Read Chang Naga LEVI 17 Bible Online

LEVI 17 - Chang Naga bible

LEVI 17

¹BUNYUBOUei Mosa to laukei,

²Aron hoba haoeibü shousi hoba Israel shousi pendou to lenshi, BUNYUBOUei ho sakkuko lauda;

³Israelbü yoa aoyouei kamshanga masu ayingsi sanlon ayingsi lon haitilaje, ayingsi kamshang khong aenei haitilaje,

⁴hoba kho BUNYUBOU lemshang neichem thedanga BUNYUBOU shanga lembü kula kamshang neichem koukhün jungto jungan aloulaje, sii phinbü kho shanga müt kho shedsikhau baulabü; haoei sii angtikua, hoba kho müt jembü mütli ka nangletlabü.

⁵Haoeneibü lembü laobou khonga haitilaje kho Israelbü shuongei haoeneibü lembü jungan loulabü, kho BUNYUBOU jungto kamshang neichem koukhün to ungshedbou jungto sungbalabü, hoba khübü kho sangmai hakso lembü haitian kula shanga BUNYUBOU to lemlabü ki.

⁶Hobaje ungshedbouei sii kho BUNYUBOU lemshang neichem thüka koukhüna lakkulabü, hoba haabü kho BUNYUBOU la ponlem maibü shanga jikkulabü.

⁷Touje haoenei haoeneibü shatsinam haitian lembü kaokabü mühghaü lonpaang heangsho la lembü akulabü, laobou phaito haoenei pejapelako phaisemda. Ho haoen shanga meten sünga ponpen shanga ngühkhüm kilabü.

⁸Hobaje nyi haoen to lenlabü, Israelbü aoyouei ayingsi haoen yoa kibü küksithang yoa aoei juokbü lembü ayingsi haitian lembü kulaje,

⁹hoba kho BUNYUBOU to lemla kamshang neichem koukhün to jungan aloulaje, kho müt khokei jembü mütli ka aplabü.

¹⁰Hobaje Israelbü ayingsi haoen yoa kibü küksithangbü aoei sii shaulaje, sii shaubü khulimbo ngo kilabü, hoba hao jembü mütli ka wapan aplabü.

¹¹Aishanga phe langkei kho siia ki; hoba kho ngei kan la kaneibü lembü shanga lemshang thüka shabü shanga saumei saüla kua; aieilausi lang kibü kho siiei saüenda.

¹²Hibü ngei Israel shousi shuong to lenkei, kan aoeikei sii ashaulabü, ayingsi kan yoa kibü küksithangbü aoeikei sii ashaujan.

¹³Hobaje Israel shousi shuong yoa aoyouei ayingsi haoen yoa kibü küksithangbü aoyouei meisiau ayingsi au at mei kipjinei shaulaje, haoei khoeibü sii kho saangan aptilabü hoba kho thamei jonlepnyu phokujan.

¹⁴Aieilausi meisiau pendou langkeibü kho sii khoei ki, hibü ngei Israel shousi shuong to laukei, “Kanei meisiau aieibü siikei ashaulabü, aieilausi meisiau pendou langkei kho sii khoei ki, aoyouei kho shaulaje wapan aplabü.”

¹⁵Hobaje müt weko aoei hao lolo haibü ayingsi meisiauei shakettibü haibü mang shaulaje, hao kho sangbüshou yingsikei küksithangbü yinga tegükei haoei jembü neisimei sakjan hoba hao jembü lolo mangyuan apjan hoba nangnak sühko asaopoko kilabü.

¹⁶Lausikei haoei khübü kho asaklonga hoba mang yuan üplonga kheijinei haoei jembü shabü künlabü.