Read Chang Naga ISAIA 7 Bible Online

ISAIA 7 - Chang Naga bible

ISAIA 7

¹Uzziaeibü shou Jotham, hoba haoeibü shou Ahaz Jihudaeibü Choba haanga Siriabü Choba Rezin, hoba Remaliaeibü shou Peka Israelbü Choba Jerusalem khulimbo wapyola angkei, lausikei, kho khulimbo awapyoan.

²Hobaje ladang Dawideibü chung to “Siriabü Efraimbü kaoa shaiakei” dogo laukei, haoeibü maangpon hoba hao mütlieibü maangpon yama bulung shuong yeiei nyaakeibü tegü nyaakeikei.

³Kheijinei BUNYUBOUei Isaia to laukei, “No hoba kaibü shou Shearjashub kasi, Neisakbou Kaophei lamkhonga thükkabou süngküp ka deiso thonbü aeka ong Ahaz to haüyola angashi.

⁴Hobaje hao to lenshi, ‘Maangsangashi hoba saangsembo kiashi. Rezin, Siria hoba Remaliaeibü shou kaangbou khau angsi dogokei hoba khübü wankhük laibü, wanted tho pemnyi kibü shangakei hatko teki, hoba kho laüa ka maangpon semthetko teki.

⁵Aieilausi Siriaei Efraim si Remaliaeibü shou yoan kakhu limbo huon amaibü kümbo, hai lauko loukei,

⁶“Jihuda khulimbo sen angkho, hoba sen shanga janyin bangnyin longtikho hoba kho kanglanga Tabeeleibü shou Choba yeitiakho,

⁷BUNYUBOU Mühghaüei hai lauda: Kho athük haplabü, kho tegü ayinglabü.

⁸Aishanga Siriabü khu Damaska hoba Damaskaeibü khu Rezin ki; hoba po saosemto ngao kanglanga Efraim phang che ongkei akitilabü lele netla yeiko leilutikulabü.

⁹Hobaje Efraimeibü khu Samaria, hoba Siriaeibü khu Remaliaeibü shou ki. Kanei kho maitelembho laua longa maimaitham kho kanei atinlabü.”

¹⁰Hobaje BUNYUBOUei Ahaz to nyibou lenkei,

¹¹“BUNYUBOU kaibü Mühghaü ka tetsida che hiashi, khei yemkaoa sühko haübü ayingsi khuthüka sühko suokbü yingsikei pheashi.”

¹²Lausikei Ahazei laukei, “Aphelabü, ayingsi ngei BUNYUBOU atakteilabü.”

¹³Kheijinei Isaiaei laukei, “Tou kanei ditashi, O Dawid chemdang! Müteibü maangpon noutilabü ho ongkei hanbümanbü dogo kanei damda si? Kholonga kanei kü Mühghaü kei noutilep lo?

¹⁴Hibü BUNYUBOUei haoei lolo kan la tetsida che kulabü: Chühashi, saosüngbü medei che mang akongko yeilabü, hoba nashou che bukkulabü, hoba haoeibü nyen kho Imanuel dogo nyenkulabü.

¹⁵Ladang haoei amaibü asungletla ngean hoba maibü pienla ngean aplaje haoeibü shausiyung kho sendei onbü hoba naodei kilabü.

¹⁶Aishanga nashou khoei amaibü asungletla hoba maibü pienla angejinei kaonyek laoboua Choba penyi, nyi hatko khangenda, kho inletnyu aplabü.

¹⁷“Assiria Choba khei Efraim ka Jihuda bangbü chalou ka tou sühko louan achühbü chalou shuong ka to hoba ka mütli thükto hoba kaboueibü chemdang thükto BUNYUBOUei loutilabü.

¹⁸“Kho chaloua ho haüthüklabü, khei BUNYUBOUei Ijep shumang pakshang kibü meishou shuong hoba Assiria kaodaka kibü nao ngashailabü.

¹⁹Hobaje khübü kho loulabü hoba khübü pendou yomang haübü hoba laangkhüna, hoba sang pendoua hoba buham pendoua louan shailabü.

²⁰“Kho chaloua BUNYUBOUei Eufrates shumang danan kibü khushubou, kho Assiria Choba, leibalabü hoba haoei kaibü khulou, hoba you kabü wi hoba kaibü sembungwi yoan kütan apbulabü.

²¹“Hobaje kho chaloua ho hai kilabü, müt cheei masu pi shoushou che hoba sanlon penyi bang samlabü;

²²hoba sendei apsileko kibüei haoei jembü shausiyung shanga sendei ontobü kilabü. Aieilausi kaonyeka jouan kibü wekoei sendei hoba naodei shaulabü.

²³“Hobaje ho haüthüklabü, ainei ong semlüh long hajar chenei chandinam hajar mubü kikei kho bi long hoba jaklong ong yeilabü.

²⁴Hobaje mütshuongei lau si laujin jungan khüto loulabü, aieilausi kaonyek pendou kho jak angbü buham hoba jaklong ong kilabü.

²⁵Hobaje jak angbü buham hoba jak to hatbü ka shapei laünyinan kishang shonghshou khüto no aloulabü; lausikei kho masu si sanlon lamshaushang la ong yeilabü.”