Read Chang Naga ISAIA 60 Bible Online

ISAIA 60 - Chang Naga bible

ISAIA 60

¹Laksepashi, olinyoshi, aieilausi kaibü ngesakbü louakei, hoba BUNYUBOUeibü soneikangbü ka thüka longa.

²Aishanga chühshima, nakthühei kaodak küpleplabü, hoba nakthüh shangtüngbüei mütshuong küpleplabü; lausikei ka thükto BUNYUBOU longlabü, hoba haoeibü soneikangbü ka thüka haplabü.

³Hobaje phangshuong kaibü ngesakbüa pailabü, hoba Choba shuong kaibü langngebü soneikangbüa pailabü.

⁴Kaibü nyek longan kaijembo chühashi, haoen pendou liko kamshaida, haoen ka jungto louda: kaibü jayangshou shuong saabü ka loulabü, hoba kaibü nouyangnyu shuong ika tonlabü.

⁵Kheijinei nyi haplabü, hoba ngesaklabü, hoba kaibü maangpon olinbüei topeilabü hoba toplabü; aieilausi yungnyu nyaksinam shuong ka jungto sepeilabü, hoba phangshuongeibü nyaksinam ka jungto loulabü.

⁶Ut shuongei hoba ut shoushou shuongei no omleplabü, khübü pendou Sheba ka loulabü, haoenei hon si jen sungbalabü; hoba BUNYUBOUeibü nyensang ngetilabü.

⁷Kedar kabü san tan pendou ka jungto liko yoshailabü hoba Nebaiot sanlon paangshuongei kaibü khambü kulabü; haoen ngeibü lemshanga sungletenlabü lele anglabü, hoba ngeibü soneikangbü chem ngei soumo kitilabü.

⁸Sangmei tegü seengeibü hoba guduru kouloma seengeibü tegü khübü kho aoyou?

⁹Maimaitham su shuongei kü shanga haiyeida, shaangla Tarshish longchem shuong, kaibü bousushou shuong saabü ka haoeneibü chandinam hoba haoeneibü hon BUNYUBOU kaibü Mühghaü shanga hoba Israel Saopobou shanga haoen yoa sungbalabü; aieilausi haoei no soneikangtiakei.

¹⁰BUNYUBOUei Jerusalem to lauda, “Hobaje küksithangei kaibü kümthang kümbulabü hoba haoeneibü Choba shuongei ka to khangenlabü, aishanga ngo khau lotjinei ngei ka to ngümbei, lausikei ngeibü onouei ngei ka to üeisanou dambei.

¹¹Kaibü bakhün toukei athakko ipan kilabü, hoba Choba shuongei leian mütshuongei phangshuongeibü nyaksinam jungan ka jungto loulabü lele changea ayingsi nangnak khübü kho akhinko kilabü.

¹²Aishanga phang ayingsi Choba sangleei no akhangenlabü, haü, khübü phang lemailela tekan aplabü.

¹³“Ngeibü, lemshang hemaitila shanga Lebanon soneikangbü, fir bulong, wansak bulong, hoba larch bulong ka jungto loulabü, hoba ngei ngeibü you phoshang soneikangtilabü.

¹⁴Hobaje aoyouei no khonsaktikei, haoeneibü shousi shuong ka jungto khüpetan loulabü, hoba ka la nyikubü pendouei kaibü youdema haoen lolo khüpetlabü, hoba haoenei ka to, ‘BUNYUBOUeibü sangnyu,’ hoba ‘Israel Saopoboueibü Zion,’ dogo ngalabü.

¹⁵“No inletan apyoko hoba mangsentiko, hoba mütei inletan kibü jeiko ngei no ponpen thon akiko the lenenko kilabü hoba meten juong olinbü yeitilabü.

¹⁶Nyi phang shuong ka sen sheplabü, hoba Choba shuongeibü khukhu ka sheplabü, hoba ngo BUNYUBOU no khümenbou hoba no angthedbou Jakobeibü yaangenbou, dogo nyi ngelabü.

¹⁷“Chinam jeiko ngei hon sungbakulabü, hoba namkung jeiko ngei chandinam sungbakulabü, bu jeiko chinam, laang jeiko namkung, hoba kan songdakbü shuong hakso hoba kaibü kümsilei songdakboueibü saopobü yeitikulabü.

¹⁸Ik shatyobü kümsilei touje kaibü kaodaka aditlabü, sangliphanga apyobü ayingsi leilubü kaibü kaodaka touje aditlabü, lausikei nyi kaibü kümthang to Khümenbü, hoba kaibü bakhün to Nyensang dogo ngalabü.

¹⁹“Touje changea chanyu kaibü ngesak akilabü, ayingsi sonlailai shanga litnyuei ka la ngesak akulabü, lausikei ka shanga BUNYUBOU ponpen thon akibü ngesak hoba kaibü Mühghaü kaibü soneikangbü kilabü.

²⁰Kaibü chanyu touje aneplabü, ayingsi kaibü litnyu hao lolo amaulabü, hoba no manghaapbü chalou thonlabü.

²¹Ngo soneikangtila shanga kü shanga bubhek ngeibü ikei kümbüleibü kümsilei toukei kaibü mütli pendou saopobü yeitilabü; ponpen shanga haoeneibü kaodak phet phanlabü.

²²Naklepbou kho hajar che yeilabü, hoba hanbou kho hau kibü phang che yeilabü. BUNYUBOUei kho jih tükdea panteiko lottilabü!”