Read Chang Naga LEVI 19 Bible Online

LEVI 19 - Chang Naga bible

LEVI 19

¹BUNYUBOUei Mosa to laukei,

²Israelbü shuong haoen pendou liko yoshaitian lenashi, “Kan saopoan kishi, aishanga ngo BUNYUBOU kaneibü Mühghaü saopobü ki.

³Kan mütpem wekoei lulueibü nyu to bou to soumo hatjan, hoba kanei ngeibü Nounyet noujan; ngo BUNYUBOU kaneibü Mühghaü ki.

⁴“Kan heangsho aeto tesepei, ayingsi kan jembü shanga namdei lembüei kümbü mühghaü teküm, ngo BUNYUBOU kaneibü Mühghaü ki.

⁵“Ladang kanei sangmai lembü BUNYUBOU la kulaje kanei khei kan sungletenlabü lele lemashi.

⁶Kho kanei kubü chaloua hoba nyibounyet shaujan, hoba sembounyet sühko jouan kialonga kho wana jikan apjan.

⁷Kho sembounyet ong shaualonga kho mangsenlabü ki; kho asungletlabü.

⁸Lausikei mütpem weko aoei kho shaulaje haoei shonbü shedbü künlabü, aieilausi BUNYUBOU saopobü peisilei haoei shatia, hoba kho müt jembü mütli ka wapan aplabü.

⁹“Ladang kanei kaneibü sek latlaje, nyi kaibü sek phajib sühko khümboje alatjan, ayingsi kaibü seklatjinei youman nyi ahejan.

¹⁰Hobaje nyi kaibü semlüh seka nguiletbü hek athanshaijan, khübü kho shalebü hoba yenbou la apyokushi, ngo BUNYUBOU kaibü Mühghaü ki.

¹¹“Kanei tekok ayingsi khüpbolangko tejungei ayingsi cheei che to yepeijaweko teküm.

¹²Hobaje kanei kü nyena amlang tethetelan, kho nyi kaibü Mühghaü nyen shatida. Ngo BUNYUBOU ki.

¹³“Nyi kaibü lepbou telepetti, ayingsi hao ka teso; eikbüla munam akuko nyibounyet ngeyang sühko aphojan.

¹⁴Nyi obangbü to akhükuokjan, ayingsi nyekthubü thedanga phaiyetlabü aphokujan, lausikei kaibü Mühghaü to hatjan. Ngo BUNYUBOU ki.

¹⁵“Kanei matjemshanga ngühmaangalanbü aikei akümjan; nyi shalebü to the techüh ayingsi yaangbü to phang che teying; lausikei ngühmaanglanbüei nyi kaibü lepbou matjemashi.

¹⁶Nyi kaibü mütshuong yoa pintiaatibü ngüh tejungei. Hobaje nyi kaibü lepboueibü langkei thushed to tütti. Ngo BUNYUBOU ki.

¹⁷“Nyi kaibü maangpona kaibü jaisina amangsenjan, no haoeibü shedbüa ühamla shanga nyi hao to teshuok hakashi.

¹⁸Nyi phok telam, ayingsi kaibü mütli shousi shuong khulimbo maangshat aikei tepho, lausikei nyi ka lepbou to jembü to tegü sanouashi. Ngo BUNYUBOU ki.

¹⁹“Kanei kü ngühkhüm jungeiashi. Shatsinam phang lulu cheei che to tenakti. Nyi kaibü seka lilabü penyi kheiyoan awenjan ayingsi peisilei phang lulu penyi soyoan kümbü neisimei nyi aneijan.

²⁰“Müt cheei aaosao, ao müei phean ki, lausikei tokei mo ajekthetkei, ayingsi sao alitikei, sao to asangalan jungeialonga haoen ngüh juonglabü; haoen ühaitilabü, aieilausi sao alitikei.

²¹Hobaje haoei jembü shabü lembü BUNYUBOU jungto kamshang neichem koukhün to kei sanlon paang che shabü lembü jungjan.

²²Hobaje ungshedbouei hao shanga shabü lembü sanlon paang khoei haoei shonbü shabü shanga BUNYUBOU thedanga shabü shonbü shanga saumei saütilabü.

²³“Ladang kan kaonyek to louan shausiyung shanga bunyu phang juong kelaje, kanei lang kho noubüsoubü dogo weeijan. Po sem sühko ashaula noubü kho ashaujan.

²⁴Lausikei po leiboubüa khübü hek pendou saopobü kilabü, kho BUNYUBOU la nyensang kubü lembü kilabü.

²⁵Hobaje po ngaoboubüaje kho kan la athakko lang hekkula shanga kanei hek kho shaula thükkei. Ngo BUNYUBOU kaneibü Mühghaü ki.

²⁶“Kanei ai peisilei kei sii yoan ashaujan, kanei loulabü shanga tetlatalabü ayingsi seibü yaübü, takbüthapbü kümsilei teküm.

²⁷Kanei khunyem ayingsi sembung wi kütan üpjan.

²⁸Nyi haibü shanga kaibü manga awapngaijan ayingsi ka to shenlangela khükpüp khüngpüp aikei akümjan. Ngo BUNYUBOU ki.

²⁹“Kaibü yaksa shousi shuong suonlamnyu la teyeiti, khei yingalonga kaonyek kho pejapela yeilabü hoba shabüei shenlabü.

³⁰Kanei ngeibü Nounyet junge- iashi, hoba lemshang to souhat kuashi. Ngo BUNYUBOU ki.

³¹“Kan seibüyaübü soushou jungto ayingsi haibü sou to joyobü seibü jungto sepeinyu tengai, haoenei shaantilabü lele haoen telam. Ngo BUNYUBOU kaneibü Mühghaü ki.

³²“No khuthu phambü jaishou yoa loashi, hoba chingbü jaishou pendou to souhat kujan, hoba nyi kaibü Mühghaü to souhat kujan. Ngo BUNYUBOU ki.

³³“Ladang yenbou che, ka to bou laman kilaje kanei hao amaiko tejungei.

³⁴Ka to bou laman kibü yenbou kho ka junga kan yoa bukmüt tegü kilabü, hoba nyi hao to jembü tegü sanouashi; aishanga kan Ijep kaodaka yen la lean kikei. Ngo BUNYUBOU kaneibü Mühghaü ki.

³⁵“Kanei matjemshanga ngühmaang alanbü akümjan, süng si khaang takbüa, hauan chühbüa, ayingsi pem webüa,

³⁶seret haubü bu tükde, hauan chühbü tükde, efa tükde hoba hin tükde kanei kijan. Ijep kaodak ka leiyenbü ngo BUNYUBOU kaneibü Mühghaü ki.

³⁷Hobaje kanei ngeibü ngühkhüm pendou hoba ngeibü matjem pendou jungeijan, hoba khübü kho kümashi. Ngo BUNYUBOU ki.”