Read Chang Naga ISAIA 52 Bible Online

ISAIA 52 - Chang Naga bible

ISAIA 52

¹Piashi, piashi, kaibü hau kingaiashi, O Zion. Kaibü neisimei maibü neiashi. O Jerusalem saopobü sangnyu, aieilausi tou ka jaüan ka jungto akipbü hoba asaopobü alotlabü.

²Nyi lolo thamngu kangan apashi, piashi, O thüngan kibü Jerusalem, nyi lolo ngüma phenan kibü lüh sengashi. O langsenbü Zion nouyangnyu.

³Aieilausi BUNYUBOUei hai lauda, “Kan namton akiko yaakkei, hoba kan nam ayoko angngailabü.

⁴Aieilausi BUNYUBOU Mühghaüei hai lauda: Kü mütli shaangla Ijep to yenla lean kila yankei, hoba Assiriabüei ai ayingnyu haoen shieikoekei.

⁵‘Lausikei tou ngei hanei ai hapda?’ dogo BUNYUBOUei lauda. Aishanga kü mütli ai ayingnyu laplanga, hoba haoeneibü songdakbü shuongei haoen to phangda, dogo BUNYUBOUei lauda. Hobaje chaseko kü nyen shada.

⁶Hibü ngeibü mütliei ngeibü nyen ngelabü; hoba kho chaloua ngüh laubou kho ngo dogo haoenei ngelabü. Haü, ngo hanei kia.”

⁷Shongha aoei ngühlangmaibü künbada, aoei sangmai ngekletda, aoei maibü shangabü ngühlang sungbada, aoei khümenbü ngekletda, aoei Zion to, “Ka Mühghaüei songdakda” dogo lauda, haoeneibü you shuong lai he maikei!

⁸Ditashi, kaibü la- pheibou ngühlang, haoenei ngüh longda, haoenei liko chia lauda. Aieilausi ladang BUNYUBOU Zion to sepeinyu longailaje haoen theshuok hapyolabü!

⁹Olin angko, liko chia lauashi, Jerusalema kan nangletan kibü kaonyek shuong. Aieilausi BUNYUBOUei mütli solotikei, haoei Jerusalem angngaian kia.

¹⁰Phang pendou thedanga BUNYUBOUei haoeibü saopobü ik ong yeitilabü, hoba kaodak thonbü pendouei seneibü Mühghaü khümenbü haplabü.

¹¹Kan bangashi, bangashi, haka satashi, asaopobü peisilei aitokei temeiti! Hao jungka kan satan apashi; kan hinseian kishi, kan BUNYUBOUeibü chaksiam jungbü shuong.

¹²Aieilausi kan panteiko ohaulabü ayingsi kan hujung asatlabü, kan to shaang BUNYUBOU haulabü, hoba Israel Mühghaü kan phainei kilabü.

¹³BUNYUBOUei lauda, “Chühashi, ngo khangenbou naangmailabü, hao yaangentilabü, hoba tonenlabü, hoba aeibou thükkabou yinglabü.

¹⁴Juongei hao hapan maangpangbü tegü hao chühla lubü müt limbo, hoba haoeibü hesisao müteibü shousishuong tokei phangche aeibou leiluan kikei.

¹⁵Kho tegü haoei phang juong moktilabü Choba shuongei hao thedanga haoeneibü sembung khinlabü. Aishanga haoen la alenbü haoenei haplabü, hoba laobou haoenei adit kho shanga haoenei damanchühlabü.”