Read Chang Naga LEVI 13 Bible Online

LEVI 13 - Chang Naga bible

LEVI 13

²Ladang müt cheeibü mang khona bujung longlaje ayingsi paknyinda ayingsi thu- paitham longan kilaje, hoba haoeibü khona imthu phatko kilaje, kheijinei hao Aron ungshedbou ayingsi haoeibü shousi ungshedbou yoa che jungto leian haujan.

³Hobaje ungshedbouei haoeibü phea khon khüto chühjan; hoba khünei wi kho thupaitham yeian kialonga hoba haoeibü phe khotoje chühla haübou yingan kialonga, kho imbü mou ki; hoba ungshedbouei hao to chühan asaopo dogo ngetijan.

⁴Lausikei haoeibü phe khona longan kibü kho thupaian hoba kho chühla khon toje haübou aying hoba khoeibü wi kho thupaitham ayeilonga, kheijinei ungshedbouei kho kaakbü müt kho chalou nyet khinan phojan,

⁵hoba nyetbounyet ungshedbouei hao nyibou chühlabü, hoba kho haoeibü thea jetei hoba mou kho khon nyakko haajung ohauko kialonga kheijinei ungshedbou khoei tokei nyetnyet khinan phojan.

⁶Hobaje tokei nyetbounyeta kho chühngailabü hoba chühsi mou kho sinko hoba khondak shenko ohouko kialonga kheijinei ungshedbouei hao hinseiakei dogo ngetilabü, kho mou che longbü ong ki; haoei haoeibü neisimei saklabü hoba sakasaman kilabü.

⁷Lausikei haoei hao lolo saüenla shanga ungshedbou to lenan phaia mou kho khondak shenko aan kialonga haoei jembü lolo ungshedbou la nyibou lenjan;

⁸hoba ungshedbouei chühlabü, hoba mou kho khondak shenko haajung hauan kialonga kheijinei ungshedbouei hao asaopokei dogo ngetilabü; kho imshat dogo ngean kilabü.

⁹Ladang müt che im longan kilaje, kheijinei hao ungshedbou jungto leian loujan;

¹⁰hoba ungshedbouei takteilabü, hoba khona thupaitham sungjung longan hoba khoei wi thupaitham yeitian sungjung longbü kho ka phe haanbü longan kialonga,

¹¹kho phea imshat hangbü ki, hoba ungshedbouei hao asaopokei dogo ngetilabü hoba haoei khinan aphojan, aishanga hao asaopokei.

¹²Im kho khondak pendoua longa longa, hoba imbü mou longshang khünei khu ka you sühko khei ungshedbouei hapbü sühko longan kialonga;

¹³kheijinei ungshedbouei takteilabü hoba im khoei haoeibü mang pendou yeplepan kialonga kho kaakbü müt kho hinseibü dogo ngetijan, pendou thupaitham apa; hao hinseiakei.

¹⁴Lausikei ladang ong hao to phe haanbü longlaje hao asaopoko kilabü.

¹⁵Hobaje ungshedbouei phe haanbü longbü kho chühan hao asaopobü dogo ngetijan, phe haanbü longbü kho ihinseikei, kho im yingkei.

¹⁶Lausikei phe haanbü kho nyibou thu- paitham yeian apa longa kheijinei hao ungshedbou jungto loulabü hoba ungshedbouei hao takteilabü.

¹⁷Hobaje mou kho thupaitham yeian kialonga, kheijinei mou longbü müt kho hinseiakei dogo ungshedbouei ngetijan; hao hinseian kia.

¹⁸Ladang khondaka takshou longan maibü kilaje,

¹⁹hoba takshou longshang kho thupaitham sungjung longbü che kilaje, ayingsi saklangle bokan kilaje, kheijinei hao ungshedbou la lenjan,

²⁰hoba ungshedbouei takteilabü, hoba kho chühla khon toje haübou yingan kialonga, hoba khoeibü wi kho thupaitham yeian kialonga kheijinei ungshedbouei hao asaopokei dogo ngetijan; ho imbü mou takshoua longbü ki.

