Read Chang Naga ISAIA 9 Bible Online

ISAIA 9 - Chang Naga bible

ISAIA 9

¹Lausikei maangkhu yuian kibü sao shanga touje nakthüh akilabü. Shangied haoei Zebulun kaodak si Naftali kaodak to himou sungbakukei. Lausikei thonlamaje Jordan chanep aikabü phangshuong kibü kaonyek, Galil yungnyu kaijempo haoei soneikangtilabü.

²Nakthüh phanga paibü mütshuongei ngesak yaang hapbei; aoyou nakthüh phanga kida, haoen la ngesak haukua.

³Nyi phang haatia; nyi haoeneibü olinbü haatikua, haoen ka thedanga youlatjinei olinyobü tegü olinyoda. Soletbü peisilei janyojinei mütei olinyobü tegü olinyoda.

⁴Aishanga kaang laobou haoen shanga onat kikei, hoba haoeneibü phaka kibü bu haoeneibü BUNYUBOUei ngümbü ju Midianbü chaloua tegü nyi leilukei.

⁵Aishanga lasona lemenyobü dan yoa insiaubu jungbü müteibü hele pendou hoba sii hambü neisimei jikla shanga busidei tegü ong kilabü.

⁶Aishanga sen la nashou che bukkuakei, sen la bousushou che kuakei; hoba songdak haoeibü phaka tonlabü. Hobaje haoeibü nyen, “Maangpanglabü daman- chühbou,” “Thükenbou Mühghaü,” “Thon Akibü Bou,” “Sangmai Chobashou,” dogo nyenlabü.

⁷Haoeibü songdak hoba sangmai haalabü shanga Dawid Choba setshanga hoba haoeibü sangle thüka, kho huonglabü hoba ngühmai hoba saopobüei kho tonenla shanga tou maangdakbü kho kümlabü.

⁸BUNYUBOUei Jakob khu limbo ngüh hautikei hoba kho Israel la khüpan jinkukei.

⁹Hobaje müt pendouei Efraim hoba Samariaa kibü shuongei kho ngelabü, haoenei liliseseko hoba maangpon yaangko lauda.

¹⁰“Juoklaang shuong ada, lausikei künei laang thüngenbüei kümlabü, bhuklong wapan koutia, lausikei künei cedar buei jeilabü.”

¹¹Hibü BUNYUBOUei hao khulimbo Rezineibü dangbou shuong longtilabü, hoba haoei labou shuong baman jinkulabü.

¹²Thedang aenei Siriabü hoba phainei Filistiabü; hoba haoenei haa kouan Israel suilabü. Habü pendou shanga hao khauang longbü athonkei hoba haoei ik tuokbü asungngaikei.

¹³Khei yingasikei aoei mütli to ngümbei, hao jungto hauan ase- pei, ayingsi Thükenbou BUNYUBOU haoenei alam.

¹⁴Hibü BUNYUBOUei Israel ka khu hoba mei, ekyang ik hoba thakdu nyetche chaloua wapan aplabü.

¹⁵Jaishou si lolebü müt kho khu ki, yepeijawebü thuseibü kho mei ki.

¹⁶Aishanga ho mütli leibü shuongei haoen ayinglam to hautida, hoba aoyou haoenei leiyeia haoen mokkei.

¹⁷Hibü BUNYUBOUei haoeneibü heshou shuong to aolinlabü, ayingsi haoei bou akibü hoba latnyu shuong to sanouko adamlabü; aishanga mütpem weko shako yeia hoba amaibü kümbü ki, hoba sembung wekoei ngüh amaibü lauda; habü pendou shanga haoeibü maangshat angaida, lausikei toukei haoeibü ik shingan kia.

¹⁸Aishanga kümsilei amaibü wan tegü longda, khoei sang si jaklong lonan apda; haü, khoei yamnaka wan laakjung sattida, hoba khübü kho wankhük sangmei shangtüngbü thükae to thungan angtida.

¹⁹Thükenbou BUNYUBOU khau lotbü danko kao juokan apda, mütshuongkei wan shanga jiklabü bu tegü kia; müt- pem wekoei jembü jaisina jouan aphoku.

²⁰Haoenei mae ikei hoba nanae ikei sungan shaulabü, lausikei haoen senyüh ashemlabü. Haoenei mütpem wekoei jembü shousi sühko shaulabü.

²¹Manasseei Efraim hoba Efraimei Manasse haoen cheei che shilabü hoba haoen liko lapbuan tokei Jihuda shilabü. Ho pendou shanga hao khau lotbü angaida, lausikei haoeibü ik toukei tuokakei.