Read Chang Naga ISAIA 57 Bible Online

ISAIA 57 - Chang Naga bible

ISAIA 57

¹Saopobü shuong mauda, hoba müt aoeikei maang- pona aphoda; hoba Mühghaü to souhatbü müt ngailangda, hoba aoeikei loulabü amaibü ka saopobü ngailangda dogo daman thenan achühda.

²Hao haksoshang to atda, haoeneibü heea haoen haksoda, hao saopobü hoba tangbü lam to hauda.

³“Lausikei nyangko hito kaiya, kan seinyueibü shousi shuong hoba jajasasa shuong!

⁴Kanei aola eklenda? Ao khulimbo haakouan lishang shean lenda? Kan ngühkhüm leilubü shousi shuong hoba yepeijawebü shousishuong.

⁵Kan yembulong yoa hoba bulong ham shangbü weko phanga kan lolo khauangko laanglip kaanglanga pholia kanei kaneibü shousishuong haitian juokbü lembü kuda aying lo?

⁶Pholia laang lenglengbü yoa kaibü phejan kia, khübü kho kaibü thu ki, khübü to kaibü yunglabü lembü jonan jinkukei hoba nyi shausiyung lembü kukei. Khübü peisilei shanga sangsembo kilep lo?

⁷Shongh suokbü hoba tonenan kishanga nyi kaibü shen kümbei; khüto nyi lembü kula angkei.

⁸Koukap si thaonyu phainei nyi shensinge noksa phoda, kü ka bangan kanei lolo lubü lamentiakei, hoba anga; nyi kaibü shen yaangtia, hoba ka shanga haoen yoa theyolanyobü lea; nyi kaibü shensinge noksa chühletshanga kaibü shen mangsühda.

⁹Nyi onang jungan Choba Molek jungto haukei, hoba ponlem juong yeikei; hoba nyi kaibü youkobü shuong saabü to, khei yemsang haübü sühko hautikei.

¹⁰Kaibü lam saabüei no mangtikei, khei yingsikei, maanglem aki dogo nyi alau, nyi kaibü hau haanbü ong hapbei; hibü nyi aliti.

¹¹“Hobaje aoto no jemtenkei hoba hatbü ka nyi yepeijaweko laukei, hoba ngo adamen, ayingsi kaibü maangpona thanan apho? Khei ngei jih lounyu ngüh üangko kibü shanga nyi kü to soumo ühütko kikei aying lo?

¹²Lausikei ngei kaibü ngühmai hoba kaibü kümsilei shuong khuokenan ngetilabü, khübü khoei ka la ku akulabü.

¹³Ladang nyi ngeklaje, nyi laobou yoshaian ki khübü khoei no khümentishi; lausikei yeiei khübü kho soulanglabü; lausikei aoei kü to satenlaje kaodak phet haplabü hoba ngeibü saopobü shongh phet phanlabü.”

¹⁴Hobaje ho hai laulabü, “Kanei kümashi, kanei kümashi; lamnyu lamleashi, kü mütlieibü lamnyu ka kühlabü kho sunglangkuashi!

¹⁵“Aishanga thükkabou hoba yaangenbou thon akibüa kibou aoeibü nyen Saopobou ki haoei hai lauda. Ngo thükkabou hoba saopobüa kida, tokei aoeibü soushou leilubü hoba sembüambüa ki, hao yoa sembüambü soushou haanbü yeitikulabü hoba maangpon leilubü shuong haanbü yeitilabü.

¹⁶Aishanga ngei pon- pendouje senyoko aoyolabü, ayingsi ponpenje khauangko atok- yolabü; aishanga kü ka soushou hoba ngei kümbü langkei kibü longda.

¹⁷Haoeibü nyekdüh maangdüh shedbü laüa ngo khauangko kikei. Hobaje hao to ngümbei; ngei ngeibü the huan apbei, hoba khauangko kikei; hoba haoei haoeibü maangpon phai sepeijung satkei.

¹⁸“Ngei haoeibü lamnyu shuong hapbei, hoba hao maitilabü hoba toukei hao leilabü, hoba hao la haoeibü manghaapbü hakso souko ngaitikulabü.

¹⁹Sembung ka longbü hek kho ngei longtikulabü. Hakso, hakso, saabüa kibü shuong hoba nyangbüa kibü shuong shanga kia, dogo BUNYUBOUei lauda, hoba ngei hao maitilabü.

²⁰Lausikei amaibüje topeiko kibü yungnyu phatkei; aieilausi hao sangsembo kila athük hoba khübü dei khoei thim hoba maksilak ongan angtida.

²¹Amaibü shangaje hakso aki,” dogo ngeibü Mühghaüei lauda.