Read Chang Naga ISAIA 64 Bible Online

ISAIA 64 - Chang Naga bible

ISAIA 64

¹O, nyi müh shuong khuoknyinda, shongh shuongei ka thedanga topeilabü lele no louyenkei yingma!

²Sang linbüa baubü wanei dei tühtibü tegü haoen lühlabü. Kaiya hoba kaibü dangbou shuong la kaibü sei tang khittiashi, hoba phangshuong ka thedanga lühtiashi!

³Künei dambo akibü hatlamoklabü kümsilei shuong laobou shangied ka thama mütei ditan achüh.

⁴Ayingsi nouei ditan achüh, nyekei ka to limbo lubü Mühghaü hapan achüh, aoei hao shanga haiyeiko kibü shuong shanga kümda.

⁵Aoyouei saopobü kümda hoba aoyouei kaibü lamnyu shuong damenda, haoen to thuila no louda. Lausikei ladang künei athakko haoen khulimbo shabü shonkei, no khauangko kikei. Kholonga kün lai küman khümenla?

⁶Kün pendou asaopobü müt tegü yeia, hoba küneibü saopobü pendou neikekmeikek phatko ki; kün pik tegü yuida, hoba küneibü shabüei kün yeiei tegü soulangda.

⁷Aoeikei kaibü nyena angada ayingsi ka to thuibü hiko aokei akhapyoda; nyi kaibü the kün ka hungailanga hoba küneibü shabü haangjung nyi kün inleda.

⁸Lausikei, O BUNYUBOU, no küneibü Bou ki. Kün shungkung thamsak hoba no chakyaübou; kün pendou kaibü ikei kümbü ki.

⁹O BUNYUBOU, yongkoje khau tüangma, ayingsi küneibü shabü ponpen tedamenma. Chühashi, künei ka to sudajada, aishanga kün pendou kaibü mütli ki.

¹⁰Kaibü saopobü sangnyu shuong yamla yeia; Zion yam la yeitia, Jerusalem sangliphang la yeitia.

¹¹Küneibü saopobü hoba hemaibü chem lanei küneibü pisibousi shuongei kaibü nyen sangkei kho wanei lonan apa, hoba künei mangsühbü peisilei shuong tekan apa.

¹²Khübü shanga, O BUNYUBOU, no lolo senetnyu kilep lo? No ngüh üangko kilep lo? Kün shalatalabü lele khon kutilep lo?