²¹Lausikei ungshedbouei kho chühan hanei wi thupaibü aki hoba khon to haübou ayinglonga kheijinei ungshedbouei hao chalou nyetnyet khinlabü,

²²hoba kho khona aan kialonga ungshedbouei hao asaopokei dogo ngetilabü; kho imbü tetsida ki.

²³Lausikei pokan kibü kho khoyama kialonga kho takshou nali ki; hoba ungshedbouei hao hinseiakei dogo ngetilabü.

²⁴Ayingsi manga wanei juokbü kialonga, hoba wanmou phe khünei sungan kialonga, saklangle thupaian ayingsi thupaitham kialonga,

²⁵kheijinei ungshedbouei kho chühlabü hoba sungjung longshang wi kho thupaibü yingalonga hoba chühla khontoje haübou yingalonga kho im, kho wanmoua longbü ki; hoba ungshedbouei hao asaopokei dogo ngetijan, ho im mou.

²⁶Lausikei chühan chühan, hoba sungjung longbü khünei wi thupaibü hoba khondak toje kho haübou ayinglonga hoba nakthüngan kisi kheijinei ungshedbouei hao chalou nyet khinan pholabü.

²⁷Hobaje nyetbounyet ungshedbouei hao takteilabü, kho khondaka aan kialonga, kheijinei ungshedbouei hao asaopokei dogo ngetilabü, kho imbü mou.

²⁸Hobaje sungbü kho khünei ong kialonga hoba khondaka haajung satbü akilonga kho wanei juokbü ka pubü ong ki, hoba ungshedbouei hao saopoakei dogo ngetilabü, aieilausi ho wanei juokbü nali.

²⁹Ladang bousu yingsikei yaksa yingsikei khua ayingsi kaolo maanga mou kilaje,

³⁰kheijinei ungshedbouei mou kho chühjan, hoba chühla khontak to haübou yingalonga hoba khünei wisakshou saklangbü hoba semjeile kialonga, kheijinei ungshedbouei hao asaopokei dogo ngetilabü; ho nyikbü mou kho khua ayingsi kaolo maanga longbü immou ki.

³¹Hobaje ungshedbouei kho nyikmou to chühan hoba chühla khontak to haübou aying hoba khünei wi nakkhübü akilonga kheijinei moulebou kho ungshedbouei nyetnyet khinan phojan;

³²hoba nyetbounyet ungshedbouei mou kho chühjan, hoba nyikmou kho haajung hauan akiteilonga hoba khünei wi saklangbü akiteilonga hoba nyikmou kho khontak to haübou ayinglonga,

³³kheijinei haoei khu shuan apjan, lausikei haoei mou kho shuan üpjan, hoba ungshedbouei moulebou kho chalou nyet khinan phojan;

³⁴hoba nyetbounyet ungshedbouei mou kho chühlabü hoba mou kho khontaka ühaako kialonga hoba chühla khontak to haübou akilonga kheijinei ungshedbouei hao hinseian kia dogo ngetijan; hoba haoei jembü neisimei saklabü hoba saopoan kilabü.

³⁵Lausikei saüenan phaia mou kho khondak shenko puyopuyo haualonga,

³⁶kheijinei ungshedbouei hao to chühlabü, hoba nyikmou kho haajung hauan kialonga wisakshou kho aphaneisikei mailabü, hao asaopoko kia.

³⁷Lausikei hao thedanga jetei kialonga, hoba khünei wi nakkhübü yeman kialonga mou kho maia, hao saopoakei; hoba ungshedbouei hao saopoakei dogo ngetilabü.

³⁸Ladang bousu yingsikei yaksa yingsikei jembü mang khondaka sungjung pujung longan kilaje ungshedbouei haoen to chühjan;

³⁹hoba haoeibü mang khondaka puan sungjung longan kibü kho momtham thupaian kialonga kho khondaka pujung longbü ong ki, hibü khoei hao saopoakei.

⁴⁰Ladang müt che haoeibü khu ka khulou elaje hao khüng kheasikei hinseian kia. Haoeibü khüngjaa khulou akiko apsi hao khüng khea lausikei, hao hinseian kia.

