Read Chang Naga ISAIA 59 Bible Online

ISAIA 59 - Chang Naga bible

ISAIA 59

¹Chühashi, khümenla shanga BUNYUBOUeibü ik tuibü aying, ayingsi ditla athüklabü lele haoeibü nou obangbü aying.

²Lausikei kaneibü shedbüshabüei kan si kaneibü Mühghaü kanglanga jannyintikei, hoba kaneibü shabüei haoei kan ühüplabü lele haoeibü thenyek kan ka huan apbei.

³Aishanga kaneibü ik siiei hoba kaneibü ikjishou shuong shedbüei dotnyinan kia, kaneibü sembung khopei yepeijaweda.

⁴Ngühmai shanga aoeikei asuajada, ngühmai pülebü ao aki; haoenei kongkonga maanglemda hoba amlang ngüh lauda, shedbü damanchühda hoba shabü longtida.

⁵Pinyueibü tei haoenei teida hoba haoenei keklakchem jenda. Aoyouei khübüeibü tei shaulaje haoen haida, hoba laobou kühyetlaje pinyu longda.

⁶Khübü keklakeibü lüh kho nei shanga kongnyu aying; khübü ka longbü aoeikei aneida. Haoeneibü kümsilei kho shedbü shabü kümsilei hoba ik shatyobü kümsilei haoeneibü ika kia.

⁷Haoeneibü you amaibü aeto laangda, shedbü akibü sii angtida, haoen pantei- yoda; haoeneibü dambü amaibü lamthen ki; sangliphanga apyola hoba leilutibü haoeneibü lamnyua kia.

⁸Haksobü lam haoenei angekei, hoba haoen haushanga ngühmai aki. Khübü kho haoenei kümbü kombü lamnyu khüto aoyou atlaje hakso angeda.

⁹Hibü ngühmai sen ka saabü to hauan kia, ayingsi saopobüei sen asühda, senei ngesakbü lamda, lausikei nakthüh hapda; Soneikangbü lamda, lausikei sen nakthüha paida.

¹⁰Nyek ayembü mütshuong youei juan chühko paibü tegü banyu kümthang kaijembo senei juan chühko nongeida, jijimomo kijinei tegü senei chalou chajiha phaiyetda, sekokbü yoa sen haibü tegü paida.

¹¹Senei sapei tegü ngühda hoba guduru tegü ngayoko wida, matjemla shanga senei lamda, lausikei ao aki, khümenbü shanga lamda, lausikei kho sen ka lounyu hean saabüa kia.

¹²“Aishanga küneibü ngühkhüm leilubü juong kia, hoba küneibü shedbüei kün khulimbo aukabü kuda; küneibü ngühkhüm leilubü shuong kün yoa kia hoba küneibü shedbü shabü shanga künei ngekkei.

¹³Lenbü aditko meimeibü, BUNYUBOU to maang asangko kümbü, seneibü Mühghaü ae phai yeikubü, ngüh shoulobü hoba khulimbo laubü, maangpon ka yepeijaweko laubü hoba maanga dambü.

¹⁴Ngühmai ka phai sukjung ngaia, hoba sao- pobü saabüa hauan kia, aishanga khonga ngühmai tuongakei, hoba tangbü thechüh atla athükda,

¹⁵haü, ngühmaiei shalean kia; hoba aoei amaibü ka banglaje lulu haitibüla yeitida; hoba BUNYUBOUei kho hapbei hoba khünei ngühmai aki dogo hao khoei maangto shattikei.”

¹⁶Hobaje haoei khünei müt aokei ühüp, hoba sukujakulabü aki dogo maangpangkei, hibü hao ikei hao jungto khümenbü sungbakei, hoba hao saopobüei hao tonenkei.

¹⁷Hobaje khuku yukjin shanga haoei saopobü yukkei, hoba haoeibü khua khümenbü nameibü khun hoba neisimei shanga haoei phoklambü nei neikei hoba tanga neimok maangdakbü lean kikei.

¹⁸Haoeneibü kümsilei thüng haoei mu kulabü, haoeibü dangbou shuong khau lotbü haoeibü labou shuong la kungaibü yungkoa kibü kaonyeka haoei nyibou ku kulabü.

¹⁹Kho tegü haoenei BUNYUBOUeibü nyen chanep ka hoba chaangbou ka haoeibü soneikangbü to soumo hatlabü, aishanga BUNYUBOUeibü hakei metan jinkubü shumang koubü tegü hao loulabü.

²⁰Hobaje Zion to Khümenbou loulabü, hoba Jakob ka ngühkhüm leilubü sungngailabü dogo BUNYUBOUei lauda.

²¹Hobaje kü shangaje ho kan yoa ngeibü theyolanyobü ki dogo BUNYUBOUei lauda; ngeibü soushou laobou kan thüka ki, hoba ngeibü ngüh laobou kaneibü sembunga jinkua, kho kaneibü sembung ka abanglabü, ayingsi kaneibü shousieibü sembung ka ayingsi kaneibü shisieibü sembung ka, tou ka jaüan hoba ponpen abanglabü dogo BUNYUBOUei lauda.