Read Chang Naga ISAIA 65 Bible Online

ISAIA 65 - Chang Naga bible

ISAIA 65

¹BUNYUBOUei laukei, “Ao- youei kü to aphe, kü to shuokyojoyotila ngo lamlean kikei; aoyouei ngo alam, haoenei ngo haptila ngo lamlean kikei. Kü nyena angabü phang to ngei lena, ‘Ngo hanei kia, Ngo hanei kia!’

²Aoyouei dambü phailam amaibüa paikei, khulimbü mütli, haoen to ngei chaseko ngeibü ik shingkei;

³mütli laobouei athakko kü thedanga bamanga meisiau lembü haitiko juoklaang thüka ponlem hibü juokko kikei haoenei ngo khauang longtikei.

⁴Haoen heea setda hoba hushanga kida, aoyouei uk phe shauda hoba asaopobü phe haoeneibü chaka ki,

⁵haoenei lauda, ‘Thi to kukjung hauan loashi, kü jungto nyangko telou, aishanga ngo kan shanga yongko saopobü ki!’ Habü mütshuong ho ngeibü kungkhün maanga wankhük tegü, khei chaseko juokbü wan phatko ki.

⁶“Chühashi, ho kü thea doakei: Ngo ngüh üangko akilabü; lausikei sepeinyu ngaitikulabü.

⁷BUNYUBOUei lauda, ‘Haü, shong- ha jen juokjinei hoba shongh thüka ngo wela alebü kaneibü shabü hoba kabousi shuongeibü shabü kaneibü khukua sühko kungailabü; hibü haoeneibü khukua haoeneibü kümsilei shaang ngei takan chühlabü.’”

⁸Hai, BUNYUBOUei lauda, “Semlüh shen hapsije atei lauda, ‘Ho teleilu, aishanga honei haülabü kia,’ kho tegü ngo khangenbü shuong shanga haoen pendou to ngei kümlabü; ngei haoen aleilutilabü.

⁹Hobaje ngei Jakob lilabü ka lilabü che hoba Jihuda ka ngeibü shongh phetphanbou longtilabü; hoba ngeibü pienbü shuongei kho phetphanlabü hoba ngeibü khangenbü shuong khünei kilabü.

¹⁰Hobaje ngo lambü kü mütli shanga Sharon san shuong tan shanga kishang yeilabü, hoba Akhor pholi kabü masu shuong shanga lamshaushang kilabü.

¹¹“Lausikei kan BUNYUBOU inletbü shuong shanga hoba ngeibü saopobü shongh maan apbü hoba Thumaibü shanga khümsok lamlebü hoba loulabü Thulen shanga kheiyobü ihthung shentida;

¹²ngei kan inei haitila thujingtilabü, hoba kan pendouei haitibou thedanga khüpetlabü; aieilausi ngei ngajinei kanei ajongai, ladang ngei joyokei kanei ditko akitei; lausikei kü thea ai amai kho kanei kümbei hoba ngo aiei aolintida kho pienkei.

¹³Hibü BUNYUBOU Mühghaüei hai lauda, “Chühashi, ngeibü khangenbü shuongje shaulabü, lausikei kanje mühei hailabü; chühashi, ngeibü khangenbü shuongeije yunglabü, lausikei kanje dei lalabü; chühashi ngeibü khangenbü shuong olin angko kilabü, lausikei kanje himou bautilabü.

¹⁴Chühashi, ngeibü khangenbü shuongje maangpon olinbüei chia laulabü, lausikei kan maangpon maangto shatbüei haaplabü hoba soushou leilubü haangjung haaplabü.

¹⁵Hobaje kanei kaneibü nyen pienbü shuong shanga khükla uokla apyokulabü, kho tegü BUNYUBOU Mühghaüei kan haitishima; lausikei ngo khangenbü shuonglaje haanbü nyen nyenkulabü.

¹⁶Kheijinei aoei kaonyeka haülabü shanga welaulaje tükdebüei Mühghaü to welaulabü aoei kaonyeka theyolanyobü che theyolanyolaje ngühmai Mühghaü to theyolanyolabü; aishanga danbü chalouabü khonsak maan apa hoba ngeibü nyek ka huan apa.”

¹⁷BUNYUBOUei lauda, “Aishanga chühashi, ngei khuthük haanbü hoba kaodak haanbü kümbuda; hoba danbü kümsilei shuong adamenlabü hoba maang- pon to alottilabü.

¹⁸Lausikei ngei ai kümda khonei mütei olinyolabü hoba ponpen thon akiko tonenlabü; aishanga chühashi, ngei Jerusalem yaangentilabü hoba kü mütli olinbü yeitila kümda.

¹⁹Hobaje ngo Jerusalem thüka yaangenlabü hoba kü mütli to olinlabü; touje sao to haapbü ayingsi ngekbü ngühlang aditlabü.

²⁰Touje sao ka nashou yingasikei jaishou yingasikei langkei salang apenko adankhümlabü; lausikei nashouboutham po saongao kian ong hailabü hoba aoyou po saongao apenko atlaje shedsikhau dogo weeilabü.

²¹Hobaje haoenei chem dangko khünei müt kilabü hoba haoenei semlühlaak lelabü hoba khübü hek shaulabü.

²²Lubü kila haoenei chem adanglabü, lubüei shaula haoenei akeaonglabü. Aishanga bulong salang tegü kü mütli salang kilabü; hoba haoeneibü ikei kümbü kümsilei ngeibü pienbü shuongei thon sühko lelabü.

²³Haoen kongkonga ühülabü, ayingsi maulabü shanga shousi abukshailabü; aishanga haoen BUNYUBOUei haükubü phangshuong ki, haoeneibü shousi haoen yoa kilabü.

²⁴Kheijinei haoenei angajinei ngei jongailabü; haoen joyoko kitoua ngei ditlabü.

²⁵Sho si san shoushou liko lamshaulabü, hoba masu pongsuei tegü molosaonyuei youho shaulabü; lausikei pinyuje haoeibü shausiyung kho thamngu yinglabü. Haoenei ngeibü saopobü shongh pendoua amaibü ai akümlabü ayingsi amautikulabü,” dogo BUNYUBOUei lauda.