Read Chang Naga ISAIA 51 Bible Online

ISAIA 51 - Chang Naga bible

ISAIA 51

¹BUNYUBOUei hai lauda, “Ngeibü ngüha leashi, kan aoyouei saopobü phai semda hoba kan BUNYUBOU lambü shuong: laobou laang ka jakenkei hoba kan püngkhün laobou ka thuenkei kho to chühashi.

²Kaneibü bou Abraham to hoba kan bukbü nyu Sara to chühashi. Ngei Abraham mütpem ong ngakei hoba ngei hao haükukei, hoba hao ka bakko haako hautikei.

³“Aishanga BUNYUBOUei Zion solotilabü; apan kibü kaonyek pendou haoei solotilabü hoba haoeneibü yam Eden tegü, hoba haoeneibü phetsen kaodak BUNYUBOUeibü bamang tegü yeitilabü, olinbü hoba olinlabü nyensangkubü hoba chia laubü ngühlang hao to haplabü.

⁴“O kü mütli shuong, nouanepbo ditashi, O ngeibü phang shuong kü la nou haangkushi: Aieilausi kü ka songlen che satlabü hoba ngeibü matjem mütshuong ngesakbü shanga phokulabü.

⁵Ngeibü saopobü nyangko louada, ngeibü khümenbü hauda hoba ngeibü ikei mütshuong mat jemlabü. Yungko kabü kaodak shuongei kü shanga haiyeiko kilabü, hoba ngeibü ika haoenei maanglemlabü.

⁶Kaibü nyek mühae chühangtiashi hoba kaodak phang aeto chühashi; aieilausi mühshuong wankhük tegü mauan aplabü; hoba kaodak neisimei tegü hanglabü, hoba aoyou khünei kida kho tegü yeilabü. Lausikei ngeibü khümenbü ponpen kilabü hoba ngeibü saopobü aleilulabü.

⁷“Ngeibü ngüha leashi kan ngeibü saopobü ngebü, kan ngeibü ngühkhüm maangpona phobü shuong, kanei mütei hakbü to tehüt; ayingsi haoenei awealaubüa maangtepang.

⁸Aieilausi phetyangei neisimei shaubü tegü haoen shaulabü hoba yangei winei shaubü tegü haoen shaulabü. Lausikei ngeibü saopobü ponpen kilabü, hoba ngeibü khümenbü meten pendou to kilabü.”

⁹Piashi, piashi! Kaibü hau sungenashi, O BUNYUBOUeibü phak; shangiedbü chaloua tegü, mietshangiedbü chalou meten shuong tegü piashi! Nyi Rahab netla yeiko wapettikei aying lo? Dragon baiko sepettikei aying lo?

¹⁰Nyi dei haübü yungnyu ulangtham üpti lo? Nyi khümenbü shuong shanga yungnyu haübüa lamnyu che ayeiti lo?

¹¹Hobaje BUNYUBOUei angthetbü sepeinyu longailabü, hoba chia lauko Zion to loulabü, hoba ponpen thon akibü olinbü haoeneibü khua kilabü. Haoen olinko hoba olinangko kila haplabü, hoba maangto shatbü hoba maangkoushembü satlabü.

¹²BUNYUBOUei lauda, “Ngei kan solotibü kho kia. Haian aplabü müt hoba müteibü shou piksang tegü yeitilabü ki; kho to hatko kilabü no ho ao?

¹³BUNYUBOU no Kümbou aoei mühshuong sengkei hoba kaodak chemshang huongkei kho nyi aila maada, hoba shieikoebüei no mautiko laujinei hao khauangbü nyi kheinyu hatko ong kikei? Shieikoebü khauang lan ki?

¹⁴Tongde yen kaoa langsenbü shuong litilabü; haoen püngkhüna atetnyu ühailabü, ayingsi hao shaueiyungei akaanglabü.

¹⁵“Aishanga yungnyu shieitaiko yungsen to hakbou kho ngo BUNYUBOU ki, Ngeibü nyen Thükenbou BUNYUBOU ki!

¹⁶Hobaje ngei ngeibü ngühshuong kaibü sembunga jinkua, hoba ladang ngei mühshuong sengtikei hoba kaodak chemshang imbei, ngei no ngeibü ikmaanga yemekoubüa hutikei hoba Zion to laukei, ‘No ngeibü mütli ki!’ ”

¹⁷Piashi, piashi! O Jerusalem, laobouei BUNYUBOUeibü ik ka haoeibü khauang longbü thung yungkei, nyi jaakbü thung yunga, hoba kho lea.

¹⁸Saoei bukbü shousi pendou yoa sao lomla ao aki; ayingsi hao samenbü shousi pendou yoa sao leiyenlabü ao aki.

¹⁹Khübü kümsilei penyi ka to haüthüka, ka yoa aoei sanouko dambukei? Leilubü hoba maubü, mühsinou hoba in, ngei lai no solotila?

²⁰Kaibü jayangshousi shuong semtheda; haoen tina minbü yao tegü khonga pendou aenei koalanga leketakei; haoen BUNYUBOUeibü khauang, kaibü Mühghaüei hakbüei shenakei.

²¹Hibü tou ho ditashi, no khonkubou hoba jaakbü müt, lausikei ihei aying.

²²Thükenbou BUNYUBOU, ka Mühghaü, aoei hao mütli shanga sukujakuda, haoei hai lauda: “Chühashi, ngei kaibü ik ka jaakbü thung, khei ngo khauang longbü phau sunga; nyi touje ho nyibou ayunglabü.

²³Hobaje aoyouei no shieikoekei haoeneibü ika ngei kho phokulabü, aoyouei ka to, ‘Kün danjung haukho no khüpetashi,’ dogo lauda. Hobaje nyi kaibü shenjang kao tegü hoba müt danla maiko khong tegü yeitikei.”