Read Chang Naga ISAIA 66 Bible Online

ISAIA 66 - Chang Naga bible

ISAIA 66

¹BUNYUBOUei hai lauda, “Khuthük kü setshang hoba kaodak kü you nakshang. Khülonga ailaibü chem che kanei kü shanga dangkula? Hobaje ngo haksoshang ainei kila?

²Habü pendou kü ikei aküm lo, hoba ho pendou ngeibü aying lo, dogo BUNYUBOUei lauda. Khei yingasikei, ao eaaoabü hoba soushou leilubü ki hoba aoei ngeibü ngüh to hatjihatko ki, hao to ngei chühlabü.

³“Lausikei aoei masupongsu che haitilaje hao müt che haitibü tegü kilabü, aoei sanlon che haitian lemlaje haoeibü sii ngüma nyatetnyu haitibü tegü kilabü; aoei shausiyung lembü kulaje haoei ukeibü siiei lembü tegü kilabü, hoba aoei damenlabü jen lembü kulaje haoei heangsho haükubü tegü kilabü. Haoenei lulueibü lam shuong piena, hoba haoeneibü soushouei haoen mangsenlabü shuonga ong olinda.

⁴Hibü ngeikei haoen awealaula ong pienlabü hoba haoen thükto haoen hatlamoklabü sungbakulabü. Aieilausi ngei ngajinei aoeikei ajongai. Ngei joyojinei haoenei adit; lausikei kü thea ai amai kho haoenei kümbei, hoba ngo ainei aolinda kho haoenei pienkei.

⁵Kan haoeibü ngüha lühjilühko kibü shuong BUNYUBOUeibü ngüh ditashi: “Kan ngeibü nyen shanga haoen yo ka kan inletnyu apbü shuong hoba kan mangsenbü jaisinasi shuongei laukei, ‘Kaneibü olinbü hapla shanga BUNYUBOU soneikangtiashi!’ Lausikei haoen himoulabü.

⁶Sangnyu pühnyinbü ngühlang, lembü chem ka ngühlang ditashi! Ho haoeibü dangbou shuong la ngaitikubü BUNYUBOUeibü ngühlang ki!

⁷“Lausikei sao nahap shatei shatjinei saoei bukkua; sao khon akujinei saoei bousushou che bukkua.

⁸Aoei ho tegü ditan chühkei? Aoei ho tegü hapan chühkei? Nyetchenei ong kaonyekei mütli longtilep lo? Chemala phang che longtilep lo? Aishanga Zionei na hap khangjineitham saoei shousi shuong bukkei.

⁹Bukla ngei ai sungbakei kho ngei abuktilep lo? dogo BUNYUBOUei lauda. Ngei leibako kian nyusem khinkulep lo?” dogo ka Mühghaüei lauda.

¹⁰Kan hao to sanoubü pendouei Jerusalem to olinyoashi, hoba sao shanga olinangko kiashi, kan sao shanga manghaapbü shuong.

¹¹Khei sao maangsubü sen ka kanei maangnyembo sheplabü hoba kanei sendei nyatko sao soneikangbü juongei kan olinangko kila shanga sao to olinyola shanga olinyoshi.

¹²Aishanga BUNYUBOUei hai lauda, “Shumang tegü hakso hoba phangshuong soneikangbü sopbo kibü shumang tegü sao jungto hautilabü; hoba kheijinei kanei kho ka sheplabü, kan saoeibü ika tonlabü hoba youkük thüka makeiko ipeilabü.

¹³Jembü shou nyuei jaabü tegü ngei kan jaalabü; hoba kan Jerusalema solotilabü.

¹⁴Hobaje kho kanei haplabü, hoba kaneibü maang- ponei olinyolabü, hoba kaneibü lo nyemshang tegü yeilabü; BUNYUBOUeibü ik haoeibü khangenbü shuong la ngetilabü lausikei haoeibü dangbou shuong khulimbo hao khauang longbü kilabü.”

¹⁵Aishanga chühashi, BUNYUBOU wan yoan loulabü, haoeibü kailong Mühghaüeibü yei tegü hao maangpokbüei khauangbü hoba hao to hakbüei wanlong loutilabü.

¹⁶Aishanga wanei hoba haoeibü inei phe pendou thüka haoei matjemlabü hoba BUNYUBOUeibü haitibü juong kilabü.

¹⁷BUNYUBOUei lauda, “Aoyouei bamanga lemla shanga jembü lolo khümbo kuan saüenlaje jenyua che hoba phainei seman ukphe hoba yepuk hoba lubü shabü mangsenlabü shaulaje haoeneibü thonshang liko kilabü, dogo BUNYUBOUei lauda.

¹⁸Aishanga haoeneibü kümsilei hoba haoeneibü dambü ngei ngekei hoba phang, ngühyem pendou leishaila ngo louada, hoba haoen loulabü hoba ngeibü soneikangbü haplabü.

¹⁹Hobaje haoen danko ngei tetsida che pholabü, hoba aoyou haoen ka satenlaje phang shuong jungto ngei hautilabü, khei Tarshish, Put, si Lud jungto Tubal hoba Javan jungto saabüa Su ngao laobouei ngeibü nyen- hang adit, ayingsi ngeibü soneikangbü ühüp, haoen jungto hautilabü. Haoenei phang yoa ngeibü soneikangbü ngetilabü.

²⁰Hobaje mütshuongei kaneibü jaisina pendou ka leian loulabü, koli taaka, kailonga hoba peisilei künbü kailonga küplepan gadu si ut thüka ngeibü saopobü shongh Jerusalema BUNYUBOU jungto lemla shanga Israel shousi shuongei phau sakteibüa BUNYUBOUeibü chem to lemla jungan loubü tegü sungbalabü, dogo BUNYUBOUei lauda.

²¹Hobaje khübü atje ngei ungshedbou shuong hoba Levi shuong shanga lelabü, dogo BUNYUBOUei lauda.

²²“Aishanga khuthük haanbü hoba kaodak haanbü laobou ngei kümbo ki, kü thedanga athakko kilabü, kho tegü kaibü phang hoba kaibü nyen athakko kilabü, dogo BUNYUBOUei lauda.

²³Hobaje litsak ka litsak sühko hoba Nounyet ka Nounyet sühko khunakshousi pendouei kü to lemla loulabü,” dogo BUNYUBOUei lauda.

²⁴Hobaje haoen longlabü hoba ngo khulimbo meimeibü müt haibü mang to haoenei chühlabü; aishanga haoeneibü yangbem ühailabü ayingsi haoeneibü wan anyetlabü, lausikei khunakshousi pendou thedanga haoen mangsenlabü kilabü.”