Read Chang Naga LEVI 16 Bible Online

LEVI 16 - Chang Naga bible

LEVI 16

¹Tou BUNYUBOUei Aroneibü jayangshou müt nyi BUNYUBOU jungto nyangko loujinei haosi haian phaia Mosa to joyokei,

²hoba BUNYUBOUei Mosa to laukei, “Hao ühaila shanga sao- pobü busen thük onou setshang thedanga thangtetbü neimaang saopobü kaoen to tüet dogo kajai Aron to lenshi aishanga ngo onoubü setshang thüka sangmeia longlabü.

³Ho jungan ong Aronei lemshang to atla thükkei: shabü lembü shanga masu pongsu paangshou che, hoba juokbü lembü shanga sanlon paangshou che.”

⁴Haoei saopobü bhemba nei inyaibü mangsho homjan, hoba kho thüka bhemba nei you yukjin kijan, hoba bhemba nei shembe kaijan, hoba khun hanjan khübü kho saopobü neisimei ki, hoba haoei deiei mang yuan khübü neisimei hele lejan.

⁵Hobaje Israel shousi shuong yoka haoei lon paang penyi shabü lembü shanga hoba sanlon paang che juokbü lembü shanga lejan.

⁶Hobaje Aronei shabü lembü masu pongsu kho lemjan, kho hao shanga ki, hoba hao shanga hoba haoeibü chemdang shabü dean apla shanga saumei saülabü.

⁷Hobaje haoei lon penyi sungban BUNYUBOU thedanga kamshang neichem koukhüna pholabü.

⁸Hobaje Aronei lon penyi shanga phaang paklabü, phaang pakbü che “BUNYUBOU shanga” hoba lubü phaang pakbü che kho “Azazel shanga.”

⁹Hobaje lon laobou to BUNYUBOU shanga phaang shatkei, Aronei kho sungbalabü hoba shabü lembü shanga kho kulabü.

¹⁰Lausikei lon laobou to phaang shatkei, kho azazel shanga yama lang litibüei hao shanga shabü dela BUNYUBOU thedanga langkei litilabü.

¹¹Hobaje Aronei hao shangabü shabü lembü masu pongsu kho lemlabü hoba hao shanga hoba haoen chemdang shanga shabü dela saumei saülabü, hoba hao shanga shabü lembü masu pongsu kho haitilabü.

¹²Hobaje BUNYUBOU junga lemshang ka wankakei shenko phau che haoei junglabü; hoba teibü ponlem hanbüla yeitian ik maang penyi shenko hoba haoei kho thangtetbü maang to jungan loulabü.

¹³Hobaje hao ühaila shanga sao- pobü busen thüka onou setshang jeneibü wankhükei khuileplabü lele BUNYUBOU junga kibü khünei haoei jen jinkujan;

¹⁴hoba haoei masu pongsueibü sii kho sungbalabü, hoba kho haoeibü ikjishouei onoubü setshang thüka chaangbou aenei lakkulabü; hoba onoubü setshang thedanga ikjishouei haoei nyetnei lakkulabü.

¹⁵Kho phaia haoei mütshuong shanga juokbü shabü lembü lon haitilabü, hoba sii kho thangtetbü maangae jungan atlabü hoba kho sii kho haoei masu pongsu sii lakbü tegütham kümlabü, hoba kho onoubü setshang thüka hoba setshang thedanga lakkulabü;

¹⁶Hobaje Israel shousi shuong asaopobü hangshong hoba haoenei ngühkhüm lulimbü hangshong khei haoeneibü shabü pendou shanga, haoei lemshang shanga shabü dela saumei saülabü hoba haoen yoa asaopobü shuong yoa kibü kamshang neichem shangakei kho tegü haoei kümlabü.

¹⁷Hobaje Saopoboutham to shabü dela hao atjinei hao along shongko hoba hao shanga hoba haoen chemdang shanga hoba Israelbü shuong pendou shanga shabü dela aküm shongko kamshang neichema müt aokei akijan.

