Read Chang Naga ISAIA 6 Bible Online

ISAIA 6 - Chang Naga bible

ISAIA 6

¹Uzzia Choba haibü poa Choba setshanga setan thükaenei tonenan yaangenbü neisimeiei lembü chem shenan ngei BUNYUBOU hapbei.

²Hao thüka kaakyembü Kherabim lokei, che che weko kaak lakbang kikei, pemnyiei haoei jembü thenyek küplepbei, hoba pemnyiei haoei jembü you küplepbei, hoba pemnyiei hao seilepbei.

³Hobaje cheei che to ngekyoko laukei, “Saopobü, Saopobü, Saopobü, Thükenbü BUNYUBOU! Haoeibü soneikangbüei kaodak shenakei.”

⁴Hobaje ngekbü ngühlang khoei chemshang shenkei, hoba wankhükei chem shenkei.

⁵Kheijinei ngei laukei, “Ngo ügütü! Aieilausi ngo lishang asaopobü müt hoba ngo lishang asaopobü mütshuong yoa kida, aishanga ngeibü nyekei Choba Thükenbou BUNYUBOU hapa.”

⁶Kheijinei lemshon ka kipei wankak yasebü sungbaan kaakyembü Kherabim yoa che kü jungto seengjung loukei.

⁷Hobaje khoei ngeibü sembunga haoei meitikei, hoba laukei, “Chühashi, hoei kaibü sembunga meitia, hoba kaibü shedbü shabü langkua, hoba kaibü shabü apbua.”

⁸Kheijinei BUNYUBOUeibü ngühei lauko ngei ditkei, “Ngei ao hautila, hoba kün shanga ao haula?” Kheijinei ngei laukei, “Ngo hanei kia! Ngo hautikai.”

⁹Haoei laukei, Hauashi hoba habü mütshuong to lenshi: “Ditdang leashi, lausikei ladangkei tediten; hapdang leashi lausikei ladangkei teshen.

¹⁰Habü mütshuongeibü maangpon ngoutiashi; haoen nou otiashi hoba haoeneibü nyek yuitiashi. Khei ayinglonga haoenei haoeneibü nouei ditlabü, haoeneibü maangponei ditenlabü, hoba sepeilabü hoba maingailabü.”

¹¹Kheijinei ngei laukei, “O BUNYUBOU, lalokche?” Hobaje haoei jongaikei, “Sangnyu shuonga müt akiko üp shongko hoba chema müt akiko üp shongko, hoba kaonyek lepde shian üp shongko,

¹²hoba BUNYUBOUei müt saabü to yaüan asatti shongko hoba kaonyek jenyua kaoen juong netla yeiko aphoku shongko.”

¹³Khübü yoa phejan ana che ongkei khünei jouan yembulong ayingsi terebint bulong akbü chungthem tegü kiasikei, kho nyibou chengan aplabü; kho tegü saopobü phang kho haoeibü chungthem ki.