Read Chang Naga LEVI 21 Bible Online

LEVI 21 - Chang Naga bible

LEVI 21

¹BUNYUBOUei Mosa to laukei, “Aroneibü shousi ungshedbou shuong to joyoko lenashi: ‘Jembü mütli yoa haibü shanga,

²jembü chema chempen, jembü nyusibou hoba jembü shou, hoba jembü nouyangnyu, hoba jembü jaisina, haibü to liman aoeikei jembü lulu adotyojan;

³hoba haoen chempen, jembü nou ayingsi na medei ao saosüngbü ki sao shangaje haoei jembü lulu totyola thükkei.

⁴Hao jembü mütli yoa kongnyubou yingsije, jembü to aweasünglabü lele haoei jembü lolo atotyojan.

⁵“Haoenei haoneibü khu tongko shuan üpjan, ayingsi haoeneibü sembung wi shuan üpjan ayingsi haoeneibü manga aikei apüpjan.

⁶Haoenei haoeneibü Mühghaü nyen ashajan, aieilausi wanei BUNYUBOU to lembü shuong haoeneibü Mühghaüeibü wentek haoenei lemda; hibü haoen sao- pobü kilabü.

⁷Haoenei pejapela asangalan sao alejan; ayingsi sao laoei sattibü alejan, aishanga hao Mühghaü thedanga saopobü ki.

⁸Hibü nyi hao saüenan phokujan, aishanga haoei kaibü Mühghaüeibü wentek lembü kuda; kan shanga hao saopobü yingjan; aishanga ngo BUNYUBOU aoei kan saüenan phokuda, ngo saopobü ki.

⁹Hobaje ungshedboueibü nou- yangnyuei asangalanko jembü lolo shabüa dotko kialonga saoei jembü bou aweasüngda, sao kho wanei juokettijan.

¹⁰“Hobaje ao jembü jaisina yoa thükkabou ungshedbou ki, hoba aoeibü khua naanglabü onang yeian jinkuan ki, hoba aola saopobü hele lekuda haoei jembü khulou bungbungsese aphojan, ayingsi jembü neisimei jitnyinan alejan,

¹¹ayingsi jembü bou shanga ayingsi jembü nyu shanga jembü lolo dotnyinko haibü mang aitokei ohaujan;

¹²ayingsi hao lemshang ka alongjan, ayingsi haoeibü Mühghaü lemshang adotnyinjan, aishanga hao Mühghaüeibü onang naangko pienbü khümbo kubü hao to kia. Ngo BUNYUBOU ki.

¹³Hobaje haoei saosüngbü medei lejan.

¹⁴Latnyu ayingsi bangbü ayingsi leilubü yaksa ayingsi asangalan sao khübü haoei alejan; lausikei jembü mütli ka saosüngbü medei haoei yakla lejan.

¹⁵Hobaje jembü mütli yoa haoei jembü shousi shuong adottijan; aishanga kan saüenan phokubü Mühghaü ngo ki.”

¹⁶BUNYUBOUei Mosa to laukei,

¹⁷“Aron to lenashi: Kaibü mütli yoa nali thebü aoao yinglaje yingsikei loulabü meten sünga hao Mühghaü shanga wentek lembü kula telouti.

¹⁸Aishanga laobou müt to ong nali kilaje hao aloujan, nyekthubü yingsikei, sokebü yingsikei, kung pheijobü yingsikei, mütsha mütkok yingsikei, ajanjan pendou aei yembü yingsikei,

¹⁹you leilubü yingsikei, ik leilubü yingsikei,

²⁰shenjang tokbü yingsikei, ik ngokbü yingsikei, shished küngshed yingsikei ayingsi nyekei amubü yingsikei, nyik baubü moushed kakbü yingsikei, kümsamenang yingsikei, hoba tokkhet yembü müt yingsikei,

²¹Aron ungshedboueibü shousi mütli aokei wanei BUNYUBOU shanga lembü kubü nyangko aloujan; hao to nali theakei, haoei jembü Mühghaü shanga wentekei lemla nyangko aloujan.

²²Haoei jembü Mühghaüeibü saopoenbü ayingsi saopobü kho shaula thükkei.

²³Ngeibü lemshang adotnyintila shanga haoei thangtetbü khüto ong ütjan, aieilausi hao to nali theakei, aishanga kan saüenan phokubou Mühghaü kho ngo ki.”

²⁴Kho tegü Mosaei Aron to lenkei, hoba haoeibü shousi shuong hoba Israel shousi pendou to joyokei.