Read Chang Naga ISAIA 56 Bible Online

ISAIA 56 - Chang Naga bible

ISAIA 56

¹BUNYUBOUei hai lauda, “Kanei ngühkhüm jungeiashi, hoba ngühmai kümshi, aishanga ngeibü khümenbü loula nyangakei, hoba ngeibü ngühmai tang khitlabü kia.

²Müt aoei ho kümda, müteibü shou aoei hanei kaangkhühtham hatlepda, aoei aleiluko jungeida, hoba amaibü ai akümbo ik senetan phoda hao haübou.”

³Ayingsi küksithang aoei jembü lolo BUNYUBOUa yoan ki, haoei “BUNYUBOUa maimaitham jembü mütli ka ngo bangtilabü,” dogo telau; ayingsi sungphatbouei, “Chüh- ashi, ngo bulong haibü,” dogo telauti.

⁴Aishanga BUNYUBOUei hai lauda, “Sungphatbou aoei Nounyet küpjemda hoba ngei mangsühbü pienda hoba ngeibü thebülanbüa kaangkhühtham kida,

⁵haoen la bousu yaksa shou shuong tokei maibou nyenshen che hoba nyen che ngeibü chema hoba ngeibü kümthang phanga haoen la ngei kulabü; ngei haoen la amaulabü ponpen kibü nyen che kulabü.”

⁶“Toukei küksithang aoyouei BUNYUBOU yoa haoen lolo yoan ki, hao to khangenla shanga hoba BUNYUBOUeibü nyen sanoula hao khangenbou yingla khei Nounyet aleilukubü mütpem weko hoba thebülanbü kaangkhühtham senetan kida,

⁷ngei haoen saopobü sangnyu to leibalabü, hoba ngeibü welaubü chema haoen olinangko yeitilabü; haoeneibü juokbü lembü ngeibü lemshang thüka sungletlabü, aishanga ngeibü chem müt pendou shanga welaubü chem dogo nyenlabü.”

⁸BUNYUBOU Mühghaü aoei Israela ayobü shuong leishaida haoei lauda, “Ngei ngeibü leishaian kibü to limbo lubü toukei leishailabü.”

⁹Kan khongthu kabü meisiau pendou kaiya hoba yamnak kabü meisiau pendou suiashi,

¹⁰haoei lauda, “Ngeibü lapheibü mütshuong haoen pendou nyekthubü songsido aki, haoen keingou! Haoenei ngongla athük manghliko phetetnyu yepmangsühda.

¹¹Haü, keishuong aeilamaeiphob, haoen ladangkei shishenan kila athük, hoba ditenla akibü kheibü sanlombü shuong ki; haoen pendou lulueibü lam to sepeijung mütpem weko lulueibü pailetbü lambo che ongkei ajouko sada.

¹²Haoenei lauda, ‘Kan kaiya, ngei ih sungbalabü, hoba sen lolo nyakideiei shentikho, hoba ngietkei tatbü tegü chalou yaangbü kilabü.’ ”