Read Chang Naga LEVI 10 Bible Online

LEVI 10 - Chang Naga bible

LEVI 10

¹Tou Aroneibü shousi Nadab si Abihu haosiei haoeneibü wankak suokjin sungan kho thüka wan jinkei, hoba kho thüka jen jinan BUNYUBOU thedanga asaopobü wanei lembei hoba kho haoei haoen la asakkubü kikei.

²Hobaje BUNYUBOU jungka wan louyenkei hoba haosi suikei, hoba BUNYUBOU thedanga haoen haikei.

³Kheijinei Mosaei Aron to laukei, “BUNYUBOUei laubü kho ho: Kü yoa nyangko kibü shuong yoa ngei ngo lolo saopoan lenlabü, hoba müt pendou thüka ngo soneikanglabü.” Hobaje Aron ngüh üangko apbei.

⁴Hobaje Mosaei Aroneibü bou nashoubou Uzzieleibü shousi shuong Mishael hoba Elzafan ngakei, hoba haosi to laukei, “Nyangko kaiya, saopobü lemshang jungka kukjung shaishang khongaeto kaneibü jaisinasi sunglangashi.”

⁵Hibü haoen nyangko loukei, hoba shaishang ka Mosaei laubü tegü haosieibü mangyuka haosi lenglangkei.

⁶Hobaje Mosaei Aron to hoba haoeibü shousi Eleazar hoba Ithamar to laukei, “Kan haibüla hoba shuong pendou thükto khauang lousi amaibula kanei kaneibü khu shuan tüp, ayingsi kaneibü nei tejitnyin; lausikei kaneibü jaisina Israel mütli khümboei BUNYUBOU khauang longbü wanlong longan kibü shanga maang haapashi.

⁷Hobaje kan haibüla kamshang neichem koukhün ka tüang; aishanga BUNYUBOUei onang naangkubü kan thüka kia.” Hibü Mosaeibü ngüh tegü haoenei kümbei.

⁸Kheijinei BUNYUBOUei Aron to laukei,

⁹“Kan haibüla kanei kamshang neichem to atjinei ih ayingsi nyakidei, nyi ayingsi kaibü shousi shuongei teyung; kaibü meten pendoua ho ponpen shanga lole ngühkhüm kilabü.

¹⁰Hobaje kho kanei saopobü si asaopobü kanglanga hoba hinseibü si ihinseibü kanglanga lulu ngelabü.

¹¹Hobaje Mosa danko BUNYUBOUei haoen to joyobü Israel shousi shuong la ngühkhüm pendou lenjan.”

¹²Kheijinei Mosaei Aron to hoba haoeibü joubü shounyi Eleazar hoba Ithammar to lenkei, “Wanei BUNYUBOU to lembü joubü ka shausiyung lembü sungashi, hoba kho lemshang nyangko shauashi; aieilausi ho aeibou saopobü

¹³hoba kanei kho saoposhanga shaujan, aieilausi kho kaibü phejan; hoba kaibü shousi shuongeibü phejan wanei BUNYUBOU la lembü kubü ki.

¹⁴Hobaje soueibü senlang kho hoba lembü kubü youshi kho kanei, nyi hoba kaibü jayang nouyang shousi shuongei saüenbü kaoen chenei shaujan; aishanga Israel shousi shuong sangmai lembü haitibü ka kaibü phejan shanga habü ho kuakei.

¹⁵Lembü youshi hoba soueibü senlang kho wanei lembü haabü yoa haoenei BUNYUBOU thedanga soueibü lembü shanga soueila sungbajan. hoba BUNYUBOUei sakkubü tegü kho ka shangabü; ka yoa kaibü shousi shuong ponpen shangabü phejan kilabü.”

¹⁶Ladang Mosaei shabü lembü shanga lon maangkuko lambei hoba chühashi, kho juokan apan kiteikei; hoba joubü Aroneibü shousi Eleazar hoba Ithammar to haoei maangpokko laukei,

¹⁷“Ho saopobü dogo ngean hoba shuongei shonbü shedbü künla hoba BUNYUBOU thedanga haoen shanga shabü hangan apla shanga lembü saoposhanga aila ashau?

¹⁸Chühashi, hoeibü sii saoposhang chemmaang aeto aila jungan alot; ngei sakkubü tegü kanei kho saoposhanga shaujan kikei.”

¹⁹Hobaje Aronei Mosa to laukei, “Chühashi, tat haoenei haoeneibü shabü lembü hoba juokbü lembü BUNYUBOU thedanga kua, kümeileiei kü to sühakei; hoba ngei tat shabü lembü shauan kia tegükei kho BUNYUBOU junga sungledasaoma?”

²⁰Hobaje Mosaei kho ditjinei hao senyühshembei.