Read Chang Naga LEVI 14 Bible Online

LEVI 14 - Chang Naga bible

LEVI 14

²Imsak baubü müt shanga hao saüenbü chalou habü ngühkhüm kijan; hao ungshedbou jungto leian loujan,

³hoba ungshedbou shaishang ka meimeijung haulabü, hoba imsak baubü müt ka mou maia amai chühenlabü;

⁴kheijinei ao saüenlabü ki hao shanga lang kibü hinseibü au penyi hoba cedar bu hoba janglüh saklangbü hoba hisop jungan loula ungshedbouei sakkujan.

⁵Hobaje ungshedbouei au yoka che thamchak chenei dei kouko kibü thüka haitila sakkujan.

⁶Lang kibü au kho shanga kho haoei kho sungbalabü cedar bu hoba janglüh saklangbü, hoba hisop khübü kho hoba lang kibü au kho dei kouko kibü thüka haitibü aueibü sii khünei hamjan.

⁷Hobaje haoei imsak ka ao saüenkulabü ki hao to nyetnei wenan jinkulabü hoba langkibü au khongthua litilabü, hoba kho phaia hao saüena dogo ngetilabü.

⁸Ao saüenlabü ki haoeibü neisimei sakjan hoba haoeibü khu pendou shuan apjan, hoba hao jembü lolo deia mang yuan apjan, khei yingsi ong saüenan kilabü, hoba phaia ong hao sühshang to atlabü, lausikei hao neichem tang aenei nyetnyet kilabü.

⁹Hobaje nyetbounyeta haoeibü khu ka khulou pendou hoba haoeibü sembung wi hoba haoeibü nyek wi shuan aplabü, khei haoeibü khulou pendou shuan aplabü, kho phaia ong hao hinseilabü.

¹⁰Hobaje setbounyeta haoei kap anakbü sanlon paangshou penyi hoba mo alebü sanlon po cheeibü pi che sungbajan, hoba shausiyung lembü shanga wen inyaibü onang yoa kheiyoan efa phejan ana phejan sem, hoba onang aons anthük lak.

¹¹Hobaje ungshedbou aoei hao saüenkuda, saüenla kibü müt kho hoba khübü kho BUNYUBOU junga kamshang neichem koukhüna apyokujan.

¹²Kheijinei ungshedbouei sanlon paangshou yoka che sungbalabü, kho shedbü lembü shanga, hoba onang aons anthüklak kho hoba khübü kho BUNYUBOU junga soueibü lembü shanga soueitijan;

¹³hoba sanlon paangshou kho lanei shabü lembü hoba juokbü haitida khünei saoposhanga haoei haitijan, aishanga ho saopoboutham yingbüka shabü lembü kubü ungshedboueibü yingbü tegütham, shedbü lembü kubükei khei kilabü.

¹⁴Hobaje ungshedbouei shedbü lembü sii kho shisho sungenlabü, hoba kho ao saüenlabü ki, haoeibü mae nou hotena hoba mae ikbema hoba haoeibü mae youbema ungshedbouei naangkulabü.

¹⁵Hobaje ungshedbouei onang aons anthüklak kho sungan kho haoei jembü ik nanae ikmanga haakan jinlabü.

¹⁶Hobaje haoeibü ik nanaenei kibü onang khünei ungshedbouei haoeibü mae ikjishou shanan jinlabü, hoba onang kho BUNYUBOU thedanga nyetnei wenan jinkulabü.

¹⁷Hobaje haoeibü ika jouan kibü onang kho ao saüenlabü ki haoeibü mae nou hotena hoba haoeibü mae ikbema haoeibü you mae youpema shedbü lembü sii thüka ungshedbouei naangkulabü.

¹⁸Hobaje ungshedbou ika jouan kibü onang kho ao saüenlabü ki haoeibü khua haoei yeian jinkulabü, hoba hao shanga BUNYUBOU thedanga ungshedbouei saumei saülabü.

¹⁹Hobaje ungshedbouei shabü lembü kujan, hoba ao saüenlabü ki hao asaüenbü shanga hao shanga saumei saütilabü; hoba kho phaia haoei juokbü lembü haitilabü.

²⁰Hobaje ungshedbouei lemshang thüka juokbü lembü hoba shausiyung lembü kulabü; hoba hao shanga ungshedbouei saumei saülabü hoba hao saüenlabü.

²¹Hobaje hao shalebü yingalonga hoba haoei khübü kula athüklonga, kheijinei shedbü lembü shanga soueilabü hoba hao shanga saüsimaü saumei saüla shanga haoei sanlon paangshou che, hoba shausiyung lembü shanga wen onang yoa kheiyoan efa phejan ana che, hoba onang aons anthüklak sungjan.

²²Hobaje jemau penyi ayingsi dukutuk penyi khei haoei sungbaenbü tegü hoba che shabü lembü hoba lubü che kho juokbü lembü shanga.

²³Hobaje setbounyet BUNYUBOU thedanga kamshang neichem koukhüna hao saüenkula shanga khübü kho ungshedbou jungto sungbajan.

²⁴Hobaje ungshedbouei shedbü lembü shanga sanlon paangshou kho hoba onang aons anthüklak kho sungjan, hoba ungshedbouei khübü BUNYUBOU junga jipbü lembü shanga jiplabü.

²⁵Hobaje shedbü lembü shanga sanlon shoushou kho haitilabü, hoba ungshedbouei shedbü lembü sii kho sunglabü hoba saüenla kibü müteibü mae nou hotena hoba haoeibü mae ikbema hoba haoeibü mae you- pema kho naangkulabü.

