Read Chang Naga ISAIA 61 Bible Online

ISAIA 61 - Chang Naga bible

ISAIA 61

¹BUNYUBOU Mühghaü Soushou kü thüka kia, aieilausi shalebü la ngühlangmaibü songlenla BUNYUBOUei ngo naangenko pienkei; maangpon leilubü khühyokula, thüngbü shuong la dongebü thu ngekletkula, hoba langsenbü la thüngshang ipbubü shanga ngekletkula;

²BUNYUBOU olinbü ngekletkula, hoba seneibü Mühghaü phoklambü chalou ngekletkula, manghaapbü pendou maangsula;

³Ziona manghaapbü shuong shanga nongnaekula, haoen la tap jeiko chipen yak kula, manghaapbü jeiko olinbü onang, maangkhu yuibü soushou jeiko nyensang hele kula, khei haoeibü soneikangbü shanga haoen to saopobü bulong, BUNYUBOUei kebü, dogo laula shanga haoei ngo hautikei.

⁴Hobaje haoenei mietshangied leilubü kümetla, shaangied litham apyobü meten juong inletbü, hoba tekan apan kibü sangnyu shuong haoenei kümetlabü.

⁵Hobaje küksithang shuong lolabü hoba kaibü sanshuong pangteilabü; hoba yenbou homan kibü shuong kaneibü seklatbü shuong, hoba kaneibü semlüh nitbü shuong yinglabü.

⁶Lausikei kanje BUNYUBOUeibü ungshedbou shuong dogo nyenlabü; mütshuongei kan to seneibü Mühghaü khangenbü shuong dogo ngalabü. Kanei phangshuongeibü nyaksinam shaulabü; hoba haoeneibü soneikangbü shanga kanei thük haplabü.

⁷Kan himou jeiko shanga phejan nyithüngei hapngailabü, hoba lemenleenbü jeiko haoenei jembü phejana olinyolabü, hibü haoen kaodaka haoenei phejan nyi haplabü; ponpen thon akibü olinbü haoen shanga kilabü.

⁸“Aishanga ngo BUNYUBOUei ngühmai sanouda, hoba shedshonbü soshausoyungbü mangsenda, ngei haoen la haoeneibü mu maimaitham kungailabü; hoba ngei haoen to ponpen thon akibü theyolanyobü kümlabü.

⁹Hobaje haoeneibü lilabü phangshuong yoa, hoba haoeneibü shousi müt yoa ngeko yeitilabü. Haoen hapbü pendouei khei, haoen BUNYUBOUei haükubü lilabü shuong dogo haoen ngelabü.”

¹⁰Ngo BUNYUBOUa aeibou olinlabü, ngeibü soushouei ngeibü Mühghaü to olinangko kilabü, aishanga haoei kü la saopobü neisimei neikukei, chemkanbouei lulu neisimeiei janan lebü tegü, hoba chemkannyuei lulu namsek yakei jantibü tegü, haoei ngo saopobü heleei yuklepbuan kia.

¹¹Aishanga kaodakei saopobü longtibü tegü hoba bamanga phinbü lilabü longtibü tegü, kho tegü BUNYUBOU Mühghaüei phang pendou thükto saopobü hoba nyensang longtilabü.