¹⁸Kho phaia hao BUNYUBOU thedanga kibü lemshang to anglabü, hoba kho shanga shabü dela kümlabü hoba masu pongsueibü sii hoba loneibü sii kho sungbalabü, hoba kho lemshang laang shuong kaijembo phokulabü.

¹⁹Hobaje kho thüka haoeibü ikjishouei sii kho nyetnei lakkulabü, hoba Israel shousi shuong asao- pobü ka sakkuko saüenkulabü.

²⁰Hobaje Saopoboutham hoba kamshang neichem, hoba lemshang shanga lamlean saumei saübü phaia haoei langkei kibü lon khoei lemlabü.

²¹Hobaje Aronei haoeibü ik penyi hamei lang kibü lon thüka shangetan, Israel shousi shuongei shonshaibü shedbü pendou hoba haoenei ngühkhüm leilubü pendou khei haoeneibü shabü pendou kho thüka shedbü thekuko küntilabü, hoba haoei loneibü khua shabü kho pholabü hoba kho lamlean lon chühbou müt cheei leian hauan yama litilabü.

²²Hobaje haoenei shonbü shedbü pendou lon khoei jembü to sangliphang kaonyek che to künlabü, hoba haoei yama lon kho litilabü.

²³Hobaje Aron kamshang neichem khüto atlabü, hoba haoei Saopoboutham to atjinei lebü bhemba neisimei kho hangletlabü hoba khübü kho khünei phokulabü:

²⁴Hobaje haoei haoeibü mang saoposhang chenei mangyulabü, hoba neisimei lejung longan hao shanga juokbü lembü hoba eikshuong shanga juokbü lembü kulabü hoba haoei hao shanga hoba noknyüh shanga shabü dela saumei saülabü.

²⁵Hobaje shabü lembü shanga haabü kho haoei lemshang thüka juoklabü.

²⁶Hobaje aoei azazel shanga lon litilaje haoei jembü neisimei sakjan, hoba haoeibü mang deia yuan aplabü hoba thonla hao kamshang to atlabü.

²⁷Hobaje shabü lembü masu pongsu hoba shabü lembü lon kho laobou sii shabü dela Saopoboutham to jungan atlabü kikei, kho kamshang khong aeto sungbajan, hoba haoenei khübü khon, phe, hoba khübü shiang phet wana jikan aplabü.

²⁸Hobaje khübü aoei jiklaje haoeibü neisimei sakjan, hoba hao mangyujan hoba kho phaia hao kamshang to atlabü.

²⁹Hobaje ho kan shanga pon- pen song che kilabü, lit nyetboubü chalou anbounyet kanei kan lolo mühei nyengko khonkujan, hoba sangbüshou yingsikei hoba kan yoa kibü küksithang yingsikei ai akümaleijan.

³⁰Aishanga kan saüenla ho chaloua kan shanga shabü dela saumei saübü kaneibü shabü pendou ka kan BUNYUBOU junga saüenan kijan.

³¹Ho kan shanga khümbo haksobü nou, hoba kanei kan lolo mühei nyengko khonsakjan, ho ponpen shanga song che ki.

³²Hobaje ungshedbou ao bou jeila khümbo kuko onang naangkuko pienlaje haoei shabü saumei saübü kümsilei kümlabü, hoba bhemba nei neisimei, khei saopobü hele lejan:

³³Hobaje haoei saopobü lemshang saüsimaü shanga saumei saülabü hoba kamshang neichem hoba lemshang shanga haoei saumei saübü kümsilei kümlabü hoba haoei ungshedbou hoba eikshuong pendou shanga saumei saülabü.

³⁴Hobaje Israel shousi shabü pendou shanga po chenei shabü debü saumei saübü kümsilei kümlabü; ho kan shanga ponpen song che kilabü. Hobaje BUNYUBOUei sakkubü tegü Mosaei kümbei.