Read Chang Naga LEVI 20 Bible Online

LEVI 20 - Chang Naga bible

LEVI 20

¹BUNYUBOUei Mosa to laukei,

²“Tokei nyi Israel shousi shuong to ho lenashi: Israel shousi ao yinglaje yingasikei, hoba Israelbü to bou laman kibü küksithang yingsikei aoei jembü shou Molek la khümbo kulaje, maimaitham haoje hailabü; kaonyeka kibü shuongei hao to laangei tetlabü.

³Tokei ngo kho müt khulimbo lolabü, hoba hao jembü mütli ka wapan aplabü; aieilausi haoei haoeibü shousi shuongei ngeibü lemshang shatikei, hoba ngeibü nyen saopobü aweasüng la Molek la kuan apbei.

⁴Hobaje kaonyek kabü shuongei ho mütei jembü shou Molek la khümbo kuan apjinei haoen nyek muan apalonga hoba hao ühaitilonga,

⁵ngei ngo lolo ho müt hoba haoen chempen khulimbo lolabü hoba hao hoba hao phainei Molek yoa pejapelako haubü shuong haoeneibü mütli ka wapan aplabü.

⁶“Hobaje yemshanla haubü hoba seibüyaübü shuong yoto pejapelako haula sepeinyu ngaibü müt khulimbo ngo lolabü hoba jembü mütli ka wapan aplabü.

⁷Hibü kan lulu bangan kishi, hoba kan saopobü kishi, aishanga ngo BUNYUBOU kaneibü Mühghaü ki.

⁸Hobaje kanei ngeibü ngühkhüm jungeiashi, hoba khübü kho kümashi; kan saüenkulabü BUNYUBOU ngo ki.

⁹“Aishanga mütpem weko aoei jembü bou ayingsi jembü nyu to khüklauoklaje maimaitham haoje haitilabü; haoei bou ayingsi nyu to khükauokabü haoeibü sii haoeibü khua kilabü.

¹⁰“Hobaje bousu aoei müeibü yak to jamlaje, khei jembü lepboueibü yak to jambou hoba jamnyu maimaitham haitilabü.

¹¹Aoei jembü boueibü yak to jamlaje haoei püh thea hao himou bautia, bousubou si yaksanyu ham haitilabü, haosieibü sii haosi thüka kilabü.

¹²Müt cheei jembü li to jamalonga haosi ham tükde haitilabü, haosieibü sii haosi thükto ong yinglabü.

¹³Bousu atei bousu to yaksa to tegü jamalonga haosi hamei mangsenlabü jungeia; haosieibü sii haosi to yinglabü.

¹⁴Bousu cheei yaksa che hoba saoeibü nyu dogo lealonga kho pejapelabü; haoen yoa amaibü akila shanga bousubou si yaksa nyi ham wanei juokettijan.

¹⁵Müt cheei meisiau to jamalonga hao haitilabü; hoba kanei meisiau kho haitijan.

¹⁶Yaksa atei meisiau to jamalonga nyi yaksanyu hoba meisiau kho haitijan; haosieibü sii haosieibü khua kilabü.

¹⁷“Müt cheei jembü nou ayingsi na jembü boueibü nouyangnyu ayingsi nyueibü nouyangnyu lean jamalonga kho himoulabü kümsilei ki; haoen jembü mütli thedang ka wapan apjan; haoei jembü nou ayingsi na to himou jungeikei; haoei jembü shabü künlabü.

¹⁸Müt atei yaksa liteibü phejan sii haujinei yepalonga haoei sao to asang- alanda, hoba saoeikei jembü sii haubü tang khittida, hibü haosi ham jembü mütli ka wapan apjan.

¹⁹“Nyi kanyueibü nou ayingsi na to ayingsi kaboueibü nou ayingsi na to ajamjan, aishanga khoei haoeibü chempen himou bautida, haoenei jembü shabü künlabü.

²⁰Müt atei jembü bou jaishoubou ayingsi bou nashouboueibü yak to yepsi haoei haobou jaishoubou ayingsi bou nashoubou himou bautida, haoenei jembü shedbü shonbü künlabü hoba haoen shousi akiko hailabü.

²¹Müt atei jembü jaisinaeibü yak lealonga kho asaopobü ki; haoei jaisina püh thea himou bautida, haoen shousi akilabü.

²²“Khei yingbü khoei ngei kan ainei kitila leian loukei, kho kaonyekei kan nangan üptila shanga ngeibü ngühkhüm pendou ngeibü matjem pendou kanei phoashi; hoba khübü kho jungei- ashi.

²³Ngei kan thedang ka shian sattibü phangshuong song tegütham kan tepai; aishanga haoenei khübü pendou kümbei, hibü khoei ngei haoen mangsenkei.

²⁴Ngei kan to lena, kanei haoeneibü kaodak kiman sunglabü, sendei hoba naodei kouko kibü kaonyek kho kaneibü yingla ngei kan la kulabü; phangshuong ka kan bangtibü BUNYUBOU kaneibü Mühghaü ngo kia.

²⁵Hibü kanei saopobü meisiau asaopobü meisiau ka, hoba asaopobü ausiyuk saopobü ka bangtijan; hoba yangsikok ayingsi ausiyukkei ayingsi kan ka asaopobü pinyinan phokubü kaoa paibü aieikei kaneibü soushou mangsenlabü teyeiti; aishanga ngo BUNYUBOU saopobü kia.

²⁶Hobaje kan ngeibü yeila saopoan kishi; aishanga ngo BUNYUBOU saopobü ki, hoba ngeibü yingtila shanga phangshuong yo ka ngei kan phangche shanenan phoa.

²⁷“Tokei, bousu yingsikei, yaksa yingsikei soushou yemshanla haubü, ayingsi seibüyaübü tükde haitilabü; haoenei haoen laangei tetettilabü; haoeneibü sii haoen to yinglabü.”