Read Chang Naga ISAIA 54 Bible Online

ISAIA 54 - Chang Naga bible

ISAIA 54

¹Chia lauashi, O angkongnyu, na abuknyu; chia lauko ngüh longashi, hoba kaang ngekashi, no na hapla khon akujan; aishanga chemdang yeibü yaksaeibü shousi shuong toje nyushou kibüeibü shousi juongbou ki.

²Kaibü neichem yaangngaitiashi, no kishang thangtetnei bintiashi, tejouti; kaibü janglüh lounyu senjemashi, hoba kaibü bu jaangbü hau kitiashi.

³Aishanga no maeae hoba nanae to linjung satlabü; hoba kaibü shijep shuongei küksithang shenlabü hoba sangnyu shuong lelabü, hoba sangliphanga kibü sangnyu shuonga müt kitilabü.

⁴Tehüt, no himou abautilabü. Himou baula tehüt, aishanga no ihimoutilabü. Aishanga nyi kaibü heshoudangabü himou maanaplabü, hoba no latnyula lean kibü jihsiphaia hakbü nyi touje adamenlabü.

⁵Aieilausi no Kümbou kho kaibü lao ki; haoeibü nyen BUNYUBOU hoba Israel Saopobou no angthetbou ki, hao kaodak pendou Thükenbou Mühghaü, dogo nyenlabü.

⁶Aieilausi inletbü hoba maangpon leilutibü yak phatko, at heshoudangabü yak tegütham BUNYUBOUei ngalabü, dogo Mühghaüei lauda.

⁷“Aishanga jih tuisho ngei no inletkei, lausikei onou yaangbüei ngei no nyibou leian longaikukei.

⁸Khauangko maangpokbü jiha, ngo ka ka longche shanga ngei ngeibü thenyek hukei. Lausikei ponpen thon akibü sanouei ngei ka to onoulabü dogo no angthetbou BUNYUBOUei lauda.

⁹“Aishanga kü la ho Noa chalou phatkuakei; Ngei touje Noaeibü dei kaodak to nyibou aloutilabü dogo thekubü tegü, ngei ka to khauangko amaangpoklabü, ayingsi ka to ühakla thekua.

¹⁰Aishanga shongh shuong nyaakeiasikei hoba shonghshou shuong kukasikei, lausikei ngeibü kaangbüsekbü sanou ka ka abanglabü, ayingsi hakso shanga ngeibü theyolanyobü akuklabü,” dogo ka to onoubü BUNYUBOUei lauda.

¹¹BUNYUBOUei lauda, “O Jerusalem, khonsak khonku hapbou sangnyu, yeithuyeinakei soueibou hoba hakso ühüpbou. Chühashi, ngei no namsek laangei danglabü, hoba kaibü chemshang safair namsek laangei yaülabü.

¹²Ngei kaibü koulom shuong phülem namsek laangei kümlabü, hoba kaibü bakhün karbankel namsek laangei, hoba pendou ae kaijembo laang maibüei kümlabü.

¹³“Hobaje kaibü shousi pendou la BUNYUBOUei lenlabü; hoba kaibü shousi olinbü yaang kilabü.

¹⁴Saopobüa no kümenlabü, no shieikoebü ka lounyu bangan kilabü. Aishanga no hatbümokbü ai akilabü, hoba maulabü ka lounyu bangan kilabü, aishanga kho nyangko aloulabü.

¹⁵Atei oyophetyo longtialonga, kho kü ka louda aying, aoei no khulimbo oyophetyo longtilaje hao ka thüka tuonglabü.

¹⁶“Chühashi, ngei namjangbü küma, aoei wankaka kibü wan soueida hoba kho shanga peisilei longtida toukei ngo mautila shanga leilutibü küma.

¹⁷Hobaje no khulimbo kümbü insiaubu aikei jim ayinglabü, hoba matjemshanga no khulimbo laubü lishang weko nyi yuktilabü. Ho BUNYUBOU khangenbü shuongeibü thu, hoba kü shanga haoen Saopobü ki,” dogo BUNYUBOUei laukei.