⁴¹

⁴²Lausikei khüng khebü ayingsi khüngja ka khulou ebüa saklangle thupaibü tetsida kialonga khoje touje hao khüng khebü ayingsi khüngjaa wi ebüa im loushetda.

⁴³Hibü ungshedbouei kho chühlabü hoba haoei kho khüngkhebü ayingsi khüngjaa wi ebüa longbü ka sungan kibü kho saklangle thupaian mang khondaka im longbü tegü im hapalonga,

⁴⁴hao im kaakbü müt, hao asaopokei, haoeibü mou khua longsije ungshedbouei hao asaopokei dogo ngetijan.

⁴⁵Im longbü müt aoto mou longan ki haoei nei jitnyinbü neijan, hoba haoeibü khu khulou pinan pholabü; hoba haoei haoeibü thükae sembung khop küplepan, “Asaopobü, asaopobü,” dogo ngekjan.

⁴⁶Hao to mou thonan kishongko hao asaopoko kilabü; asaopobü hao mütpem kijan, hao kishangkei shuong shaishang ka bangan kijan.

⁴⁷Ladang neiameia yemautei bauan kilaje, winei yingsikei, phembanei yingsikei,

⁴⁸kho wiei ayingsi phembaei takbü yingsikei phekhon ayingsi phekhonei denje kümbü yingsikei,

⁴⁹neitomeito ayingsi shenbü peisileia ayingsi phekhona ayingsi takbü ayingsi shenbü peisileia ayingsi phekhonei kümbü ai peisilei yinglaje yingsikei nakthüngan ayingsi saklangle shenbü ngebü kialonga, kho im mou ki, hoba ungshedbou la lenjan.

⁵⁰ungshedbouei mou kho chühlabü, hoba mou kibü kho chalou nyetnyet khinan phojan;

⁵¹Nyetbounyet haoei mou kho chühlabü hoba mou kho neisimei takbü ayingsi shenbü peialeia ayingsi phekhon, khei phekhonei kümbü ajanjan pendoua kaakan kialonga mou kho hatlabü imshat ki; kho asaopokei.

⁵²Hibü haoeibü neisimei ayingsi takbü ayingsi shenbü wi ayingsi phemba neiei takbü ayingsi ai ong phekhonei kümbü peisilei laoboua mousi kaakan ki kho haoei jikan apjan, aieilausi kho yemautei baubü imshat ki, kho jikan apjan.

⁵³Lausikei ungshedbou khoei kho chühan chühan mou kho neisimei ayingsi takbü ayingsi, woubü ayingsi phekhonei kümbü ai peisilei yinglaje yingsikei pinjung asatko kialonga,

⁵⁴ungshedbouei mou longbü kho samenla ngühkhüm kujan, kho phaia tokei nyetnyet khinan phojan.

⁵⁵Mou kibou müt khüto chühlabü, hoba mou kho ajakshaiko ayingsi mou kho puyo puyo asatko kialonga kho asaopokei; nyi kho wana jikan apjan, kho shat dangaenei kaakbü yingsikei maangaenei kaakbü yingsikei kho imshat ki.

⁵⁶Hobaje kho ungshedbouei takteialonga hoba kho sakan phaia shenngaian kialonga haoei kho neikameika ayingsi phekhon ayingsi takbü ayingsi shenbü peisilei ka jitan apjan.

⁵⁷Hobaje kho tokei neisimei khünei ayingsi takbü nei ayingsi shenbü ayingsi ai ong phekhonei kümbei kho longan kialonga lanei yemautei bauan ki kho wanei jikan ap- ashi.

⁵⁸Lausikei neisimei takbü yingsikei, shenbü yingsikei, ayingsi ai ong phekhonei kümbü yinglaje yemautei baubü kho khüka atan kialonga, kheijinei nyibou kho sakjan, hoba kho phaia ong hinseian kilabü.

⁵⁹Wi nei ayingsi bhemba nei takbü ayingsi woubü neisimeia imbü mou kaakbü shanga saüenakei dogo ngetila ayingsi asaüenkei dogo ngetila shanga habü ngühkhüm ki.