Read Chang Naga ISAIA 53 Bible Online

ISAIA 53 - Chang Naga bible

ISAIA 53

¹“Aoyouei künei lenbü to mailembei? Hobaje ao la BUNYUBOUeibü hau tang khitan lenkei?

²Aieilausi hao junga hao bunyem alibü tegü hoba kaolin kabü buli tegü yembei; haoeibü hesisao ayingsi hemaibü akitei, senei ladang hao haplaje, senei hao mangsühlabü lele hao to hemaibü akakkei.

³Hao aweasüng hoba mütei inletkei, maangshat hapbü; hoba khonsakbü to ngeyoan kibü müt; hoba mütei hao ka haoeneibü thenyek hueiko phobü tegü hao nyikuko aweasüng hoba senei hao wela ale.

⁴“Maimaitham haoei seneibü khonsak thongkei, hoba seneibü maangshat haoei künkei, lausikei Mühghaüei hao shieikoekei, hao to ngümbei hoba khonkutikei.

⁵Lausikei senei ngühkhüm leilubü shanga hao to nali thekei, seneibü shedshonbü shanga hao mang netla yeitikei. seneibü sangmai shanga hao to shieikoe sühkei; hoba hao to ngümbüei sen maian apbei.

⁶Sen pendou san tegü lam maan satkei, sen mütpem weko lulueibü lam to sepeikei; hoba senei shed shonbü pendou BUNYUBOUei hao la thongtia.

⁷“Hao shieikoekei, lausikei hao lolo semetametnyu yeikei hoba haoeibü sembung aip; haitishang to leijung haubü san shoushou tegü haoei haoeibü sembung aip.

⁸Shieikoe hoba matjembouei hao leijung satkei. Hobaje haoeibü thensilen shangabü aoei laula thükkei? Senei ngühkhüm lulimbü shanga hao langkibü kaodak ka wapan apbei; aishanga kü mütli shedshonbü laüa hao to ngümbo haitikei.

⁹Haoei thamtham ai aküm, ayingsi haoeibü sembunga khüpsilang ai akisikei haoenei haoeibü hee amaibü shuong yoa kümbukei, hoba haijinei keibü che yoa phokukei.”

¹⁰BUNYUBOUei lauda, “Khei yingsikei ngei haoeibü mang netla yeitila maangangan kikei, haoei hao khonkutikei; ladang haoei hao lolo shabü shanga lembü che kulaje haoeibü lilabü haplabü. BUNYUBOUei haoeibü salang loutiko hao ika naangmaitilabü.

¹¹Haoei hao khonkubü soushou hek haplabü, hoba maanghaiko kilabü; haoeibü songeihonei ngeibü saopobü sambüei ngühmaanglanbü juong yeitilabü, hoba haoei haoeneibü shedbü künkulabü.

¹²Hibü yaangbü yoa ngei haoeibü phejan janletkulabü, hoba hau kibü yoa haoei peisilei janletkulabü, aieilausi haoei langkei haibüa sühko kukei, hoba ngühkhüm leilubü shuong yoa lühbaka yokei. Aishanga haoei juongnyueibü shabü künkei, hoba ngühkhüm leilubü shuong shanga haoei sukujakukei.”