Read Chang Naga ISAIA 58 Bible Online

ISAIA 58 - Chang Naga bible

ISAIA 58

¹“Hau pendouei, ajemtenko ngekashi. teklaang tegü kaibü ngüh longashi. Kü mütli la haoenei ngühkhüm lulimbü shangabü hoba Jakob chemdang to haoeneibü shabü shangabü ngetiashi!

²Aishanga chalou angboua haoenei ngo lamda; ai janbü ki kho jungeiko, hoba haoeneibü Mühghaü ngühkhüm shuong ainletbü phang che phatko, haoenei ngeibü lamnyu shuong lamenla maangdakbü tegü lenda. Haoenei kü ka saopobü ngühkhüm shanga pheda, hoba khübü nyangko loula Mühghaü shanga maangdakbü tegü lenda.

³“Kün aila mühei nyengkei, hoba nyi kho aila ühüpda, kün aila hanbüla yeiko khüpetda, hoba nyije achühenda, dogo haoenei lauda. Chühashi, kan mühei nyengbü chaloua kan lulu maangleda, hoba kaneibü kümbüleibü shuong pendou shieikoeda.”

⁴Chühashi, kanei oyophetyo hoba tokyola shanga hoba amaibü kümla ik seman thangyola mühei nyengda. Kaneibü ngühang thükaenei dittila kanei tat kümbü tegü anyengjan.

⁵Ho tegübü nyengbü ho ngei pienbü sai? Müt shanga soushou khonkutilabü chalou ong lo? Kho lulueibü khu sang tegü hakjung kouan, hoba hao senounei si tapei naanglepan pailabou sai? Kho to nyengbü hoba BUNYUBOUei sungletlabü chalou dogo nyi laulep sai?

⁶Ngei pienbü nyengbü khoje ho; amaibü khühbü yangmen senglabü, hoba kaangkhüh senglabü, shieikoebü la do ngetilabü hoba kanei kaangkhüh weko pakngokkulabü ho aying lo?

⁷Kaibü shausiyung mühei haibü shuong to janyolabü, hoba chem akibü shalebü chem to leian loulabü; ladang nyi mütkong haplaje, hao la neikulabü, hoba müt ka no asepeijan, ho aying lo?

⁸Kheijinei kaibü ngesakbü ngeyang tegü longlabü, hoba kaibü maitibü tongde longlabü, hoba kaibü saopobü ka thedang to haulabü, BUNYUBOUeibü soneikangbü kaibü lombou yinglabü.

⁹Kheijinei nyi ngalabü, hoba BUNYUBOUei jongailabü, nyi ngeklabü hoba haoei laulabü: Ngo hanei kia. “Nyi shieikoebü, the thepthep nyikubü, hoba lubülimbü ngühlaubü apbo laualonga,

¹⁰Hobaje kaibü shausiyung mühei haiko kibü to janyokho hoba khonsaka kibü haksotikho laualonga kheijinei ka shanga nakthüh phanga ngesakbü longlabü, hoba maang nakthühtham kibü chaloua ngesakbü tegü kilabü.

¹¹Hobaje BUNYUBOUei no athakko lombo kilabü, hoba shausiyung maibüei no senyühshemtilabü hoba haoei kaibü hau haanbü la yeitilabü. No dei maisho lakbü bamang tegü, hoba ühüpbo kibü shumang dei tegü kilabü.

¹²Hobaje kaibü mütliei shangied leilubü kümetlabü, nyi meten juong chemshang yaülabü; hoba ka to, Leilubü Kümthang Kümetbou, Lamnyu si müt Kishang Yaüetbou, dogo laulabü.”

¹³BUNYUBOUei lauda, “Nounyet kaibü you sepeialonga ngeibü sao- pobü chaloua nyi kümsilei akümbo, nyi Nounyet to olinlabü hoba BUNYUBOU saopobü Nounyet hangenlabü, dogo laualonga nyi nyi maangangbü akümbo hangenalonga ayingsi no haksola alambo, ayingsi nyi ngüh lejim akibüa alaulonga,

¹⁴kheijinei ong nyi BUNYUBOU ka olinbü haplabü, hoba kaodak thükaenei thükbüa ngei no settilabü, hoba kabou Jakob phetei no samlabü; aishanga BUNYUBOUeibü sembung ka kho laua.”