²⁶Hobaje ungshedbouei onang kho jembü nanei ikmanga yeian jinjan.

²⁷Hobaje ungshedbouei haoeibü mae ikjishouei nanaenei kibü onang kho ka at nyetnei BUNYUBOU thedanga lakkulabü.

²⁸Hobaje ungshedbouei jembü ika kibü onang kho ka ao saüenlabü ki, haoeibü mae nou hotena hoba haoeibü mae ikbema hoba haoeibü mae you youbema hoba shedbü lembü sii kishanga naangkulabü:

²⁹Hobaje ungshedboueibü ika jouan kibü onang kho ao saüenlabü ki, haoeibü khua haoei yeian jinkulabü; hoba hao shanga BUNYUBOU junga saüsimaü saumei saütilabü.

³⁰Hobaje haoei jemau ayingsi dukutuk shoushou ka haoei jekla thükbü kujan;

³¹che kho shabü lembü shanga hoba lubü kho juokbü lembü shanga shausiyung lembü yoan; hoba ao saüenlabü ki hao shanga BUNYUBOU junga saüsimaü saumei saütikulabü.

³²Ao to imsak longan ki, hoba aoei hao saüenkula shanga songa kibü tegütham lembü akuenda, hao shanga ho ngühkhüm ki.

³³BUNYUBOUei Mosa si Aron to laukei,

³⁴Kan ladang Kanan kaodak to louan kilaje, laobou ngei kaneibü yingla kudaje hoba kanei shian apbü kaonyek chem chenei ngei im mou longtila

³⁵kheijinei chem BUNYUBOUei louan ungshedbou to lenshi: Kü chema je im phatko shat che kia.

³⁶Hobaje chema kibü pendou asaopoko apsi amaibüla dogo ungshedbouei mou kho chühla üttoua, haoenei chem kho kongkula ungshedbouei ngühkhüm kulabü; hoba kho phaia ungshedbouei chem kho chühla atlabü.

³⁷Hobaje haoei shat kho chühlabü, hoba chem kümthanga mou kho shangtüngtham onan nakthüngan ayingsi sakshangan kilao hoba kho chühla kümthang toje phangkabou si ji chühlabü.

³⁸Kheijinei ungshedbou kho chem ka koukhün to longlabü, hoba chem kho chalou nyet khinan phokulabü.

³⁹Hobaje nyibou ungshedbou louan nyetbounyet chühlabü; hoba chem kho kümthanga mou kho haajung hauasi ohau chühlabü;

⁴⁰Kheijinei ungshedbouei laang laoboua mou ki, khübü kho sangnyu batak asao- pobü kaoen che to jinkushi dogo haoen la ngühkhüm kulabü;

⁴¹hoba haoei chem maang kaijembo kuitaiko sakkulabü, hoba haoenei laang khaangyobü tham kho sangnyu batak asao- pobü kaoen chenei jinkulabü.

⁴²Hobaje haoenei khübü laang jeiko lubü pholabü; hoba haoei lubü khangyobü tham sunglabü, hoba chema naanglabü.

⁴³Hobaje haoei laang kho sungan phaia hoba chem kho hameitaiko sakan phaia hoba chema tham naangan phaia nyibou louan mou kho chema longa longa;

⁴⁴kheijinei ungshedbou lotan chühlabü, hoba mou kho chema haajung hauan kialonga kho amaiko aplabü im chema kia; kho asaopo.

⁴⁵Hobaje haoei chem kho panlabü, kho laang khükabü wa, hoba chema naangbü khaang- yobü tham pendou hoba haoei khübü kho sangnyu ka asaoposhang kaoen che to sungjung haulabü.

⁴⁶Tokei chem khinan kijinei ao kilaje, hao nangnak sühko asaopoko kilabü.

⁴⁷Hobaje ao chema yepda hao neisimei sakjan, hoba chema ao shauda- yungda, haoeibü neisimei sakjan.

⁴⁸Lausikei ungshedbou louan chühalonga hoba tham naangan phaia mou kho hinseiakei dogo ngetilabü, aieilausi shat kho maia.

⁴⁹Hobaje chem saüenla shanga haoei cedar bu janglüh saklangbü hoba hisop yoa au penyi jungjan.

⁵⁰Hobaje au che dei koshikbü thüka thamchak chenei haitilabü.

⁵¹Hobaje haoei cedar bu hisop hoba janglüh saklangbü kho lang kibü au penyi sungjung louan haitibü aueibü siia hoba dei koshikbü khünei hamlabü, hoba chema nyetnei sühko lakkulabü.

⁵²Hobaje haoei chem kho aueibü sii, dei koshikbü hoba lang kibü aueibü sii hoba cedar bu, hisop, hoba janglüh saklangbüei saüenkujan.

⁵³Lausikei haoei lang kibü au kho sangnyu ka angan yama litilabü, kho tegü chem shanga haoei saumei saüjan; hoba kho saüenan kilabü.

⁵⁴Habü ho im baubü pendou shanga hoba nyik baubü pendou shanga ngühkhüm ki;

⁵⁵neiameia im longbü shanga hoba chema kibü shanga; hoba bokbülebü, nyik hoba thethu angbü shanga.

⁵⁶

⁵⁷Ladang asaopoko kida hoba ladang saopoan kida khübü shanga habü ho imbü shanga ngühkhüm ki.