü shuong khangenbü shuong to hai lauda: “Choba shuongei haplabü hoba loenlabü, Choba shousi shuongei kho haplabü hoba haoenei soumoa khüpetlabü.” Aieilausi BUNYUBOU, ao maanglemenbü Israel Saopobou ki haoei no pienkei.

⁸BUNYUBOUei hai lauda, “Ngeibü maangshikbü chaloua ngei ka to jongailabü; hoba khümenbü chaloua ngei ka to thuilabü; hoba ngei no amenlabü hoba mütli shanga theyolanyobü che ngei ka la kulabü, khei nyibou kaodak kümetla hoba inletan kibü phetphana haoen kitila shanga;

⁹thüngbü shuong to, ‘Longan apashi,’ hoba nakthüha kibü shuong to, ‘Ngesakbü to longashi!’ dogo lenla shanga. Haoenei lama lamshaulabü hoba shongh khu khongthu pendou kho haoen lamshaushang kilabü.

¹⁰Haoen mühei ühailabü ayingsi dei alalabü, tokei haoen aubü ayingsi chanyu juokbüei ühaitilabü. Aieilausi haoen to üeisanou dambouei haoen leilabü, khei dei pakshang shuong nyangko haoei haoen lomlabü.

¹¹“Hobaje ngeibü shongh lam pendou lam che ong yeitilabü, hoba ngeibü lamkhong yaangtilabü.

¹²Chühashi, khübü kho saabü ka loulabü, hoba chühashi, khübü kho yungkük ka hoba chanep ka hoba khübü kho Aswan kaonyek ka loulabü.”

¹³Chia lauashi, O müh shuong! olinangko kishi, O kaonyu! ngüh longko chia lauashi, O shongh shuong! Aishanga BUNYUBOUei mütli solotida hoba haoeneibü khonsak khonkubü thüka maangpona sanou dambuko kilabü.

¹⁴Lausikei Zionei laukei, “BUNYUBOUei ngo inleda, BUNYUBOUei ngo maanapakei.”

¹⁵Hibü BUNYUBOUei jongaida, “Nyuei senyopbü jayangshou maalep lo hoba saoei bukbü shou to sanouko adamlep lo? Saoei maan apa tegükei ngeije kan amaalabü!

¹⁶Chühashi, ngei ngeibü ikmaanga kan shanjinakei, kaibü kümthang shuong athakko kü thea kia.

¹⁷“No kümetlabü mütshuong panteiko louada, hoba no leilutibü shuong ka jungka suklabü.

¹⁸Kaijembo to kaibü nyek longan chühashi; ho pendou haoen lolo liko kamshaida, hoba ka jungto louda. BUNYUBOUei lauda, ‘Ngo ki shongko nyi habü pendou chisiyak tegü lelabü; hoba nyi chem kannyu tegütham no lolo habüei shembe kailabü.’

¹⁹“Kaibü leilunyu apbü hoba sangliphang kaonyek hoba kaibü leilubü kaonyek shangabü kho maimaitham touje mütli shanga aeibou nyunyeman kilabü, hoba no suibü shuong kho saabüa thinei kilabü.

²⁰No yen la lean kibü thua bukbü shousishuongei toukei kaibü noua thenan laulabü, ‘Kün kila shanga ho kaophei yongko nyonyemakei; kün kila kaoen kuyoshi!’

²¹Kheijinei nyi kaibü maangpona laulabü, ‘Habü shousi kü la aoei bukkukei? Ngo shousiei kongan hoba angkong kiteikei; ngo langsenan hoba inletan kiteikei. Habü ho aoei pangteikukei? Chühashi, ngo boupem apyoan kikei; lausikei habü ho lakabü?’ ”

²²BUNYUBOU Mühghaüei hai lauda: “Chühashi, ngei ngeibü ik phangshuong thük to shinglabü, hoba mütshuong la ngeibü nisan tonenkulabü; hoba haoenei kaibü jayangshousi shuong haoeneibü khukua baman, hoba kaibü nouyangshousi shuong haoeneibü phaka jenan loulabü.

²³Hobaje Choba shuong no lombou boushuong yinglabü, hoba haoeneibü Chobasao shuong no thounoubü nyusi shuong kilabü. Haoenei thenyek kaoei yeian ka to khüpetlabü; haoenei kaibü you kabü thamngu selabü. Kheijinei nyi ngo BUNYUBOU dogo ngelabü; hoba aoyouei kü to maanglem pholaje haoen himou abaulabü.”

²⁴Thükenbou ka haitila kibü solangla thüklep lo, ayingsi ngühmai langsenbü shuong khümenla thüklep lo?

²⁵Lausikei BUNYUBOUei hai lauda, “Haü, langsenbü shuongkei lakoubü shuong ka sunglanglabü, hoba sekbülakbü müt ka haitila kibü songailabü. Aishanga kaibü dangbou to ngokei danglabü, hoba kaibü shousi shuong ngei khümenlabü.

²⁶No khonkutibü shuong la ngei haoeneibü phe shautilabü; hoba haoen haoeneibü siiei ihei tegü jaaktilabü. Kheijinei khunakshousi pendouei, ngo BUNYUBOU, no Khümenbou, no Angthetbou hoba Jakob Hauyaangbou dogo ngelabü.”