Read Chang Naga ISAIA 5 Bible Online

ISAIA 5 - Chang Naga bible

ISAIA 5

¹Ngei sanoubou shanga, haoeibü semlüh sek shanga ngei sanoubü chia ngei laukho. Ngei sanoubou kaomai kibü shongha semlüh sek che kikei.

²Hobaje haoei kho kaijembo khün thuan laang hean apbei, hoba semlüh maibü kao khünei kekei, hoba kho sekjia dip che dangkei, hoba tokei khünei semlüh hek ngünshang kümbei; hoba khoei semlüh hek hekkulabü dogo haoei maanglem kikei; lausikei khoei yamkabü semlüh hek hekkukei.

³Hibü tou, O Jerusalem bukmüt shuong hoba Jihudabü mütshuong, ngei sudajada, ngo hoba ngeibü semlüh sek kanglanga mat jembushi!

⁴Ngeibü semlüh sek shanga ngei ai kümbei ho to aei tokei ai kümla? Khülonga, aila semlüh hek hapla maangleman kijinei haoei yamkabü semlüh hek hekkukei?

⁵“Hibü tou, ngeibü semlüh sekei tokei ai kümla kho ngei kan la lenkho; kho ka ngei jakba lühan aplabü, hoba kho mei la au la shaukhümtilabü.

⁶Hobaje kho ngei apmeilang lelabü, kho yotan üplabü ayingsi kütko amoulabü; lausikei khünei jak angbü bushem hoba jaklong yemtilabü; toukei lang ayantila sangmei la ngühkhüm kulabü.”

⁷Aishanga lakjaibou BUNYUBOUei semlüh sek kho Israel chung hoba Jihudabü mütshuong kho haoei olinangko kibü dan. Haoei ngühmaanglanbü lambei, lausikei sii phinbü to chühashi, saopobü lambei, lausikei ngekyobü to chühashi.

⁸Kan aoyouei kaonyek jenyua kan mütpem touje kishang akilabü lele chem che thüka che thenan hoba sek chenei che phopan jungeida, ügütü!

⁹Ngeibü noua lakjaibü BUNYUBOUei laukei, “Maimaitham chem juong, chem yaangbü hoba hemaibü, litham müt akiko yeilabü.

¹⁰Aishanga semlüh sek sekphai an ka takyang an kheilabü, lilabü takbü chenei ngongkam che sunglabü!”

¹¹Aoyou ngeyang enyu ih lambo pida, aoyou nangnak ihei ajaakshongko khüpda haoen shanga ügütü!

¹²Hobaje haoenei lemalanga kongkin tuokbü kongkin kümthung metjin kia, lausikei BUNYUBOUeibü kümsilei ayingsi haoeibü ikei kümbü kümsilei shuong shanga haoenei daman achühda.

¹³Hibü haoen hapbüngebü songsido akibü haangshong kü mütli thüngshang to hauakei, hoba haoeneibü yaangenbü shuong mühei haiyetnyu kia, hoba haoeneibü imyam deilaei hakshemda!

¹⁴Hibü molowanei jembü maangdak yaang yoan takletbü akiko jembü sembung ipbei, hoba haoeneibü soneikangbü hoba haoeneibü tan hoba haoen yoa lemenyobü shuong khüto yanda.

¹⁵Hibü takübü mütshuong khüpetda hoba yaangenbü mütshuong senyanda, hoba müh to chühbü mütshuong hanbü la yeitida.

¹⁶Lausikei Thükenbou BUNYUBOUje ngühmaia tonenan kia, hoba Mühghaü Saopobü ngühmaia saüenan kia.

¹⁷Kheijinei san shoushouei jembü lamshaushanga tegü lamshaulabü hoba keibü shuongeibü kaoena lon shoushou shuongei lamshaulabü.

¹⁸Aoyouei shabü amlangbü lühei jangda, hoba aoyouei shabü kailong janglühei senda haoen ügütü!

¹⁹Haoeneibü kümsilei senei sosotham hapenlabü lele hautiashi, Israelbü Saopobou kümsilei kho senei ngelabü lele nyangko lottiashi hoba loutiashi dogo aoyouei lauda, haoen shanga ügütü!

²⁰Aoyouei amaibü to maibü hoba maibü to amaibü lauda; aoyouei nakthühbü to ngesakbü hoba ngesakbü to nakthühbü tegü weeida, aoyouei khauekbü to teibü hoba teibü to khauekbü tegü weeida haoen shanga ügütü!

²¹Aoyouei jembü thea songsido kibü dogo hoba jembü thea ditenbü kia dogo damda haoen shanga ügütü!

²²Aoyou ih yungla laakkei hoba nyakidei kheiyola mü to liman ki,

²³aoyouei besa shanga amaibou mat maitida, hoba shedbü akibü ka ngühmai solangda, haoen shanga ügütü!

²⁴Hibü wanlongei thon sühko lonshembü tegü hoba sang linbü wanlongei juokshembü tegü haoeneibü li nyaüan aplabü, hoba haoen chipen bungbü kho thamngu tegü kuito soulanglabü; aieilausi haoenei Thükenbou BUNYUBOUeibü ngühkhüm asunglet, hoba Israel Saopobou ngüh aweasüng.

²⁵Hibü jembü mütli shanga BUNYUBOU khau angkei, hoba haoen khulimbo haoei jembü ik shingkei, hoba haoen to ngümbei, hoba shonghei lühkei hoba haibü mang shuong kho khonga odsinot tegü kikei. Habü pendou shanga hao kha- uangbü asungngai, hoba haoeibü ik toukei tokan kia.

²⁶Hibü saabüa kibü phang chela haoei tetsida che longtikulabü, hoba kaodak thonbü ka haoen shanga teklaang metkulabü, hoba chühashi, haoen aeibou panteiko loulabü.

²⁷Haoen yoa aokei amanglabü ayingsi akühlabü, ayingsi aokei angaklabü, ayingsi ayeplabü, ayingsi haoeneibü shenjang ka shembe asenglanglabü, ayingsi haoeneibü youshang lüh aleilulabü.

²⁸Haoeneibü laujin simbü hoba haoeneibü lao pendou khü- hakei, haoeneibü koli shuong youdem laangkhüh kaangbü tegü, hoba haoeneibü kailong you mühghaü yei tegü weeilabü.

²⁹Haoen ngühbü molosaonyu tegü kilabü, haoenei molosaonyu ngühbü tegü ngühlabü; haü, haoenei ngühlabü hoba haitila kibou to toman shatlabü, hoba kho langlabü, hoba khümenlabü ao akilabü.

³⁰Hobaje khübü chaloua yungnyu ngühbü tegü haoen ngühlabü hoba müt atei kaodak to chühalonga, chühashi, nakthüh hoba maangmau onat hoba kho sangmei shuongei ngesakbü yuklepan haplabü.