Read Chang Naga ISAIA 63 Bible Online

ISAIA 63 - Chang Naga bible

ISAIA 63

¹“Bozra ka saklangbü nei neian, Edom ka loubü haoeibü neisimei soneikangko lean hau kiko paijung loubü ho ao?” “Kho ngo, aoei saopobüa lauda, hoba khümenla hau yaang ki.”

²“Aila kaibü neisimei semlüh nitshanga nakeibü müteibü neisimei tegü saklangkei?”

³BUNYUBOUei jongaida, “Semlüh nitshanga ngo boushou paikei, kü yoa müt ao akitei; haü, ngo khauangjinei nakeikei, hoba haoen nakan yantikei; hoba haoeneibü langkeibü sii ngeibü neiameia wenan jinkei, hoba ngei ngeibü neisimei pendou dotnyina.

⁴Aishanga phoklambü chalou kü maangpona kikei, hoba ngo angthetbü chalou louakei.

⁵Hobaje ngei chühsi thuilabü ao akitei; hoba tonenkulabü ao akibü ka ngo phenyembei, hibü ngo ngeibü phemei kü to thuikei, hoba ngo khauangbüei ngo tonenkei.

⁶Ngo khauangbüa ngei müt shuong tonan yantikei, hoba ngeibü khauang maangpokei haoen netla yeitikei, hoba haoeneibü langkeibü sii kaoa jonan koutikei.”

⁷BUNYUBOUei sen la kubü thüng ngei BUNYUBOUeibü nyensang shanga hoba Israel chemdang to aeibou maibü, laobou haoeibü onou thüng haoei haoen la kukei, hoba haoeibü üeisanou juong shanga laulabü.

⁸Aishanga haoei laukei, “Maimaitham haoen kü mütli, kü junga ayepeilabü shousi shuong ki;” hibü khoei hao haoeneibü Khümenbou yeikei.

⁹Haoeneibü khonsak khonku pendoua haoei khonsak onat hapbei, hoba hao yoan kibü khuthük hangangbüei haoen khümenkei. Haoeibü sanouei hoba haoeibü üeisanouei haoei haoen angthetkei; haoei haoen tonenkei hoba shangiedbü chalou pendoua haoei haoen künkei.

¹⁰Lausikei haoenei ngüh- a ale hoba haoeibü Soushou Saopobü maangto shattikei; hibü hao haoeneibü dangbou yeitikei hoba hao lolo haoen khulimbo wapyokei.

¹¹Kheijinei haoeibü mütliei shangied Mosa chalou shuong damenko laukei, “Sanlombou ao san tan yoan yungnyu ka haoen aoei leiyenkei hao lanei ki? Haoen yoa Soushou Saopobü aoei phokukei, hao lanei ki?

¹²Aoei soneikangbü phem Mosaeibü mae ik to hautikei, aoei hao lolo ponpen thon akibü nyen shanga haoen thedanga dei jankukei?

¹³Aoei haoen haübükuokbü danko haoen you akühtila shanga yama koli tegü,

¹⁴masu shuong kaokhong to yanbü tegü leian yankei, kho tegü BUNYUBOUeibü Soushouei haoen lombei. Kho tegü no lolo soneikangbü nyen yeitila nyi kaibü mütli leiyeikei.”

¹⁵Khuthük ka chühan yantiashi, hoba kaibü saopobü hoba soneikangbü kishang ka chühashi. Kün shanga kaibü maangdak yaangbü lan ki? Kaibü sei lanei ki? Kaibü sanou si üeisanou lanei ki? Kün inletan tüp.

¹⁶Aishanga Abrahamei kün angesikei hoba Israelei kün asungletsikei no küneibü bou ki; no, O BUNYUBOU, küneibü Bou ki; ponpen thon akibü ka no kün Angthetbou ki.

¹⁷O BUNYUBOU, aila nyi kaibü lam ka shongaitida, hoba ka to soumo ühüttiko, küneibü maangpon kaangtida? Kaibü phetphanbü phangshuong, no khangenbü shuong shanga sepeiashi.

¹⁸Ka mütliei longche shanga kaibü saopobü kaoen lekei; lausikei tou küneibü dangbou shuongei kaibü saoposhang nakeia.

¹⁹Aoyou kaibü nyenei anga haoen tegü, shangied ka aoyou thüka nyi song adak haoen phatko kün khümena.