Read Chang Naga LEVI 1 Bible Online

LEVI 1 - Chang Naga bible

LEVI 1

¹BUNYUBOUei Mosa BUNYUBOU yobü neichem ka ngaan laukei: Israel shousi shuong to joyoashi hoba lenashi.

²Ladang kan aoyouei BUNYUBOU to lemla junglaje kanei san shuong ayingsi masu shuong ka kaneibü lembü kuashi.

³Haoei lembü kho juokbü lembü shanga yingalonga, haoei mo alebü paangei lemjan, hoba kho BUNYUBOU thedanga sungletenlabü lele kamshang neichem koukhüna lemjan.

⁴Kho haoeibü saüsimaü ngean apbü dogo sungletlabü lele haoei juokbü lemboueibü khua shangetjan.

⁵Kho phaia haoei masu pongsu BUNYUBOU thedanga haitijan; hoba Aroneibü shousi shuong ungshedbou shuongei sii kho lakkulabü hoba kamshang neichem koukhüna lemshang kaijembo sii lakkulabü.

⁶Hobaje haoei juokbü lembü kho khon ojan hoba netla yeiko jemnyinjan.

⁷Hobaje ungshedbou Aroneibü shousi shuongei lemshang thüka wan metjan hoba wan thüka bu kho küpjembo shangjan.

⁸Kheijinei Aroneibü shousi ungshedbou shuongei lemshang thüka kibü phe netshou, khu hoba haabü kho yeneiyenko tetyoan phokujan;

⁹lausikei khoeibü sensimaang hoba you haoei deiei sakjan; hoba pendou kho juokbü lembü shanga ungshedbouei lemshanga juokjan kho BUNYUBOU to ponlem maibü wanei lembü ki.

¹⁰Haoeibü juokbü lembü jongsak kho meisiau ka yingsikei, sanlon yingsikei, lon yingsikei mo alebü paangei lemjan.

¹¹Hobaje haoei kho lemshon yungkük aenei BUNYUBOU thedanga haitijan; hoba Aroneibü shousi ungshedbou shuongei sii kho lemshang kaijembo lakkulabü.

¹²Hobaje haoei kho netla yeiko khu si haabü to jemyolabü, hoba lemshang thüka kibü wana küpjembo bu thüka ungshedbou shuongei pholabü;

¹³lausikei sensimaang hoba you haoei deiei saklabü, hoba ungshedbouei khümbo kho lemlabü hoba kho lemshang thüka juoklabü; kho juokbü lembü BUNYUBOU to ponlem maibü wanei lembü ki.

¹⁴Lausikei BUNYUBOU to haoeibü lembü kho aueibü juokbü lembü yingalonga, haoei dukutuk ayingsi jemau shoushou cheei lemjan;

¹⁵hoba ungshedbouei kho lemshang to sungjung louan haoeibü khu lepthetnyu apan lemshanga juokjan; hoba khoeibü sii kho lemshang napheinei saangan aptishi;

¹⁶hoba haoei wi yoa hoon sungjung hauan lemshang junga chaangbou aenei tap apshanga aplabü.

¹⁷Hobaje haoei kho kaak bangko jitnyinlabü lausikei abangtilabü. Hobaje kho lemshang bu thükaenei wana ungshedbouei juoklabü; kho lembü BUNYUBOU to ponlem maibü wanei lembü ki.