Read Chang Naga ISAIA 55 Bible Online

ISAIA 55 - Chang Naga bible

ISAIA 55

¹BUNYUBOUei lauda, “Hai, ao deilada hoba aoei nam aki, kan dei khüto kaiya; kan louan jekashi hoba shauashi, haü, kaiya, ih hoba sendei nam akuko hoba munam akuko jekashi.

²Ai wentekmai aying kho shanga aila kanei nam apda, hoba aiei maang anyemda, khünei aila eik apda? Kü to nou haangko ditashi, hoba ai maikei kho shauashi, hoba shausiyung maibüei kaibü soushou maanga maitiashi.

³“Kaibü nou haangashi, hoba kü jungto kaiya; no kaibü soushou lang kilabü, aishanga Dawid la onou lenla thekubü ponpen thon akibü theyolanyobü kan yoa ngei kümlabü.

⁴Aieilausi jih chenei ngei haoeibü mütshuong thedanga aukabü che yeitibü phangshuong leiyeibü hoba ngühkhüm kubou yeitibü tegü.

⁵Kho tegü nyi angebü nyi ngalabü, hoba nyi angebü phang che ka jungto laangjung loulabü. BUNYUBOU kaibü Mühghaü shanga, hoba Israel Saopobou shanga, aieilausi haoei no soneikangtikei.”

⁶BUNYUBOU hapenlabü lele kijinei hao lamashi, hao nyangko kijinei hao ngaashi.

⁷Amaibouei jembü lam, hoba asaopobü mütei jembü dambü apyoashi. BUNYUBOU jungto hao sepeinyu longeiashi, hoba hao to haoei onoulabü; hoba seneibü Mühghaü jungto nyibou sepeiashi, aieilausi haoei shedbü juong apbulabü.

⁸“Aishanga ngeibü dambü shuong kaneibü dambü aying, ayingsi ngeibü lamthen shuong kaneibü lamthen aying, dogo BUNYUBOUei lauda.

⁹Aishanga kaodak toje müh suokbou kibü tegütham, kho khei ngeibü lamthen shuong kaneibü lamthen shuong to suokbou hoba ngeibü dambü shuong kaneibü dambü aying.

¹⁰“Aishanga ngeibü ngüh kho müh ka lang loubü tegü hoba sepeian angaibü nindei lotbü phatkei. Haoenei kaodak la dei lakkuda hoba lilabü yemtikuda hoba pon bungtian lang hektida hoba lilabü wenbou la lilabü kuda hoba shaubou la shausiyung kuda.

¹¹Kho tegü ngeibü sembung ka satbü ngeibü ngüh kilabü, kho konga kü jungto sepeinyu alongeilabü, lausikei khoei ngei maangsühbü haüthüktikulabü, hoba ngo laobou shanga hautikei khonei naangmailabü.

¹²“Aishanga kan olinangko longlabü hoba soloa leian haulabü shongh hoba shonghshou shuongei kan thedanga lauko ngüh longlabü, hoba khongthu ushi bulong shuongei haoeneibü ik iplabü.

¹³Sang jeila fir bulong longlabü hoba jaklong jeiko mürtel bulong longlabü.”