Read Chang Naga ISAIA 62 Bible Online

ISAIA 62 - Chang Naga bible

ISAIA 62

¹Zion shanga ngo sangsembo akilabü, hoba Jerusalem shanga haoeibü saopobü lailaitham alongshongko, hoba haoeibü khümenbü longan kibü wanthung tegü alongshongko ngo haksoko akilabü.

²Hobaje phang pendouei kaibü saopobü, hoba Choba pendouei kaibü soneikangbü haplabü, hoba BUNYUBOUeibü sembungei no nyen haanbü cheei ngalabü.

³Toukei no BUNYUBOUeibü ika hemaibü Chobaeibü khun che, hoba kaibü Mühghaüeibü ika Chobaeibü tetsida che kilabü.

⁴Touje ka to aoeikei, “Inletkei,” dogo alaulabü, ayingsi touje kaibü kaodak to, “Sangliphang,” dogo alaulabü, lausikei ka to Hefziba, dogo hoba kaibü kaodak to Beula, dogo laulabü; aishanga BUNYUBOUei ka to olinda, hoba kaibü kaodak chemkanlabü.

⁵Aishanga heshou cheei saosüngbü medei che to chem kanbü tegü, kaibü jayangshou shuongei ka to chemdang yeilabü, hoba chemkanbouei chemkannyu to olinbü tegü, kaibü Mühghaüei olinlabü.

⁶O Jerusalem, kaibü kümthang thüka ngei lapheibü phokuakei, changea yingsikei nangnak yingsikei, haoenei ladangkei ngühüangko akilabü; kan aoyou BUNYUBOUei amaabü shuong ki, kan ngüh üangko teki.

⁷Kaodaka Jerusalem nyensang nyenhaang yeitiko BUNYUBOUei akümshongko hao la hakso teku.

⁸BUNYUBOUei haoeibü mae ik hoba haoeibü ik hau kibüei theyolanyokei: “Maimaitham touje kaibü youshou dangbou shuongeibü shausiyung la ayeilabü, hoba no hüko mangko kümbü ih haanbü kho küksithang shuongei ayunglabü.

⁹Lausikei aoyouei kho kheishaian phoda, haoenei kho shaulabü, hoba BUNYUBOUeibü nyen sanglabü; hoba aoyouei kho yoshaikei haoenei kho ngeibü saoposhang chemsophanga shaulabü.”

¹⁰Danjung hauashi, bakhün danko hauashi; kanei mütlieibü lamnyu lamleashi, laang heshaiashi, mütshuong thüka nisan tonenashi.

¹¹Chühashi, kaodak thon sühko BUNYUBOUei phinthonda; “Kanei Zion nouyangnyu to lenashi: ‘Chühashi, kaneibü khümenbü louada! Chühashi, haoeibü jongsak hao yoa kia, hoba haoeibü kümsilei hao yoa thonakei.’ ”

¹²Hobaje haoenei kan to, “Saopobü Mütli,” “BUNYUBOUei Angthetbü;” hoba ka to “Lamenbü, Awailetbü Sangnyu,” dogo ngalabü.